Wednesday, 22 December 2010

نعير البقر


معرفش اذا كان ده وقت التنابز بالالقاب والعتاب واللوم والتقريع والتجريس ام هو وقت الاتحاد والقوة وأما الرجل جمع اولاده وفهمهم انهم مش هيقدروا يكسروا حزمة الحطب الا أذا اتحدوا لكن الذي يبدو في الأفق يظهر عكس ذلك تماما يظهر ان الرجل مات والسر اندفن معاه قبل مايعلم ولاده مايسمعوش لجارهم السو ومايشغلوش بالهم بقضايا فرعية تفقدهم تركيزهم وتشتت انتباههم عن كسر حزمة الحطب . وساب الأمر ملتبس على العيال بعض الشيء وانتقل الى جوار ربه .

.................
مبدئيا يجب ان نعلم أننا هنا كلنا -واعني "بـهنا " ذلك العالم الافتراضي الذي نعيش فيه من شبكات اجتماعية وصحافة شعبية و ما الى ذلك- يجب ان نعلم ان هذا المكان ليس المكان الصحيح أذا كنا نبغى التغيير على الأرض ربما يكون مكان نفرغ فيه طاقتنا واحاسيسنا وشعورنا بالغضب والظلم والاضطهاد لكنه صدقا ليس المكان المبتغى" أو المكان الهدف " -حلو المكان الهدف دي زي النكتة الفزورة كده- أو هو مكان نتعرف فيه على ناس من كل الدنيا وما الدنيا الا شات روم كبير على راي ابو صلاح ابو صلاح مين ؟ واحد فيسبوكي متعرفوش . بس قواعد اللعبة تحتم علينا أنا زي مااتكلمنا في عالم افتراضي لازم نرد في نفس ذات العالم الافتراضي . تناقض بغيض ابن لذينا ازاي من كام سطر بس بتكلم عن أننا لازم ننزل الأرض و دلوقت بتكلم من السما؟ الله يخرب بيتك يا بيل جايتز انت وجوجل و العالم بنت اللذينا دي اللي اكلت دماغنا .
المهم يعني المقدمة الطويلة دي ملهاش أي لازمة , بس أهو التفاف على الأمور زي مابنقول أنا هتكلم عن الاضطهاد الديني من منظور حد مضطهد فعلا وبيحصل له كل يوم وكل دقيقة تمييز مش لازم التمييز والاضطهاد يكون مفضوح زي حرق بيتنا مثلا أو تهجيرنا من المكان اللي بنعيش فيه أو ان الناس كل ماتشوفك تتف عليك وتقول لك ريحتك وحشة ووشك اصفر .

لكن اللي بيحصل انه فعلا المسلمين- هنا- بشكل أو بآخر مضطهدين من أول الست اللي بتقدم وجبة الغداء في مطعم الشغل لغاية سواق الاتوبيس اللي مرضاش يركب رجل ملتحي ومراته المنقبة الاتوبيس ومعاهم عربة أطفال بحجة ان المكان لا يسع اكثر من عربتين رغم انه في العادي بيسع لثلاثة واحيانا اربعة عربات لو كانت من المقاس الصغير و في المحطة التالية اوقفته سيدة انجليزية بيضاء ومعها عربة طفل وسمح لها بالصعود للأتوبيس ولما رحت اناقشه لم يعجبه وسمعت من ورا الاتوبيس من الركاب كلمة تروريست أو ارهابية .. ارهابية لمجرد اني بسأل ليه عمل كده الكلام ده حصل في اوروبا والدول المتقدمة والله العظيم تلاتة اصريت الحاحا اني اخد رقم البطاقة بتاعة السواق الأبيض ابو كرش العنصري كان رافض في الاول لكن كبرت في دماغ اللي جابوني اني لازم اخدها بحجة ان ده حقي ماطل شوية بس بعد كدة غصب عن أهله ادهالي .. مش هاقول لكم بقى بقى عن كمية التأفف اللي الركاب وصلوها لي لاني" معطلة "لهم أوقاتهم الثمينة في جدل عقيم لا يستحق كل ذلك- من وجهة نظرهم العنصرية- . مع ان هما دول- تقريبا -نفس ذات أم الركاب اللي اعترضوا ووقفوا الاتوبيس ربع ساعة علشان ست عندها فوبيا الكلاب وفيه راجل طلع الباص بكلب !!
..........
المسيحيين في مصر مضطهدين نعم مضطهدين والله العظيم مضطهدين والنعمة الشريفة مضطهدين وحق الالهة مضطهدين والمسيح الحي يا سيدي مضطهدين بس متنساش ان المسلمين كمان مضطهدين من ذات نفس النظام واللي وصل حالة الاحتقان والكره والعداوة اللي بتحكوا لي عنها دي وملمستهاش بنفسي خلال زيارتي القصيرة لمصر اللي وصلنا لكدة سياسة فرق تسد والكلام ده . النظام لو حس دقيقة واحدة ان المسلمين والمسيحيين هايتفقوا ويتحدوا على قلب رجل واحد هتبقى هي دي النهااااية يا زريااااب بالنسبة لهم .

فـكل يوم يتفننوا في خلق مشاكل و مواضيع تجعل الجانبين ياكلوا في بعض كما تأتي الأكلة على فريستها - يخرب بيت الفصاحة- والكنيسة طبعا تبدو في الصورة من بعيد تلعب لعبة راسبوتين بس بحرفنة وذكاء اكبر من راسبو الأهبل.
البابا لا يريد للاقباط ان يخرجوا من عباءة الكنيسة يريد ان يحتضنهم الى أبد الآبدين لانه بسيطرته عليهم تدنو له الهيبة والسلطة أما ا ابتعاد المسيحيين عن جلباب البابا فهو مايعني اهتزاز واضطراب السلطة الكنسية والنظام اللاهوتي الذي ظل مسيطرا على" الشعب" القبطي بأكمله مئات السنين
. في هذا الوقت- اعني انفصال الشعب القبطي عاطفيا وسياسيا عن الكنيسة - لن يملك الحبر الأعظم أي سلطة على شعبه غير سلطة اقامة االصلوات والتناول و جلسات الاعتراف والتعميد للأطفال على اقصى تقدير وهو الشيء الذي كلما فكر فيه البابا أو النظام الكنسي كله يرتعب رعب جيري من توماس وقلبه يعمل بوم بوم بوم ويكون الحل بالنسبة له انه يفضل راعب الاقباط من فكرة الخروج عن الاطار الكنسي لانهم هايتفرموا.

فـالناس- الخايفه اصلا من غير حاجة - يخافوا بزيادة ويفضلوا ملتصقين بالجلباب الباباوي ومحافظين على ذلك الحبل السري بينهم وبين الكنيسة .
........
على الجانب الاخر المسلمين بقى مضطهدين من النظام اللي هو بالأساس مسلم فيطلعوا الظلم الواقع عليهم ده ازاي ؟ يطلعوه على الطرف الأضعف ,, تمام زي مابيطلع قرفك وزهقك من ابوك اللي متقدرش تفتح بقك قدامه على امك الغلبانة أو اخوك اللي اصغر منك أو أنك تعمل راجل على اختك وتقول لها متلبسيش ماتعمليش أو على مراتك أنك تضربها كل يوم علقة علشان مديرك مطلع عين اهلك في الشغل .وده طبعا بيغذيه ويشرف عليه اشراف كامل وبسعادة فشيخة النظام من خلال عملاءه أصحاب العمائم الوهابية والأثواب واللحى الطويلة تجار الدين وبائعي صكوك الجنة في الفضائيات والمنتديات الدينية وما شابه والكلام ده مش من عندي ده كلام الدعاة خريجي التربية الرياضية وكليات الخدمة الاجتماعية والتربية النوعية شعبة اقتصاد منزلي. واسألوا حتى الشيخ صفوت حوجازي .


..... الحكاية معقدة والحل بسيط لكنه يحتاج وقت كبير جدا وتفاهم بين الطرفين محل الخلاف لكن هذا يطلب وقت جهد كبيرين . يتطلب أننا كلنا نرجع تاني نمسك حزمة الحطب صح ونفهم من أ ين تؤكل الكتف مش نقعد نحدف بعض بالطوب ونشنق نفسنا بالحبل اللي النظام سابه لينا- اقباط ومسلمين- يطول يطول يطول زي ما العملاق ذكي رستم عمل مع امال في فيلم" نهر الحب".
أما أنك بقى زهقان وتعبان وكفران وتعبت من الكلام فـتروح ترمي اخواتك المسلمين بانهم ارهابيين ومن تحت لتحت كدة كل شوية تفكرنا بالدموية اللي احنا فيها وبعبادتنا الغريبة المريبة وتعمم حاجات كده على كل المسلمين وانهم كلهم قاعديين وكلهم بن لادن في اللا شعور بتاعهم مش حلو يا صاحبي. ده انت فاضل تحمل المسلمين انهم هما اللي صلبوا المسيح وان بن لادن يبقى ابن اخت يهوذا الفتان !! وأما حد يحاول يناقشك أو يقول لك مش كدة يا فنان تقول بقر موااااااااااااع قلنا فيه اضطهاد مش عاجبك قلنا مش موافقين على اللي بيحصل لأ برضة, عاوز ايه طيب ؟ ندق صليب على ادينا علشان نعجب ؟

متعمد أنك تجرح في عقيدتنا و اسلامنا تلعب بالالفاظ زي ماانت عاوز وتقول فيه فرق بين الاسلام السياسي والاسلام نفسه وفرق بين الاسلام الأصولي والمسلمين وفيه فرق بين الاسلام كديانة وبين المسلمين لشي خيال يا ناس !!! وبعدين ترجع تاني تعمم في كلامك وتشبهنا كلنا باننا غوغاء و لهمج وبنهتف ونقول : بالروح بالدم نفديك يا اسلام مع ان ده مش بيحصل بشكل عام ده بيحصل من فئات معينة انت نفسك تعلمها قبلي .
.......
ثم ان ماطول عمر هتافات الكنيسة : " بالروح والدم نفديك يا صليب" ده انت حتى هتلاقي العيال بتوع الاخوان اللي انت ذاللنا وكاسر نفسنا بيهم لاطشين الهتاف من الكنيسة يا معلم : ايه يا عمونا ؟ الرحمة مش كدة ده انت حتى مستكتر علينا ان احنا نغضب شوف نغضب يا شيخ من الرسام الدنماركي بتاع الرسوم اياها !! لا وافقنا على انه يتقتل ولا عمرنا هنوافق بس انت حتى مستكتر ده علينا ومعتبرة فنان طب ايه ؟؟ بقى مين مضطهد مين يا مقدس ؟ الحاجة التانية المهمة اللي لازم تفهمها يا كبير ان ناس كتيرة بدأت تقلق من منهجك اللي اتغير ومن قناعاتك اللي اتلعب في أساساتها وبعدين مش فهمت يعني ايه اللي مايتغيرش يبقى أما لوح أو بقرة ؟ أو صاحب مصلحة اللي متأكدة منه رغم ان احنا ماتقابلناش قبل كدة أنك فعلا مش صاحب مصلحة وده اللي فعلا مزعلني عليك وعلى الحال اللي وصلت لها يعني لازم اتغير ما أرجع مصر اجازة اسبوعين واقول أنا بتخنق من كم القذارة اللي بشوفها في مصر واني اوف اوف ياي مش بستحمل وعاوزة أرجع النضافة ؟ شايم يا مان , سو باد والله مش بس أنا ده حصل قدامك وقدام الكل ان جالك رد مني ومن ناس تانية تقريبا بنفس الكلمات لا تعمم احكام ولا تقول ان الكل بيكره الكل مش طايق الاقباط الكل متضهد الاقباط الكل .... الكل... بلا بليه بلوه ... والمضحك أنك بعد ماقلت الكلمتين دول رجعت تقول التعميم شيء مقيت ونبي ده كلام يا عم الشيخ ؟
وبالنوسبة للناس البقر من وجهة نظرك يحبوا ينعروا ويقلوا لك مووووااااااع موااااااااا اع اصحى يا صاحبي يا افتراضي

Saturday, 27 November 2010

الحرية ليوسف شعبان


لماذا يوسف شعبان ؟
ما الجرم الذي ارتكبه ؟ كان يقوم بأداء وظيفته كمراسل لجريدة البديل الالكترونية فقامت الشرطة ب اعتقاله أثناء تغطيته
!!مظاهرة لأهالي منطقة «أبو سليمان» ضد إزالة منازلهم، وتلفيق تهمة حيازة المخدرات له
و بعد ان تمت تبرئته من تلك التهمة البلهاء استمر احتجازه ..
بل ان وزارة الداخلية اصدرت امرا بإعتقاله
رغم قرار النيابة بحفظ القضية التي قالت الشرطة إنها ألقت القبض عليه بسببها!!! جلاش طبعا
لماذا في هذا التوقيت ؟ لا هو تاجر مخدرات ولا هو ارهابي .. على اي اساس اصدر امر الاعتقال ؟؟
كل ذلك بسب انه قام بكشف قضايا تعذيب تحدث داخل سلخانات اقسام الاسكندرية
الدروس المستفادة :
عليك ان تكون مواطن "إمعة" تشاهد الظلم و تسكت عليه بل و تصف ما يحدث بانه صمام امان للبلد
و حماية لها من اعداء الوطن و لولا قبضة الداخلية لأصبحت البلد في خبر كان
قشطة جدا انتوا صح بس
افرجوا عن يوسف ... افرجوا عن يوسف


Thursday, 25 November 2010

قفلوا الميه وقطعوا النور

بعد الزيارة المكوكية لقطر ينجح الرجل في ترويض قناة الجزيرة لكن ماذا فعل مع ادارة فيسبوك لتمنع صفحة خالد سعيد

؟ قبل الانتخابات بثلاثة أيام ؟و كذلك صفحة رصد انتهاكات الانتخابات ؟

من مدونة جدلية .... محمد واكد

ماذا تفعل الأنظمة المزورة في يوم الانتخابات؟

[بطلجية في الصفوف الأولى أمام قوات الأمن لمنع ناخبي المعارضة من الوصول لصناديق الاقتراع -المصدر غير معروف] [بطلجية في الصفوف الأولى أمام قوات الأمن لمنع ناخبي المعارضة من الوصول لصناديق الاقتراع -المصدر غير معروف]
علمتنا التجارب التي مررنا بها، وكذلك تجارب الدول الأخرى، أن الأنظمة المستبدة عامة ما تتعامل مع يوم الانتخابات بشكل شبه نمطي. وأظنكم تعرفون جميعا جوهر هذا التعامل من واقع خبراتكم الطويلة به، والذي يعتمد على آليات تزوير محددة باتت مكررة مثل "اللبانة الممضوغجة،" مثل تسويد بطاقات الاقتراع، وتزوير بطاقات الانتخاب، وتقفيل الصناديق، والتلاعب بالنتائج، وغير ذلك مما تعرفونه جيدا.
لكن الأنظمة المزورة تواجه خطرين آخرين عليها أن تتعامل معاهما ببعض الحنكة ليس فقط في ذلك اليوم وإنما في الفترة السابقة عليه أيضا، وهما تجريس الإعلام للنظام والفعاليات الجماهيرية المناهضة له في الشارع. وتتعامل مع الخطر الأول بتشديد الرقابة على الإعلام حتى وإن تطلب ذلك إغلاق ٢٥ قناة تليفزيونية قبل الانتخابات بشهر كامل، وطرد رئيس تحرير صحيفة مستقلة ومحورية بعد شرائها من مالكها، وإيقاف عدد كبير من الإعلاميين، وعقد الإتفاقات مع القنوات الاقليمية التي تؤثر في الساحة المحلية بشكل مناهض للنظام--وكل ذلك لترتيب الساحة للتزوير بالطبع.
وبالنسبة للفعاليات الجماهيرية، تقوم هذه الأنظمة بزيادة جرعة البطش في يوم الإنتخابات وطوال الفترة السابقة عليه أيضا، وإن تطلب ذلك تلفيق قضايا مخدرات للنشطاء لتخويف الآخرين، ضرب المتظاهرين بالنار لقيامهم بما كان يمكن القيام به في فترة أخرى، إعتقال الالاف من مؤيدي مرشحي المعارضة وتجميد أموالهم وإغلاق محلاتهم، وإطلاق العنان للبلطجية والمسجلين خطر لتحجيم فعاليات مرشحي المعارضة في أثناء فترة الحملة الانتخابية وخاصة فيوم الانتخابات نفسه، وغير ذلك مما تعرفونه أيضا.
فكل هذا يحدث بوتيرة عالية منذ شهر تقريبا في مصرنا المحروسة من طرد إبراهيم عيسى من الدستور وأون تي في، إيقاف قناة أوربيت وإنهاء برنامج عمرو أديب، والتهديد بوقف برنامج العاشرة مساءا، وتلفيق قضية مخدرات للزميل يوسف شعبان، وإطلاق النار على مظاهرة الأقباط أمس مما أدى لمقتل رجل وإصابة العشرات (وهو ما يكشف حد الاستنفار الأمني الموجود بالبلد الآن لأن هذه المظاهرة كانت لتمر بدون قتلى في أي وقت آخر)، والإتفاق الأخير مع قناة الجزيرة الذي لم يحيدها في هذا الصراع فقط وإنما ضمها لصف النظام تقريبا، أو على الأقل ضمها لفترة محددة، وغير ذلك الكثير.
لكن يبقى خطر الفعاليات الجماهيرية وإمكانية أن تصل بشكل أو آخر لجمهور واسع عبر الإعلام البديل والإجتماعي، وهو نوع من التجريس لا يستطيع النظام المزور التعاطي معه رلا في يوم الإنتخابات نفسه. وهنا تقوم هذه الأنظمة ببعض الحيل النمطية أيضا لمواجهة النشطاء وإعلامهم البديل الذي أصبح السبيل الوحيد المتاح أمام نشطاء المعارضة الآن للتعبئة والتحريض ضد النظام المزور وتجريسه، بعد أن تقطعت بهم السبل الأخرى، منها:
١) اعتقال نشطاء المعارضة الرئيسية في الليلة السابقة على يوم الانتخابات، وخاصة من يلعبون دورا أساسيا في تعبئة الناس للذهاب للإقتراع.
٢) اعتقال النشطاء الرئيسيين المشاركين في عملية توثيق الانتخابات أو مراقبتها في الليلة السابقة على يوم الانتخابات، أو في الصباح الباكر في أثناء ذهابهم للمناطق المخصصة لهم، أو حتى تعطيلهم في ساعات ذروة العملية الانتخابية لمدة ساعات محددة بإختلاق الذرائع المناسبة لذلك.
٣) حجب أو تعطيل الدخول إلى المواقع الرئيسية والمدونات بشكل مفاجيء، ولا سيما الشبكات الاجتماعية التي تنقل الصور والفيديو ومواقع الأخبار المحلية المستقلة، وإذا ما تطلب الأمر يمكن تبطئة الانترنت كلها لمدة ساعات قليلة بشكل يثير أقل شكوك ممكنة، وهو ما حدث في أكثر من دولة مؤخرا.
٤) تعطيل خدمة الرسائل القصيرة بطريقة او اخرى وحجبها عن أفراد بعينهم لدرء قدراتها التعبوية في الساعات الحرجة، ويقال أن النظام المصري رتب لذلك بالفعل.
٥) إعاقة بعض خدمات الإنترنت عبر الهاتف النقال بطريقة او اخرى، وتخريب البريد الإلكتروني أو صفحات الفيس بوك أو التويتر لفئة مختارة من النشطاء عن طريق القرصنة أو ما شابه ذلك في يوم الإنتخابات.
٦) إرهاب الصحفيين ومراسلي التلفزيون في الشارع في أثناء تغطيتهم لأحداث اليوم ومصادرة الأشرطة منهم.
٧) تفريق كل الأفراد الذين يحاولون التجمع في الشارع بالقوة أو تعطيلهم طوال مدة الانتخاب إذا ما تطلب ذلك--أو حتى إعتقالهم إذا ما
تطلب الأمر ذلك.
٨) إيقاف كل من يحمل كاميرا في الشارع ومصادرتها منه، أو على الأقل التحفظ عليها حتى نهاية اليوم—نفس الشيء بالنسبة للأجهزة الإلكترونية الأخرى مثل أجهزة الكمبيوتر المحمولة والهواتف الذكية...
٩) تعطيل جميع الناخبين من الوصول إلى صناديق الاقتراع في المناطق التي تكون خسارة النظام بالثلاثة فيها مؤكدة عن طريق اللعب في
كثافة حركة المرور، أو تبطئة النقل العام، أو حتى بأسلوب "ما ينفعش تخش من هنا، لو سمحت لف من ورا" الخ.
١٠) وفي المناطق التي يكون الحزب المزور أكثر ثقة في إحتمال نجاحه يمكنه أن يكتفي بإيقاف ناخبي المعارضة فقط (بدلا من الكل) من الوصول لصناديق الاقتراع بأي وسيلة ضرورية، بما في ذلك إستخدام القوة الغاشمة، والسماح بوصول فقط لمن لديهم بطاقة عمل من مرشح الحزب الحاكم إلى الصناديق—وكما قلت في النقطة السابقة، يمكن تعطيل الكل عن الوصول في الحالات التي يتأكد فيها خسارة الحزب من أول اليوم.

١١) استخدام البلطجية لتخويف الناس الذين لا يحبذ إعتقالهم والإعتداء عليهم إذا تطلب الأمر.
السؤال الذي يفرض نفسه الآن هو ماذا ستفعل المعارضة حيال ذلك؟ وكيف سيواجه النشطاء سقوط بعض المواقع للقرصنة بشكل مفاجيء لدى بعض الناس في حين سيستطيع آخرون رؤيتها (على حسب الشركة)؟ أو أن يكتشف بعضهم أنهم لا يستقبلون رسائل الأس أم أس في حين يستقبلها آخرون، أو آنهم لا يستطيعون الدخول على الإيميل، إلخ؟ أو أن الإعلام العالمي والمستقل والأقليمي قرروا جميعا أن يدلسوا بما لم يكن بتوقعه أحد نظرا لحسابات معينة أكثر أهمية لهم؟ هل سيتعلم النشطاء طرق التعامل مع البروكسي سيرفر لأول مرة في حياتهم في هذا اليوم؟ وماذا نتعلم من أحداث الأمس: هل سقط موقع الدستور أمس لقرصنة وفديين كما يقال الآن، أم أن هناك أصابع أخرى تتدرب على دراسة ردود الأفعال على شيء ربما تحتاج إليه قريبا؟ ألم يحدث ذلك في وقت مشحون وتعبوي بما يعطي فرصة مثلى للتدريب ودراسة ردود الأفعال--وخاصة أن متابعي هذا الموقع هم من المجموعات التي سيحاول النظام إحتوائها في هذا اليوم؟ أم أن الموقع تعرض بالفعل لقرصنة من قبل الوفد كما يقولون وأن حدوث ذلك بعد نشره أول أخباره عن أحداث العمرانية بدقائق ما هو إلا صدفة؟
إن فرصة هذه الآليات في النجاح تكبر بقدر ما ينجح النظام في أخذ المعارضة على "خوانة،" وهو الفخ الذي تتقن المعارضة المصرية الوقوع فيه، فهي دائما غير مستعدة، ودائما ما تؤخذ على خوانة. وربما كان أفضل لنشطاء المعارضة الذين ينون التفاعل مع الانتخابات على الأرض أن يركزوا على التجريس فقط لا غير، لكنهم للأسف يظنون أنهم سيتمكنون من إنجاح مرشحين بعينهم في إنتخابات مزورة سلفا بالأساس، ويعضهم يظن أن للحظة الانتخابات قدرة في تعبئة الجماهير أكبر بكثير من طاقتها الحقيقية. لو كان التجريس هو هدفهم (وهو الهدف الواقعي الوحيد) لوجدتهم الآن مستعدين للتعامل مع هذه الاحتمالات (في حدود إمكانيتهم طبعا)، لكنهم لم يطوروا تصورات
وإمكانيات بديلة، ومثل هذه الإمكانيات لا تتبلور بين يوم وليلة.
تحديث: كتبت هذه المقالة منذ ثلاث ساعات تقريبا وفي خلال هذا الوقت القصير جدا قامت شركة فيس بوك بالفعل بإلغاء خاصية التدوين على صفحة "خالد سعيد" (والتي كانت تخدم ٠٠٣ ألف مشترك، وهو ما يعني أن أخبار التزوير كانت ستصل إلى ٠٠٣ الف مواطن عن طريق الإعلام البديل) وألغت كذلك الصفحة الخاصة "بوحدة الرصد الميداني" والتي كانت ترصد بالفعل إنتهاكات إنتخابات مجلس الشعب بدعوى إنتهاك شروط الخدمة وكلاهما من الصفحات المركزية في معركة يوم الأحد القادم. هذا يعني أن المعارضة فقدت أدوات إعلامية كانت تصل إلى ٠٠٣ ألف مواطن مرة واحدة، وأن عليها أن تبدأ في بناء هذه الأدوات التراكمية من جديد، وهو ما يعني بدوره أنها لن تستطيع الوصول لعشر هذا العدد قبل يوم الأحد القادم. لقد بدأو بالفعل في الهجوم ولديهم تظبيطات أكبر من إغلاق هذه الصفحات بكثير.

Thursday, 11 November 2010

سياسة الديك الرومي و الفيل البمبي


لم يفصح الرئيس الأمريكي الأسبق - جورج دابليو بوش- في مذكراته نوع الديك الرومي الذي على اساسه اتخذ الملك عبد الله
ملك السعودية قراره بعدم الرحيل من مزرعة المذكور آنفا
هل كان من فصيلة الديوك الرومي البيضاء الشهيرة في امريكا ام من فصيلة الديوك ذوات اللون الأسود
الموجودة في بلادنا العربية عارفينها ؟ اما كنا نقول للديك ابوك السقا مات يروح قايل كوركوركوركور فنفرح قوي
عن نفسي اعتقد ان الديك كان ابيض شاهق البياض و الا كيف تفائل الملك المفدى لمجرد روؤيته و اتخذ على عجالة قراره بعدم الرحيل.
هكذا تؤخذ القرارات في بلادنا العربية يا سادة
شارون يجتاح الضفة فيستشيط الأمير -الملك غضبا و يقرر الرحيل فإذا ببوش يتوصل الى الحل السحري و يأخذ الرجل في رحلة داخلية في مزرعته و ... انتوا عارفين الباقي بقى
........... ترى كم من الرحلات قطعها العزيز بوش مع قوادنا او قوادينا اختر ما شئت فا انا تعبت من اختيار الألقاب

تخيل مثلا لو كان بوش قد اخذ قائدنا في احدى رحلات ترويق المزاج ترى ما الذي كان سيشد انتباهه ؟ انا اتخيل الموقف بأن خروف ابيض ذو قرون ملفوفة لفة و نص سيتوقف فجأتن- برضه -امام العربة الجيب ليخبط بوش كفا بكف و يفتح فاه قائلا : اوه ماي جود هل رأيت هذا يا دولة الرئيس ؟ هل شاهدت ماحدث فيجيب دولته : سبحان الله
دي علامة ربانية هات يا معلم ملفات التطبيع انجزززز ... فيمأمأ الخروف ف يتنطط بوش و يقوله: شايف اللي انا شايفه ؟ يا هرابي ( خرابي بالإنجليزي)...فيجيب القائد: هات ياض مشروع تصدير العاز مستنين ايه ؟
الخروف في الخلفية نازل مأمأة و مفيش فايدة ..... هات يابني هات فين اتفاقية التجارة المشتركة ؟ الخروف زهق من المأمأة بقى يكاكي و برضه مفيش فايدة لا حياة لمن تكاكي
............
كم من رحلة قام بها بوش لتمرير خطة ما او- لتهدئة - حاكم عربي لدينا تعالى نتخيل سويا ما سوف يحدث
مثلا مثلا اذا اخذ الأخ العقيد الشقيق الرفيق ملك الملوك الحلو الفزلوك اكيد كانا سيعتليا صهوتي جوادين فالرجل يعشق ادوار الكاوبوي مولا ... فيفاجأ الأخ القائد مثلا بفيل بمبي فيتوقف و ينظر للسماء لحظات و يستغرقه النظر امدا بعيدا ( فيلسوف و كدهوان) ثم فجأة ينهض من تأملاته و يقول لبوش و الله هذا نذير خير يا غالي اتصل بالعزيز بلير و اسأله كم يحتاج تعويضات لضحايا لوكيربي ... و هدية مني لك انت يا امير يا ابن الأمرة هذا مشروع تصنيع الأسلحة البيولوجية او الكيمياؤية
ايا كانت و الله مادري و ايشو اللي الشباب بيصنعوه هدية فوق البيعة
.............
اما الملك الصغيور الحلو الأمور الحيلة الفرفور ابو لكنة انجليزية لذوذة كان سيأخذه في نزهة بالهليكوبتر يا لالالي ماهو طالع لباباه بيموت في الطيارات فإذا به يشاهد من اعلى المزرعة نسر امريكي ماركة ايجيل يمر من امام لوحة القيادة فيقول لبوش بانكليزية لندنية :
OH MR. president look!! ! an eagel!!! this is a good omen we have to start forward the bloody cooperation between us and our beloved Israel .

الوضع سيكون مختلف قليلا مع ابو مازن فالرجل يمضي بلا تعب ولا يتضرر ولا يغضب او يشعر بأي اهانة هو اصلا ليس بحاجة الى فأل حسن او غيره الرجل جاهز كعادة الموظفين النظاميين يحتفظ بقلم في جيب الجاكته ليمضي على اي شيئ و كل شيئ

هكذا تدار الأمور هكذا تتخذ القرارات

ديك رومي... فيومي... نملة بكر ... خروف تم اخصائه بطة عانس لا يهم
ما يهم حقا ان حكام البيت الأبيض يعلمون تمام العلم كيف يفكر حكامنا فيفتعلون الفأل الحسن وراء الفأل

و يمضي قيس
سؤال برئ هي ايه الأشياء الأخرى اللي كان يقصدها بوشو في: " كان الأمير بردائه الواسع وأشياء أخرى يقفز لركوب سيارة فورد نقل اف ـ 250.
اذا عرفت الإجابة.....>>>>> خليها بينا

Tuesday, 2 November 2010

الخلطة السحرية للتورته المصرية


مع اقتراب رأس السنة الميلادية يتبادر الى ذهني سريعا كيف كان يحتفل المصريون المصريون جميعا او قل السواد الأعظم برأس السنة و ذلك بعمل حلوى و تورته بسيطة غير مكلفة و مبحجة للجميع فكنا نتسابق لنحكي ماما عملت ايه او ماما هاتعمل ايه لليلة رأس السنة او الكريسماس كنت اجلس بجوار امي في المطبخ انتظر خروج الكيك و رائحة الفانيلا داخل الفرن تثير اعصاب اجدعها شيف لكن بعد الهجمة السلفية الشرسة التي لم يسبق لها مثيل على مصر جعلت حتى قولة: كل سنة و انت طيب من طفل لطفل لا يعلم اي شيئ مما يجري حوله اصبحت حرااااام حرااام حراام بإجماع ائمة الفضائيات و ان سانتا كلوز او بابا نويل بدعة فأصبحت عادة صنع الكيك و التورته و الحلوى البسيطة من مواضع الشبهات فأقلعت كثير من الأسر عن هذه العادة الجميلة و اختفت كما اختفت كثير من الحاجات الحلوة في بلدنا- الحلوة- برضه

و بناء عليه قررت انا اقدم هدية لكل المصريين بعمل تورتة رأس السنة كما اعتادت اسرتي ان تسميها و اليكم المقادير و الطريقة।
المقادير
٣ اكواب دقيق" شعبي" جميع الاستعمالات لت و عجن و ضرب و مرمطه و سحل ماركة طب و انا مالي يعني انا اللي هاصلح الكون لوحدي ......
.
٧١ ملعقة باكينج بودر لإننا محتاجين مواد رافعة كتييير جدا لأن " دقيق الشعب "نااااايم و محتاج روافع كتيرة تفوقه و ترفع روحه المعدنية .. بلاش ونبي باكينج بودر من نوعية البرادعي او الجمعية الوطنية لأنها "بتكتم "دقيق الشعب و بتهبطه ده غير إن الشعب اساسا هابط لوحده مش محتاج.... ملحوظة هامة جدا قوي خالص : تجنبي سيدتي باكينج بودر ماركة النخبة لأن باكينج بودر النخبة "بينفخ "على الفاضي او بيطلع بيطلع و ينزل على مفيش
نصف ملعقة "ملح الأرض" ماركة شباب مصر اللي زي الورد و ضايع مش لاقي حد يطبطب عليه و يفهمه مش لاقي غير كل اللي ياخده و يستغله و ينزل يعمل بيه شو اعلامي و بعدين يرميه و يقول له ملحك ناقص ملح !!!!!اذا كان هو الملح اصلا يا ابن التيتا... ما علينا

ثلاث ارباع كوب زبدة بحرارة الغرفة و الغرفة الحقيقة بقت حر فشخ لدرجة محدش مستحمل اخوه و كله سايح على كله زي ما احنا عارفين فخدي بالك يا سيدتي
ابقي شغلي التكييف.

................
١٢ بيضه و ارجوكي اهم شيئ لنجاح اي كيكة اسفنجية البييييييييض ننصح بإستخدام بيض مفرخة" اباكمال" او "عبكمال "لأنه اثبت نجاح غير مسبوق في عالم مزارع البيييض الممشش فانيلا بقى على قد ما تقدروا علشان تغطي على ريحة مامة بيض اباكمال لأن ريحته لا يمكن بأي حال من الأحوال تغطيتها لأن بيض اباكمال بيض فاسد و مغشوش للأسف و انا لازم اقول لك كده لأن الأمانة المهنية و ضميري الشمبونجي مش مطاوعني ابوظ لك التورتة. بلاش بيض ابو كمال هاتو بيض القط اكسيلانت ناوناو او اقول لكوا حاجة اظرف سمعتوا عن البيض ابو صفار و ابو صفارين تيب سمعتوا عن البيض ابو تلات صفارات؟
ايوه فيه فيه بيض مزارع محمد و علي و ابراهيم هاتوه وادعوا لي :❊_❊


١ كوب حليب كامل الدسم من عند امانة السياسات ده الدسم كله يعني

كوب ونصف سكر
من مصانع اللزج لزاجة الجلوكوز ابو ضحكة صفرا مدد يا بدوي.......


الطريقة:
ضعي جميع المكونات على بعضها و قلبيها بالراحة او حطيها في الخلاط....اقول لك بلاش الخلاط انت بس سيبي المقادير كلها على بعض وهي عارفة حتعمل ايه بالظبط كل واحد عارف دوره و متمرن عليه كويس ملحوظة كمان :يمكن استعمال محسنات خبز ماركة منى الشاذلي علشان الكيكة تعمل منظر لو الشاذلي مش متوفرة ممكن محسنات معتز بس لو معدتك جامدة و تستحمل المحسنات التقيلة معرفش نظام محسنات عمرو اديب مسموح بيه اليومين دول ولا صلاحيته انتهت و معادش يجي منه كان نفسي اخدم و الله ।
ضعي كل المقادير في صينية مقاس ٢٢ تنبيه هام يجب ان تشعلي نار الفرن من مدة لا تقل عن كام شهركده خاصة مع اقتراب موسم الإنتخابات هايساعدك في سرعة التسخين و الإشتعال و الولعة التمام" كاميليا" و اخواتها دي بتسخن و مابتبردش ابداااااا و متخافيش بالنسبة للداخلية بتسيب النوع ده من النيران لأنها بتعتبرها- نيران صديقة- و بتصب في مصلحتها فا مفيش قلق او تحرش بيسيبوها تشعلل عالآخر و مابيعملوش حتى كاردون زي اللي بيتكردن على بتوع الحد الأدنى للأجور او موظفين مراكز المعلومات لا بيسيبوهم براحتهم خالص।
ضعي الصينية داخل الفرن المولع بنار الفتنة الطائفية و زغرطي يا انشرااااااح
للتزيين :
كريز مصطفى الفقي او دكتور عبد المنعم سعيد ايهما اقرب لك - كريم شانتيه "مضروب" (ماركة البابا و الشيخ ) من انتاج مصانع الوحدة الوطنية الكاذبة........ شوكولاه من النوع الردئ ننصح باستعمال شوكولاه احزاب المعارضة حيث انها للزينة فقط و بصراحة بقى وجودها زي عدمه بس اهي منظر و خلاص علشان التورتة تعمل منظر।
بلاللين بقے على قد ما تقدري نفخ حتى الصباح الباكر مع تحيات الإدارة العامة للشوؤن المعنوية قلم وزارة الداخلية فرع امن العادلي و شركاه ।
بعد ما تخلصي اطلعي سلم العمارة فوق السطوح و بكل ما اوتيتي من قوة ارمي التورتة.....
و انزلي جيبي تورتاية من لابوار بلاش وجع
قلب و تعب عالفاضي

Sunday, 24 October 2010

القطيع

عقدت اتفاقا بيني و بين نفسي بعد ان اخذت صدمة اقالة ابراهيم عيسى وقتها معي و عاد لي ثباتي الإنفعالي و النفسي و العقلي بأن جريدة الدستور قد انتهت بمجرد توقيع العقد مع السيد البدوي شحاتة
و اتفقنا -انا و نفسي برضه- او هكذا هيأ لي خيالي المريض ان ابراهيم عيسى كان يعلم ان بقاؤه على قمة رئاسة التحرير كان مجرد مسألة وقت ليس إلا، فلو كان ابراهيم عيسى يعتقد للحظة انه سيبقى على رأس الجريدة بعد البيع للبدوي و شركاه فأنا مؤمنة كل الإيمان بأني ملكة انجلترا القادمة او مدربةمانشستر يونايتد للموسم المقبل

لماذا يعتصم صحفيو الدستور ؟
هل من اجل السياسة التحريرية للجريدة و الحفاظ و الإبقاء عليها و على سقف الحرية الذي اعتادوا عليه ؟ او بمعنى اكثر عدلا الذي عودهم عليه قائد الكتيبة و كفله لهم الكوماندانت عيسى؟

اذا كانت الإجابة من اجل عيسى فهم اول من يعلم ان عودته - اي عيسى- ليست شبه مستحيلة بل مستحيلة عند اكثر المهنيين تفاؤلا .
اما اذا كانت الإجابة ان هذا الإعتصام جاء من اجل الحفاظ على حقوقهم و عدم المساس بسقف الحرية المنشود و من اجل سياسة تحريرية شفافة واضحة خاصة بعد الخروج الدراماتيكي للمارشال و من اجل تمكين قانون او ميثاق الضمير فعليهم ان يتخلواعن تلك النزعة المسيطرة على اجواء الإعتصام فكل من رأى الصورة من بعيد رأى انه اعتصام" علشان الرجل ابو شنب "
يعلم الله اني احب ابراهيم عيسى و اقدره و احترمه و احسده على شجاعته و نزاهتة و حرفيه و مهنيته و سلطاته و بابا غنوجه ، لكن ليس معنى هذا ان يتم اختزال القضية في شخص ابراهيم عيسى
تماما كما كنا نربط ربطا خاطئ ما بين التغيير و شخص الدكتور محمد البرادعي ، المهم ان يحدث التغيير ايا كان من يقود الحافلة المهم ان تتحرك في الإتجاه الصحيح
نقطة اخرى في رأيي المتواضع جدا اثارتها قضية الدستور : سياسة القطيع لماذا يريد كل من له رأي ان يجبر الآخرين على اعتناق نفس الرأي و جرهم إليه جرا و كأنه هو وحده من وصل إلى قلب الحكمة ؟ و انت ان خالفت هذا الرأي المقدس تقديس بنو اسرائيل للبقرة اذا فأنت من الهالكين لا محالة......

تماما مثل الشخص الذي يجد نفسه في مظاهرة و عليه ان يهتف كما تهتف الجموع و الا كان خائنا عميلا فنجده رغما عن انفه
يهتف بكل حماسة مع من يهتفون: يسقط الأستقلال يسقط الإستقلال !! ا
ببساطة أرى أن رأيي خطأ يحتمل الصواب و رأي غيري صواب يحتمل الخطأ
المهم ان نصل لحلول عملية و حتى لا يساء فهم كلمة "عملية " نظرا لأجواء التخوين المنتشرة في الأجواء كانتشار التهاب الملتحمة في دلتا مصر ، اقصد بها قابلية التطبيق على ارض الواقع و ليس انحناء لإعصار البدوي كارولينا

لا يجب ان ننساق انسياق القطيع وراء الراعي فربما كان لإحدى الغنمات وجهة اخرى ستسلكها وتصل بها الى المرج الأخضر دون عناء و مشقة كبيرين ، لماذا لا نعطي لتلك الغنمة الفرصة لتعبر عما تراه من وجهة نظرها انه صواب؟


اخر شيئ اود اضافته في هذا الموضوع : لا ينبغي بأي شكل من الأشكال ان نلقي الإتهامات الخائبة جزافا على كل من سولت له نفسه نقد الوضع الحالي او نقد ابراهيم عيسى و- كأن عيسى اله غير قابل للنقد- من وجهة نظر مختلفة عما نريد ان نسمعه و نتهم القاصي و الداني اذا كان مختلفا على الرؤية و الحل بأنه غيران او حاقد او مدعي كاذب او شامتا شريرا لا انكر ان هناك اقلاما تكتب شيئ و تقصد به شيئ اخر تماما لكن كما ان ليس كل ما يلمع ذهبا فليس كل من على الساحة بهذه الدرجة من الرخص والسفالة هناك اقلاما شريفة لكنها ترى الموضوع و تنظر للقضية من منظور اخر علينا ان نكون اكثر استيعابا له و الماما به و مناقشته لا ان نتهمها بالباطل و التشكيك في ما كل ما يكتب جملة و تفصيلا
اخر كلام:
جميعا رأينا احتفالية الدستور الأخيرة التي كان "ضيف الشرف " و نجم النجوم فيها بلا منازع هو ابراهيم عيسى و الجميع قد جاؤا كتابا و مفكرين و اصحاب رأي لمناصرة اخوهم و" حبيبهم " عيسى العوام شيئ رائع انا نفسي استمتعت جدا بكلمته تحسها كلمة كده مليانة حمس لكن ما هي الرؤية التي قدمها ما هي الحلول التي طرحها؟
الم يكن من الأروع أن نشاهد باقي الأطياف الأخرى المحبة او الكارهة المختلفة او الموافقة على شخص عيسى و قد جاءت للإلتفاف حول صحفيي الدستور و مناصرتهم في وقفتهم التي يمكن ان تصبح وقفة الجميع من اجل الحق و ليس من اجل عيون ابراهيم عيسى
هل وصلت الفكرة ؟

ااخر كلمة و الله ، اعلم ان مدونتي على قدي و ليست ذات شهرة ، يعلم الله اني لا اسعى لأي شئ الا التفكير بصوت عالي و ابداء وجهة نظر متواضعة ليقرأها قرائي الخمسة المعدودون على اصابع اليد الواحدة


Wednesday, 20 October 2010

ساعي البريد



اجلس خلف نافذتي اطالع وجه القمر فيتبسم لي

ابتسامة صافية تروق لي أعلمها و يعلمها القمر

حينها ادرك انك قد ارسلت لي تحية المساء مغلفة بمشاعر عذبة رقيقة رقة غلاف الطل على مروج الحقول البعيدة صباح يوم
دافئ


ابادله الإبتسام أحاول ان أرد التحية بأبسط منها فأنا لا تسعفني كل حواسي مجتمعة ان ترد شيئا تفعله انت لي


صغر هذا الشيئ او كبر تقبلها مني و كفى .
.......
انام ملء جفوني
اصحو سعيدة مرحة فرحة مشرقة كشمس اكتوبر الرقيقة تشرق بسيطة حنونة بلا صخب أو ضجة تنشر الدفء في صمت
و ترحل .
أضحك لكل شيئ تقابله عيناي و أشعر ان كل الأشياء تبادلني الإبتسام و الفرح و الضحك هكذا دون اتفاق مسبق بيننا
حتى فرشاة شعري اتخيلها تبادلني تحية الصباح و هي تتخلل خصلاته
عباطيطو انا اعلم ذلك
....

اخرج سريعا أقبل كل ما تقع عليه عيناي من اوراق شجر و فراشات و زهور برية و

و سناجب صغيرة خرجت كلها لتعلن قدوم يوم جديد للحياة .
حتى وريقات الخريف الصفراء أخطو عليها مشفقة و معتذرة و حزينة عليها لأنها لن تطالع وجهك في الربيع القادم

أقبل السيارات و السماء و الوان اشاراة المرور اقبل السحاب

اتبسم في وجه الجميع من اعرف و من لا اعرف
اشعر بالطمأنينة و السكينة فقط لأنك هناك تبعث لي تحية الصباح
احيا على امل وحيد : في المساء سترسل لي القمر يبلغني تحية المساء لأحيا من جديد



و الآن تأخذ كل ذلك و ترحل؟

ترى لمن غيري سيعمل القمر ساعي بريد؟
ما اقساك
...

Sunday, 10 October 2010

بابا سيدو عنده حمار.... ايا ايا او

الحكاية واضحة وضوح شمس اغسطس
بعد ان نجح "الاكسيلانس" سيد البدوي في انتخابات حزب الوفد، بدأ يضم شخصيات كتيرة من نجوم المجتمع و رجال السياسة و الفن و الرياضة ، لدرجة ان سيدة كوبارة زي سميرة احمد صدقت نفسها فعلا انها بقت سياسية قوية الشكيمة و بتفكر تترشح في انتخابات مجلس الشعب القادمة..
.بل و وصل الأمر الى ملاعب كرة القدم و رأينا جميعا "منص " او محمد عبد المنصف حارس مرمى نادي الزمالك يوقع
عقد -احتراف - قصدي انضمام لمنتخب الوفد تحت السن
حتى اننا على تويتر من كثرة النجوم اللامعة المنضمة حديثا للوفد اعتقدنا ان صفوت بيك ممكن يوقع او ابو الهول يطالب بتجديد و نقل عقد احترافة من سقارة لمقر حزب الوفد.

بعد ذلك بوقت ليس بطويل بدأ الحديث عن بيع جريدةالدستور

توجس الجميع خيفة و تحسسوا شنباتهم
و صدق ما كان من وقت قصير جدا مجرد شائعات و تم التحقق من الخبر
الدكتور سيد البدوي يشتري جريدة الدستور
الخبر يبدو غريبا .. الرجل يلعب بكل احترافية في ميدان الأدوية و بسم الله ما شاء الله معدي

ايه يخليه يشتري جرنال ؟
و بد!ت الأسئلة
ليه ... مين .. فين و ازاي
طيب و سقف الحرية ؟ طيب و النقد ؟.. طيب و ابو خليل ؟؟
كلها اسئلة فكر فيها الجميع لم يفكر احد في سؤال اكثر اهمية
لماذا وافق عصام اسماعيل فهمي و هو الناشر المحترم والرجل ذو الخبرة التي لا ينكرها عليه احد في مجال النشر و الصحافة على البيع للدكتور السيد البدوي رئيس حزب الوفد و أحد تايكونات صناعة او تجارة الدواء اختر ما شئت - في مصر ؟

الدستور ضاعت من اول ما فكر عصام اسماعيل فهمي انه يبيعها
و السلام
لم ينتقي من يبيع له بعناية
اذكر جدي عندما اراد ان يبيع عفوا _حمارا_ لديه في الغيط كان مصرا اصرارا عظيما على انتقاء الشاري و على ان يكون الشاري فلاح يعزق الأرض و يفلحها .. كان معترض جدا ان عربجي يشتري الحمار لأن الحمار هيتبهدل و مش واخد على شغل الأسواق بدا لي جدي و كأنه يبيع اجدعها حصان عربي اصيل سيلعب في الدربي
سألته :ليه يا" بابا سيدو" هكذا كنت اناديه ليه بتسأل عن اللي هيشتريه كده بكل هذا الحرص ؟
فا اجابني : حتى لا اظلم الحمار ولا يحاسبني الله على ما فعلته به
فهو كائن اعجم لا حول له و لا قوة
ارجو الا تتركوا الموضوع بالكامل و تستنكرون علي مقارنة الجريدة بالحمار
فهذا ما يحضرني الان
لم يكلف عصام اسماعيل فهمي نفسه بالاهتمام او السؤال عن من سيشتريها
و اقنع نفسه ظلما او اجتهادا او و هو مغمض عينه و قافل على ضميره الباب ان السيد البدوي سيراعي ربنا في ابنه اللذي تنازل له عنه بغرابة شديدة و ب اريحية اشد غرابة
كذلك يسأل عن اثم البيع ابراهيم عيسى نفسه ، لانه كرجل صحفي متمرمط صحافة يعلم علم اليقين ماذا يعني شراء البدوي لجريدة الدستور . وقد حاول هو الاخر-عيسى- بمقال كان الهدف منه طمأنة رجل الشارع العادي الى ان السياسة التحريرية للجريدة ستبقى كما هي و لن تتغير قيد انملة.. الواقع ان المقال الذي كتبه ابراهيم عيسى كان يريد طمأنة نفسه هو أولا به و ليس رجل الشارع العادي ابن البلد اللي فهمها من اول ما سمع اسم المشتري اصلا
لست هنا لأعتب على احد او اؤنب احدا فمن اكون اصلا لأفعل هذا
كل الحكاية اني تفاچأت بكم الهلع و الرعب و عدم التصديق و ضرب دماغاتنا في الحيط و كأنها مفاجأة لم نكن ابدا جدا قوي خالص ان احنا نتوقعها، او نتوقع ما فعله البدوي و شركاه من اقصاء مخزي لعيسى
لأن الموضوع لا يحتاج لكل هذا. المسألة كانت مسألة وقت لا اكثر و لا اقل
.و لا ينكر عيسى نفسه ان وجوده من عدمه اصبح مسألة وقت لا غير
.و حسنا فعل البدوي اختار" البيرفيكت تايمينج " قبل انتخابات المجلس الموقر ب فترة قصيرة جدا
من قال ان السيد البدوي لعبها بغباء سياسي اقول له :عفوا احنا الأغبياء الرجل جاء كاشفا كل اوراق لعبه
لعب على الترابيزة مش من تحت و كله على عينك يا تاجر
احنا بس اللي طيبين و اولاد حلال
شعار المرحلة : اللعب على المكشوف

Sunday, 12 September 2010

افرجوا عن طل


طل الملوحي لم تعقد الصفقات مع الصهاينة
لم تعرقل جهود سلالة الاسد لتحرير الجولان
قالت كلمة حق ارادت بها حق
فكان جزاؤها الاختفاء القسري
في سجون رئيس بالصدفة و الوراثة
تعاطف مع طل
قالت المنظمـة العربيـة لحقـوق الإنسـان في سوريا أن جهاز أمن الدولة استدعى بتاريخ 27/12/2009 الآنسة

طل بنت دوسر الملوحي لسؤالها عن مقال كانت كتبته ووزعته على الإنترنت ، وأضافت المنظمة في بيان ورد الى المرصد السوري "بعد أيام من استدعائها حضر إلى منزلها عدد من عناصر الجهاز المذكور وأخذوا جهاز الحاسوب الخاص بها وكل ما يتعلق بذلك ، ومنذ ذلك التاريخ وبعد مرور أكثر من شهرين لم تعد إلى بيتها وذويها ، على الرغم من مراجعة أهلها للجهاز المذكور عدة مرات دون جدوى" .

جدير بالذكر ان المدونة الشابة طل الملوحي من مواليد مدينة حمص عام 1991 أي لم تبلغ العشرين من عمرها وهي تحضر لتقديم فحوص الشهادة الثانوية وتعتبر من المتميزات في دراستها ومعلوماتها وشدة ذكائها وقد بدأت بكتابة الشعر والمقالات منذ عدة سنوات وجميع من اطلع على كتاباتها كان يتوقع بأنها تتعدى الأربعين عاما للأفكار والآراء التي كانت تطرحها وحكمة مناقشتها للكثير من الأمور العامة والجرأة التي تتحلى بها .

ورأت المنظمــة العربية لحقوق الانسان ضرورة الإفراج الفوري عن طل الملوحي وعودتها إلى منزلها وأهلها للاستمرار في استعدادها لتقديم فحوص الثانوية التي أضحت قريبة ( إن كانت بعد هذا الاعتقال لا تزال تتمتع بنفسية وصحة تؤهلها لذلك ) واعتبرت هذا الاعتقال غير مبرر لأي سبب كان .

المصدر:المرصد السوري








المشاركون في الحملة

مدونة حكايات مصرية

مدونة النمر الاسود

مدونة طراطيش كلام

مدونة جبهة التهييس الشعبية

مدونة قصص من حياتي

مدونة رسائل البحر

مدونة انسان مصري

مدونة ميت

مدونة دهوم

مدونة ريم

Sarya's wire، مدونة

مدونة ما لقتلهاش عنوان

مدونة محمود صابر

مدونة أنا و هؤلاء

مدونة ثورة مصر

مدونة هرش مخ

مدونة ضرب نار

مدونة من النهاردة مفيش حكومة

مدونة تأملاتي

Khaled fahmy مدونة

مدونة المحلة -مصر

KARABEESHمدونة

Egyptian Chronicals مدونة

Mezology's Blog

مدونة كلام مجانين

مدونة المرفأ

مدونة كشف


Sunday, 29 August 2010

إحالة العمال للمحاكم العسكرية موت وخراب ديار

للتوقيع  على البيان هنا من فضلك

لا تكتفي الدولة بتشريد وإذلال وقتل العمال بدم بارد نتيجة سياساتها المعادية لهم، بل تسعى أيضا لإسكات أصواتهم باستخدام أكثر الأساليب قهرا بتقديمهم للمحاكمة العسكرية التي لا يتوافر بها أي ضمانات أو حقوق دفاع.

يحاكم الآن ثمانية عمال من مصنع 99 الحربي (شركة حلوان للصناعات الهندسية) أمام المحكمة العسكرية بتهم إفشاء أسرار عسكرية والامتناع عن العمل والاعتداء بالضرب على اللواء محمد أمين رئيس مجلس إدارة الشركة، كان العمال الثمانية قد تم القبض عليهم مع 17 آخرين من زملائهم عقب اعتصام عمال المصنع يوم 3 أغسطس الجارى احتجاجا على انفجار أنبوبة نيتروجين ( غلاية ) داخل المصنع مما أدى إلى وفاة العامل أحمد عبد الهادي(37 عاما) وإصابة ستة عمال آخرين بجروح.

وعلى أثر تلك الاحتجاجات سعت أجهزةالدولة إلى ترهيب العمال وتأديبهم لتجرأهم على الاحتجاج فاتخذت ضد 25 عامل إجراءات تحقيق تلاها إحالة 8 من عمال المصنع إلى النيابة العسكرية تمهيدا لتقديمهم لمحاكمة عسكرية رغم أنهم عمال مدنين ورغم أن الأمر يتعلق بنزاع عمل تحكمه القوانين العادية.

وقامت النيابة العسكرية يوم السبت الموافق 14 أغسطس بحبسهم أربعة أيام على ذمة التحقيقات ثم تجديد حبسهم مرة أخرى يوم الثلاثاء الماضى، ثم تحويلهم للمحكمةالعسكرية التى بدأت أولى جلساتها الأحد 22 أغسطس ليتم تأجيل المحاكمة إلى الأربعاءالمقبل، كما رفضت النيابة العسكرية إعطاء المحامين صورةملف القضية للإطلاع عليه، وتحددت جلسة مفاجئه سريعة للمحاكمة.

وبالرغم من ادعاء وزيرة القوى العاملة عائشة عبد الهادي دائما في جميع المحافل بأنها تقف بجانب حقوق العمال، إلاأنها لم تحرك ساكنا إذاء ما يحدث للعمال، هذا بالإضافة للصمت المعهود من اتحاد عمال مصر و تقاعصه عن الدفاع عن حقوق العمال والتصدي لما يحدث لهم من انتهاكات.

ونعلن نحن المتضامنين مع العمال رفضنا لتقديم عمال مدنيين لمحاكمة عسكرية، وتطالب بإحالة القضية للقضاء العادي، وتطالب أيضا بمحاكمة المسؤلين عن موت العامل ومحاكمة إدارة المصنع التي تسببت في أكثر من انفجار وإصابات ووفيات بين العمال بسبب الإهمال، ونحذر أن تكون المحاكمة صورية وحكمها جاهز سلفا، ونعلن بدأ حملة تشهير واسعة محليا ودوليا ضد المسؤلين عن تلك المذبحة.
--------


ونرجوا من الجميع نشر البيان في كل المدونات
لمشاركون في الحملة
me myself and I
ماحدش فاهم
جنين
دهووم
انسانة
طراطيش
غريب
ياباني
ميزو
ثورة مصر
صرير قلم
ادهم
مدونة شاب مصري
الحلم العربي
رسائل البحر
أنا وهؤلاء
ايجي فويس
مدونة دودا
مصري

تأملاتي
مصري في فرنسا
مركز الدراسات الاشتراكية
تضامن
المنتدى النقابي الحر
اخوان اون لاين (اياد جاي؟ :)
هرش مخ

حكايات مصرية
كومة ورق 
مصر الحرة
Mostahfazana 
 

Monday, 16 August 2010

في المسألةالتحتية

صباح الندى
وكل سنة وانتو بالف خير وهنا
ورمضان كريم الحقيقة رمضان طلع كريم قوي جدا خااالص

بغض النظر عن نوع الكرم ده و بغض النظر برضه ان التلفزيون المصري انتج مسلسلات وبرامج كوميدية بمبالغ تربو على المليار جنيه
أي والله حوالي ثلاث أرْباع المليار جنيه مصري
علشان اليمين بس -
دول كانو مثلا -التلات تربع مليار - لو كانوا اتصرفوا على البنية التحتيه اللي بقت فعلا اسم على مسمى تحتيه آخر حجم
تحت تحت البدروم البدروم لو كانوا صرفوا نص المبلغ على "الموكوسة التحتيه" اللي كل ماالقيادة تتكلم تعايرنا بيها
وتقول البنية التحتيه
أنا بتاع البنية التحتيه
أنا البنية والبنية أنا
أو من نوع : أنا البنية التحتيه انت مين؟
أو مثلا بكره تشوف يا ناكر خيري بنيتي من بنية غيري
أو .....:
قارنوا بين بنيتي التحتيه وبنية اللي قبلي
وشوفوا بنية من أحلى
وكلام كتير جدا عن البنية

ده طلع ان فعلا ان دي مدرسة سياسية جديدة ..ولها خططها ومريديها وعباقرتها خطط مدروسه
وسياسات- تحتيه برضه - مرسومه بدقة وعناية فائقتين
آه صدقوني طيب خد عندك
مثلا خطة الحائط" التحتي " بينا وبين قطاع غزة تحيته دي ولا مش تحتيه ؟ انطق
.....
خطط وزارة التعليم العالي والتعليم الواطي اصدق كلمة تتقال عليها خطط تحتيه
لانها بتصر وتلح اصرارا انه المعلم يبقى " تحت" أمر الطالب و خط الفقر في نفس ذات الوقت
بلاش دي مبنى اللهم احفظنا
في مدينة نصر
لأ مش سيتي ستارز يا خفة :D

كل الناس اللي دخلته - مبنى اللهم احفظنا - علشان تشرب كبوتشينوا في خدمة الكوفي شوب اللي هناك
"اللي وصفها المؤرخخخخخ الصاعد بسرعة الصاروخ وحيد حامد انها خدمة " اربع نجوم " كل الناس اجمعت انهم وهما داخلين الميكروباص بينحدر بيهم قوي" لتحت
تحتي ده ولا مش تحتي ؟
أما تدخل مثلا مستشفى حكومي وابنك على ايدك وبيحاول يتمسك بالحياه- على ايه مش عارفة- وتقول لهم دكتور يا عالم موظف الاستقبال بيقولك إيه ؟ هـا بيقول إيه ؟؟ ماتنطق بيقولك ايه ؟
"ايوه اسم الله عليك بيقولك وهو مكشر وقرفان منك ومن ابنك ومن نفسه ومن كل حاجة : أنزل ادفع تأمين:" تحت "
بلاش دي ودي وده...... نهر النيل اللي مش عارفين ايه مصيره لحد دلوقت مجراه مثلا من تحت لفوق
مش من فوج لتحت

ومن ساعة ماالقيادة استلمت والتاريخ المصري المعاصر انقسم الى عهدين :عهد ماقبل البنية وعهد مابعد البنية

مش هتكلم عن مسلسل الجماعةلانه اخد نصيبه وزيادة في النقد بس الصراحة بغض النظر عن الهراء اللي بيعرضه والترجيع اللي كتبه وحيد حامد فنيات المسلسل من اضاءة وتصوير تحفة
االصدفة وحدها خلتني وأنا بحاول اشوف برامج إيه دي اللي اتصرف عليها كل ده برنامج اسمه الشيكروباص
اصلا مش بحب النوع ده من الضحك على الناس والاستخفاف بعقولهم والتريقة عليه ووضعهم في موقف اقل مايقال عليها انها واطيه رجعنا تاني لتحت - واجبار الناس بطريقة ملتوية انهم يذيعوا حاجة كل الناس أما هايشفوها هيضحكوا عليها
ناهيك اصلا عن ان تسعة وتسعين وتسعة من عشرة مش غريبة عليك النسبة دي صح :
ناهيك اصلا عن وجود شبهة تواطيء بين المخرج والبني ادم اللي المفروض هيقع في الفخ وبيبقى شكله واضح جدا وهومبحلق للكاميرا اللي المفروض تبقى خفية ومفروض هو مش شايفها

أنا اتفرجت على حلقتين على اليوتيوب واللي فعلا شدني هو ردود أفعال الناس
لان غالبا أول حلقات بيحاولوا يجيبوا ناس" جد بجد " مش متفقين معاها

لو شفت حلقة التليفون المحمول وملخصها انه الخفيف بتاع البرنامج بياخد تليفون واحد من اللي راكبين الميكروباص يعمل بيه مكالمة وبيشتم اللي بيكلمه
فـاللي اتشتم بيتصل على نفس نمرة الموبايل وبيقول لصاحب الموبايل الأصلي
انه ظابط من جهة امنية رفيعة المستوى رفيعه رفيعه يعني الولد وشه جاب ألوان السما السابعة
وعرق واصبحت حالته حالة وراسه وألف سيف انه ياخد بطاقة الخفيف اللي عمل المكالمة
وبيحاول يفهم الباشا اللي على الخط واللي نازل فيه سب وشتم انه " مش أنا والله ...والله ماأنا يا بيه
آخر ماغلب من انه يفهمه رجع للتاني وراسه وألف سيف انه يطلع البطاقة مش عارفة كان هيعمل بالبطاقه ايه الحقيقة
والا... والا دي اذ نفاجيء بالولد وهو نحيف جدا بالمناسبة وجسده هزيل
هوبا حط ايده في جيب البنطلون الخلفي وطلع "كتر" الكتر ده آلة حادة بنستخدمها لتقطيع الأوراق أو أي حاجة وسلاحها حاد جدا
وكان خلاص بقى هيقول حلال الله اكبر ويقوم بالواجب مع اللي اخد منه الموبايل
عجيب فعلا أمر شعبنا

كان من ثلات ثواني بس عرقه مرقه
وبعدين أما لقاها دخلت في سكة اللي" ميتسموش"... الفرعون اللي جواه طلع وطلع معاه الكتر

مجتمعنا اتغير وبقى اكثر جبنا و عنفا الاتنين يركبوا إزاي مع بعض مش عارفة بس هو كده
و..عظيمة يا مصر يا أرض العجب
و......

البنية التحتيه




Saturday, 31 July 2010

أسود - أبيض

استيقظ فوجد أنه من المفروض ان يعود إلى النوم مرة اخرى لان الليل مازال مخيما على أجواء غرفته
لم تدخل خيوط النهار الفضية المعتاده عبر ثقوب الستارة الملونة
لتعلن عن مولد يوم جديد واحداث جديدة
حاول ان يعود إلى فراشه الدافيء مرة اخرى لكنه وجد حركة غير معتادة في مثل هذا الوقت من " الليل" يأتي مصدرها من وراء الستارة ذات الدوائر الكثيرة
-قاوم الكسل وذهب ليستكشف ماذا يدور بالخارج في هذا الوقت المتأخر- هكذا ظن-
فتح باب الشباك فوجد ان الكل مستيقظ
وان الجميع بدأ في نشاطاته المعتادة
المملة والمتكررة
صاحب السوبرماركت فتح أبواب المحل
وهاهو البواب ينتهي من غسيل سلالم مدخل العمارة
كذلك المدرسة التي يطل شباكه عليها فتحت ايضا ويسمع اصوات الطلاب
الغريب في الأمر ان كل شيء اكتسى بالسواد
هو يرى بواب العمارة لا يراه كما اعتاد لكنه يراه كتلة سوداء تتحرك ببطء لمسح المدخل
تعاونه ابنته الصغيرة
وقد تحولت هي الأخرى إلى بقعة شديدة الظلام
كذلك رأى التلاميذ يلعبون ويصرخون
هو يراهم لكنهم ايضا كتل سوداء تتحرك في ظلمة شديدة لا يعرف متى بدأت ولا متى ستنتهي
ولا كيف حدثت
حاول ان يتحسس يده "ا ويقرصها" لكي يتأكد ان هذا كابوسا من الكوابيس التي اعتاد عليها في السنوات الأخيرة
لكنه شعر بألم القرصة
.....
فتح باب الغرفة ليجد امه تحضر الافطار لكنها هي الأخرى مكتسية بالسواد
كذلك اباه يطالع نشرةالاخبار
وهو غائص في مقعده المعتاد الذي لم يغيره منذ امد بعيد ثلاثون عاما تقريبا ...
رآه هو ايضا لا يظهر منه شيء
جن جنونه ماهذا الذي يحدث ؟
مجرد أشكال هندسية اعتاد ان يراها لكنها الآن اختفت أو تحولت إلى كتل متحركة غاية في الغموض
صباح الخير يا أمي لم ترد عليه
أو خيل اليه كذلك ...هي ردت لكنها لم تنظر اليه
فتح باب الشقة ليحضر جرائد الصباح
من جارهم الاستاذ عماد لانه يستيقظ مبكرا ويأتي بها إليهم
دق الباب فتح له عماد الموغل في سواد لا قرار له واعطاه الجرائد وقفل الباب دون ان يعطيه أي فرصة للكلام معه
هي نفس الجرائد بنفس العناوين المستفزة المعتادة كلام المسئولين الممل الكئيب المتكرر عن الاستقرار ومعدلات النمو
وعن حكمة الزعيم الملهم الذي لم ولن تنجب بنات الأرض مثله
وكلام المعارضين والنخب الأكثر كآبة
.......كلام.... عن احلام التغيير التي لم يلمح أي منها سوى تغيير رابطات عنق النخبة الداعين إلى التغيير
دخل إلى غرفته سريعا ليكتشف ان صفحات الجريدة هي الأخرى سوداء
لكنه يستطيع بسهولة ان يتعرف على الحروف ويجمعها لتكتمل الجمل
والاخبار والقصص
براءة صاحب قضية اكياس الدم الملوثة
الحكم على مراكبي بالسجن عشرة سنوات لتسببه في مقتل 6 فتيات
بينما المتسبب في مقتل ألف وثلاثمائة نفس حر طليق في بلاد الضباب
بداية محاكمة لنشطاء حقوقيين
وسط تكهنات ان المحاكمة سوف تدار بأحدث تقنيات " التحكم عن بعد "... والثري جي اس من مكتب ال.... مباشرة
احتمالات زيادة معدلات سرطان الاطفال والفشل الكلوي في مصر بحلول عم 2040
اعلان الدولة الفلسطينيه من جانب واحد
قانون الاحوال الشخصية الموحد ....
صحة الرئيس ونشاطاته التي لا تنتهي ....
الصراع الكوميدي مع دول حوض النيل
كلها حروف ثقيلة وكئيبة
تكون جملا اكثر كآبة
تداخلت الكلمات مع بعضها البعض لتكون دوامات من الاحرف
لا معنى ولا نهاية لها
تمكنت الكلمات البائسة من التسلل الى أعماقه متحولة لفيروس يأس قاتل
وسيط ذاك اللعين عليه بحيث لم يعد هناك مكان لاي بارقة امل
حول ان يغمض عينه ليخلد مرة اخرى إلى النوم الذي اصبح في هذه اللحظة الملجأ والملاذ الاخير
لكن دخلت عليه شقيقته علياء تخبره بأن عليه ان ينزل لاحضار بنات اخته الكبرى من" محطة مصر" لانهم عالقون هناك
ويخشون الركوب مع أي سائق تاكسي
طلب منها ان تعطيه دقائق ليجهز نفسه
نظر إلى علياء فاكتشف انها الوحيدة دون الجميع تظهر له بشكل طبيعي ملائكي طالما اعتاد على رؤيته
وليست شبحا من تلك الاشباح السوداء المرعبة التي رآها منذ بداية اليوم العجيب

Saturday, 24 July 2010

السكوتر هو الحل

طالعتنا الصحف الحكومة والمستقلة بخبر جد عظيم عن صحة الرئيس مفاده ان الرئيس


بخير حال وبأفضل صحة.
!!! بل تمادت التصريحات بقول السيد عمر سليمان بأن: الرئيس مازال يمارس رياضة الاسكواش
و ان الموظفين برئاسة الجمهورية يلهثون جريا وراء الرئيس في مداخل ومخارج وطرقات قصر الرئاسة
من فرط نشاطه وحيويته
وأنا من مزنقي هذا أطالب ديوان الرئاسة صرف
عدد واحد سكوتر ستانلس أمريكااني لكي يلاحقوا على النشاط الزائد للرئيس .

Friday, 16 July 2010

في البحر سمكة



 لكم كنت أتمنى ان اكون سمكة
......
 استنى اضرب دي وأنت بتقرا
لانه يقال ان السمك  لا ذاكرة لديه على الإطلاق
زمان قيل ان الانسان كائن مفكر
وهذا يميزه عن باقي الكائنات التي خلقها الله سبحانه وتعالى
                    
لكن اتضح فيما بعد ان هناك بعض الحيوانات تفكر ربما افضل  
من بعض البشر  

راجع  مثلا كيف يفكر  اعضاء حكومتنا الالكترونية الرشيدة  في معالجة بعض الملفات الحساسة  كقضية دول حوض النيل  وستجد ان القرد شمبونجو في بعض الأحيان يخرج علينا بأفكار افضل من افكار الحكومة الخزعبلية
 الأسماك لا تتمتع  إلا بذاكرة مؤقته  قصيرة جدا  تكاد لا تتعدى  ثواني معدودة
لذلك ينصحك خبراء الأسماك والمعنيون -حلوة المعنيون دي ها؟
  بينصحوك بايه بقى  آه بينصحوك يا سيدي إن لو عندك  حوض  سمك وفيه 5 سمكات
مش عارفة ليه خمسة بس خلينا نقول خمسة علشان الحسد وكده
اوعى تحط أي امل انا ايا من  السمكات الخمسة تلك هاتفتكرك أو هترتبط بك زي مثلا مابيرتبط بيك  اسم الله على مقامك - كلب
أو قطه
ولا هيعبرك ولا هيفتكر إن انت اللي كل يوم بتحطله الأكل وبتنضف الحوض
وبتزود الموتور كام فولت علشان ينعنش
فالسمك بالنسبة لنا كده واطي  واطي يعني  ياكل وينكر
بس دي الفطره التي فطره الله عليها يعني مالوش أي ذنب
الكارثة بقى في البني آدمين
اللي هو احنا
عندنا ذاكرة  ومش أي ذاكرة شورت ولونج وبكرانيش كمان 
بس بنستهبل ونعمل زي السمك  بناكل وننكر
وننسى اللي مد لنا ايده بطبق فاهيتا
أو حتى سندوتش فول  من عند الشبراوي
بننسى اللي وقفوا جنبنا
ليه ؟
علشان احنا رجالة ووقفنا وقفة رجالة
أنا مش عارفة أنا بقول إيه أو إيه الهدف من التدوينه دي
بس هو عمو احمد خليل قال إني بقيت كسلانه وبقالي  21 يوم مش كتبت حاجة
...................................


..................................


 
                                                       cut                                                 

اجمل حاجة في الدنيا فعلا ان عندنا ذاكرة
سينما مجانية
مخرجين فشر سبيلبرج  وريد سكوتلي وممثلين وكتاب سيناريو ولا بلال فضل في ازهى عصوره
نجوم
متقولش سير شين كونوري
أو حتى احمد حلمي كونوري برضه  ومنة شلبي طبعا
 بس ساعات الذاكرة بتاعتنا دي
بتودينا مناطق تراجيدي اخر حاجة
مثال
           - افتكر  كده أول مرة  ابوك ماوافقش على رحلة المدرسة للعين السخنة- بحجة انه خايف عليك 
 قمة التراجيديا طبعا
خصوصا لما تكون  مدي  امل ل "نور" زميلتك أنك طالع يعني طالع
 - ساعات  تانيه  بتكون سينما الذاكرة دي مليانة- سسبنس
فاكر أيام ماما  اما قالت لك: مش هقولك يا خالد  إيه المفاجأة اللي  محضراها لك إذا نجحت في الثانويه العامة بمجموع كبير ؟

 ..............
............................ وكانت بمبه طبعا  يا خالد
 لا انت نجحت بمجموع كبير
لانه يفترض المجاميع الكبيرة  أيام د . حسين كامل بهاء الدين
             باطني- اطفال - حميات
تكون فوق التسعة وتسعين وتسعة من عشرة في المائة
آه آه بتفكرك بموضوع الاستفتاءات ......يوه قصدي الانتخابات واخترناه اخترناه
فـلا انت بتجيب المجموع الكبير ولا ماما بتجيب الهدية اللي اصلا هي ماكنتش عارفة هي ايه

ساعات تالته بقى بتكون  أفلام ذاكرتك دي طفولية وبريئة آخر خمس حاجات
اللعب  مع اصحابك على سلالم العمارة
 "إنك تكون لاول مرة في تاريخ شارعكم  والشوارع المجاورة"صاحب اللعبة  "
بعد سنوات الضياع اللي كنت بتقضيها  كصاحب أو تابع لصاحب اللعبة
وصاحب اللعبة اهم امتيازاته انه يختار من اللي يبقى معاه ومن اللي مش معاه
وهو اللي بيحدد قوانين اللعبة
ومن اللي يلعب ومن علي يقعد يستنى دوره 
اللي ساعات كتير مابيجيش

وممكن يطلع بافتكاسات غريبه زي انه يوزع "أسهم  "اللعبة على عيال الشارع وفي ستميت داهية الاجيال اللي جاية بعدك انت وأصحابك
المهم أنك تتمزج
بالذمة مش بيفكرك الكلام ده بصاحب امانة السياسات ؟
أهو كله لعب في لعب

كمان أفلام الذاكرة عندك بتكون مليانةبالعواتشيف الجياشة
ومن منا ينسى حبه الاول
مش بنت الجيران بقى أو ابن الجيران
أنا عن نفسي كان حبي الاول مش ابن الجيران
 كان...... وانت مالك يا رخم
المهم يعني
اللي نفسي اقوله أو اوصله لك
وليَّ أنا كمان
دايما انعش ذاكرتك
وخليها
دايما مصحصحه
وفايقة كده .....
........
الغريب بقى ان نفس ذات الخبراء
ونفس ذات "المعنيون" السالف ذكرهم أعلاه
بتوع السمك مالوش ذاكرة

هم اللي  بينصحوك تاكل سمك كتير قوي جدا خالص على قد ماتقدر ......ليه ليه ليه ؟؟؟؟
قلت لي ليه
لانه بيقوي الذاكرة
 وده يؤكد لنا  عدم صحة المثل القائل
 فاقد الشيء لا يعطيه
.......