Tuesday 22 March 2011

الى من يهمه الأمن .....والاستقرار



صفحتنا على الفيس بوك اشترك وشير لو سمحت

اللي خارج مصر طبعا عايزين توقيعاتهم، لو في بلد مافيهاش قهر يبقى يوقع ويفرورد اللنك ويجمع توقيعات بعد ما يطبع، لو في بلد فيها قهر يوقع ويبعت اللنك لكل المصريين اللي يعرفهم بس من غير ما يتئذي
هو احنا دلوقت الحمد لله ما بقاش فيه خطر علينا في جمع التوقيعات :) بس مش معنى كده اننا نتنطط على المصريين اللي عايشين في دول قمعية
:P
تحديث:
الدستور كتبت عن حملة التوقيعات بتاعتنا :)
شكرا


إلى:
المجلس الأعلى للقوات المسلحة،
السيد الدكتور عصام شرف رئيس الوزراء،
النائب العام،

تحية طيبة وبعد،

لقد عانينا نحن المصريين علي مدي سنوات عدة من فساد النظام الحاكم في مصر وعانينا من الانتقائية في تطبيق القوانين ومورس علي المواطنين أبشع وسائل القهر التي أدت إلي تكميم الأفواه ونشر الرعب بين المواطنين البسطاء والسيطرة علي كافة وسائل الإعلام المرئي والمسموع والمقروء وسيطرة حفنة من رجال أعمال النظام الفاسد علي مقدرات هذا الوطن، وبقاء عدد كبير من المسئولين المشهورين بفسادهم والذين لا يخشون في الباطل وتجميل النظام الفاسد لومة لائم مستغلين في ذلك كافة وسائل التضليل والخداع ومعتمدين علي آلة النظام القمعية التي أذاقت المصريين كافة صنوف العذاب وهي جهاز أمن الدولة الذي طالت يداه غالبية المواطنين المصريين بلا استثناء وأشبعونا اعتقالا وتعذيبا وقتلا مما جعل المطالبة بمحاكمة الفاسدين وحل جهاز مباحث أمن الدولة علي رأس مطالب ثورة 25 يناير وبالتالي فإننا نطالب من جديد بالآتي :
أولا :استبعاد كافة أعضاء جهاز أمن الدولة من المشاركة في أية وظائف لها علاقة بالعمل الشرطي، وإشراف القضاء ومنظمات المجتمع المدني المستقلة على جهاز الأمن الوطني لضمان عدم منح أية فرصة لعودة السياسات البائدة في التعامل مع المواطن المصري، ولضمان تطبيق أحكام الدستور المصري وعلي وجه التحديد المواد : 40 ، 41 ،42 ،44، 45 والتي تنص علي :
- المواطنون لدي القانون سواء وهم متساوون في الحقوق والواجبات العامة لا تمييز بينهم في ذلك بسبب الجنس أو الأصل أو اللغة أو الدين أو العقيدة
- الحرية الشخصية حق طبيعي وهي مصونة لا تمس وفيما عدا حالة التلبس لا يجوز القبض علي أحد أو تفتيشه أو حبسه أو تقييد حريته بأي قيد أو منعه من التنقل إلا بأمر تستلزمه ضرورة التحقيق وصيانة أمن المجتمع ويصدر هذا الأمر من القاضي المختص أو النيابة العامة وذلك وفقا لأحكام القانون ويحدد القانون مدة الحبس الاحتياطي
- كل مواطن يقبض عليه أو يحبس أو تقيد حريته بأي قيد تجب معاملته بما يحفظ عليه كرامة الإنسان ولا يجوز إيذاؤه بدنيا أو معنويا كما لا يجوز حجزه او حبسه في غير الأماكن الخاضعة للقوانين الصادرة بتنظيم السجون
- للمساكن حرمة فلا يجوز دخولها ولا تفتيشها إلا بأمر قضائي مسبب وفقا لأحكام القانون
- لحياة المواطنين الخاصة حرمة يحميها القانون وللمراسلات البريديه والبرقية والمحادثات التليفونية وغيرها من وسائل الاتصال حرمة وسريتها مكفولة ولا تجوز مصادرتها أو الاطلاع عليها أو رقابتها إلا بأمر قضائي مسبب ولمدة محددة ووفقا لأحكام القانون
ولا شك أن مخالفة تلك الأحكام الواردة بالدستور المصري يضع كافة المسئولين عنه تحت طائلة قانون العقوبات بقائمة من التهم تتضمن علي الأقل ارتكابهم جرائم الاحتجاز بدون وجه حق ، والتعذيب ، وتعطيل تنفيذ القوانين واللوائح ،وهتك العرض ، والقتل ، وإخفاء الأدلة عن العدالة ،وتعريض السلام الاجتماعي والوحدة الوطنية للخطر ....... إلخ
إن جرائم جهاز أمن الدولة جميعها تستوجب فتح تحقيق جدي فيها والتحفظ علي كافة أعضاء هذا الجهاز بلا استثناء هؤلاء الذين لم يألو جهدا في انزال كافة ألوان العذاب بالمصريين الذين أوقعهم حظهم العثر تحت ايديهم ولم يثبت يوما اعتراضهم علي ما يكلفون به بل وعزلهم جميعا من وظائفهم وعدم توليتهم أية وظائف لها علاقة بأمن وأمان الوطن والمواطنين لثبوت أنهم أخلوا بواجبات وظائفهم وعطلوا تنفيذ القوانين واللوائح وخانوا الأمانة التي كان منوطا بهم أدائها وليس الاكتفاء فقط بحل جهاز مباحث أمن الدولة أو تغيير مسماه بل نريد القضاء نهائيا علي هذا الجهاز واستبعاد كافة أعضائه من المشاركة مستقبلا في أية وظائف لها علاقة بالعمل الشرطي ذلك الجهاز الذي أقل ما يوصف به أنه تنظيم إرهابي وليس مؤسسة وطنية .
ثانيا : التحفظ علي كل من رئيس مجلس الشعب السابق فتحي سرور ورئيس مجلس الشوري السابق صفوت الشريف ورئيس ديوان رئيس الجمهورية زكريا عزمي:
باعتبارهم المسئولين الرئيسيين عن إفساد الحياة السياسية والحياة البرلمانية في البلاد ومساهمين بشكل رئيسي في حماية رؤوس النظام الفاسد إن لم يكونوا منهم بالأساس والذين يشكل تركهم طلقاء خطرا حقيقيا علي استقرار الوطن وأمن المواطنين ولثبوت ضلوعهم في جرائم ضد المواطنين المصريين، خاصة ضد الثوار في يوم 2 فبراير المعروف بالأربعاء الأسود أو "معركة الجمل".
هؤلاء الثلاثة الذين ساهموا بشكل أو بآخر في التستر علي الآلاف من وقائع الفساد وعدم احترام أحكام القضاء ومساعدة المفسدين علي الإفلات من العقاب والذين تشير إليهم اصابع الاتهام في العديد من الحوادث التي تم تدبيرها لإجهاض ثورة 25 يناير والمسئولين لسنوات عديدة عن ثلاث من أهم المؤسسات في جمهورية مصر العربية ومسئولين سياسيا وإداريا وجنائيا عن كافة وقائع الفساد والاستيلاء علي المال العام التي تمت بداخل تلك المؤسسات ولهم دور لا يخفي علي أحد في افساد الحياة السياسية والحزبية والبرلمانية في مصر، كما ثبت ذلك بالتحقيق في قضايا الفساد.
وبناء علي ذلك فإننا نطالب بسرعة التحفظ علي هؤلاء الثلاثة وتكليف الجهات الرقابية بالتحري عن ثرواتهم ومصادر تلك الثروات وفتح الباب للتحقيق في كافة وقائع الفساد التي شاركوا فيها إما مباشرة أو بالتستر علي مرتكبيها.

الموقعون أدناه:

الاسم: الرقم القومي أو رقم جواز السفر:
-----------
لتسليم التوقيعات:
1 ش سوق التوفيقية مركز هشام مبارك

او

fegypt20@yahoo.com

للاتصال:

0101044264

وده لنك التوقيعات على الانترنت لو سمحتوا شيروه على قد ما تقدروا

والاهرام نزلوا البيان بس ما حطوش لنك التوقيعات مش عارفة ليه؟ ان شاء الله نحاول ننشر على قد ما نقدر

ليه بنجمع توقيعات؟ عشان عايزين نجمع اعداد، لأن بجد بقى لو ما خلصوناش من الموضوع ده حننزل لهم، وهم الظاهر مش مصدقين ان فيه عدد كبير من المصريين عايزين يخلصوا فعلا من التلاتة دول ومن امن الدولة، عايزين نخليهم يصدقوا ان ده مش مجرد "كام مجنون من بتوع الفيس بوك" زي ما هم فاكرين

Wednesday 16 March 2011

دردشة من الجنة



صباح الخير يا احمد يسعد صباحك يا مينا
..... أنا زياد
فاكر زياد يا حنا ؟
أنا جاي ادردش معاك شوية
واخد لي نص ساعة اجازة مالجنه
فاكر يا احمد أما اتقابلنا لا اعرفك ولا تعرفني
على كوبري قصر النيل
يوم التلات الطويل
رصاص و غاز و وشوش قزاز... كل اللي في دماغهم ازاي يجيبوا داغنا
واحنا اللي في دماغنا ازاي هنوصل" هناك "
عينينك كانت قرياني
من نظرة فهماني
تضحك وتستعجب ازاي حصل كل ده من بس كام ساعة
اضحك واستغرب
يجي مينا يجري علينا جري ويسأل مامعاكش ولاعة ؟
اضحك أنا التاني واقول له يا اناني
سب لي الازازة دي أنا الليي هارميها...
على ابن الرفضي ده اللي ماسك فيها
واازازة في ازازة و وبركة دعا الوالدين عبرنا قصر النيل
ووصلنا للتحرير
و بدأت غناوينا وتحت ضل الليل سهرت حكاوينا
نضرب في البلطجية ويضربوا فينا
عدى على روسنا كتير وقليل لا عمرنا خوفنا ولا عزمنا مال
اشي بلطجية وسوابق واشي طيارات وجمال
لكن كانت وحدتنا
وخوفنا "عالحلوة "
اكبر من كل ده
خفنا كان شيء محال
....
فاكر ياواد يا عماد يوم الخطاب الاولاني
كان نازل "هو" رغي واحنا نازلين أغاني
لا همنا بيقول ايه ولا رن في وداني
كلمة من الهلفطه
اللي بيرغيها
كل الردود كانت: يمشي وهانبنيها
مايباتش يوم فيها
وخطاب ورا التاني ولا رن في وداني غير كلمة واحدة بس: أمشي وهانبنيها
وفي يوم عديم النظر هوبا في لمح البصر
أنا مت برصاصة
من يد قناصة
لا يعرفوا ربنا
ولا يعرفوا احنا مين
بقى دولا بني آدمين ؟
قصر الكلام سيبك
أنا مش هطول عليك
أنا بس جاي اقولك
تاري معاك يا احمد
دمي في رقبتك يا مينا
عارف هتخده ازاي ؟
ترسم بلدنا الزين كتفك بكتف حسين
مش عاوز أحس تاني نفس الشعور الكئيب
لما انتصرنا خلاص ....وفجأة وبدون مناسبة هجم علينا الديب
يضحك ضحكه مخيفة ويقولي هالعب معاكم
عارف شعور قلب الحبيب لما يحرر وجدان حبيبته؟
وفجأة ييجي واحد غريب ياخد عروسته
ده كان أنا قاعد وببكي ...
و اقول اخدها.. و أنا من بلدها ...وانا اولى بيها
و يا ثاير ياللي انزويت في الركن تتفرج
عالرقاصين فوق المسرح
حاسس أنا بيك شايف أنا في عينيك
للحزن كذا مطرح
وعنيك بتتمرجح مش كان أنا
اولى بالفرح ده افرح؟
...
فتك أنا بعافية النص ساعة فاتت
عاوز الزيارة الجاية الاقي مصر الحلوة في عينيك وفي عنيا

Thursday 10 March 2011

دستور يا اسيادنا

نزلت النهاردة زي مااتفقنا اننا ننزل الشوارع ونشوف الناس عندها علم أو دراية عن اللي هيحصل يوم 19 مارس من استفتاء على التغييرات الدستورية .
أنا كان نفسي افرحكم واقول خير بس اللي شفته كان غير مبشر على الاطلاق :
بعض الناس كانت رافضة تماما تتكلم معايا بحجة الخوف والشك لسا النظام القديم مسيطر عليهم وهاجس ان الكلام في السياسة هايوديهم في داهية ده كان كلام عم شعبان 68 سنة فارش بمفكات ومفاتيح انابيب وشواكيش رفض اني الصوره أو اخد اسمه بالكامل .
أول ماسألته عن التعديلات الدستورية قال لي يلا أمشي من هنا خربتوا البلد قلت له أنا اسفة وأخدت بعضي ومشيت راح منادي عليَّ تعالي هنا رحت رجعت له وقالي انت عاوزة ايه ؟ ثورة ؟ ماحصلت الثورة .. مبارك امسكوه وحاكموه على اللي خده بس ماتجوش كل يوم كل واحد يعمل اعتصام وقفتوا حالنا ماأنا بقى حاجة مش عجباني هاعمل اعتصام وحسن - جاره بيصلح عجل - يروح يعمل اعتصام أنا مش عارف - لسا الكلام على لسان عم شعبان - أنا مش عارف اروح اقبض معاشي علشان موظفين البوسطه عاملين اضراب
مفيش خير يا بنتي زمان كان كل واحدة تعمل حلة طبيخ تروح غارفة طبق وبعتاه لجارتها , دلوقت الوحدة من دول تشتيري بجنيه برسيم تخبيه في" جلبتيها" وهي داخلة البيت علشان محدش يشوفها
...........

عaعابد حسين صالح 34 سنة بطاقته بتقول انه عامل تبرد وتكيف بس هو بيشتغل مندوب مبيعات بيبيع اطباق وكوبيات ازاز سألت عماد هتروح الاستفتاء على الدستور قالي استفتاء ايه على ايه يا ابلة ؟ واضح انه ميعرفش حاجة عنه حاولت اشرح له بصعوبه قال لي طيب أنا اروح ماشي بس اروح اقول آه أو لأ على حاجة معرفهاش ؟؟ معرفتش ارد عليه ..
سألته طيب هاتنتخب مين لو قدامك البرادعي وعمرو موسى وحمدين صباحي قال لي احب احتفظ بالاجابة لنفسي معرفش ايه وجه السرية في كده بس شكرته وقلت له قشطه يا عماد.
واحد تالت فلاح بسيط كان داخل مجلس المدينة عنده شكوى لانه راح يركب عدد كهربا فطلبه منه" مقايسة "في "مكتب هندسي" وبيقول ان ده ماكانش بيحصل زمان أيام " الريس" وانتوا بتصعبوا الدنيا كده .. سألته عارف حاجة عن استفتاء التعديلات الدستورية الجديدة قال لي لأ
..........
محدش قال لي أي حاجة ومعرفش حاجة
جمال الفرماوي وسيد الفرماوي تتراوح اعمارهم بين 40 45 سنة عمال في بوفيه سألتهم نفس السؤال قالوا مش رايحين ومش عاوزين نقول آه أو لأ على حاجة منعرفهاش ماتطبخوش الطبخة وتاكلوها لنا .. بيوجه كلامه ليَّ أنا اني أنا اللي طبخة الدستور أنا وصحابي .

سألته عن البرادعي وعمرو موسى وحمدين وايمن نور قال لي أنا مع عمرو موسى البرادعي ده راجل بتاع امريكا وأنا مبحبوش
واحد اتدخل في الكلام نسيت اخد اسمه قال لي :

Link
.......
احمد يسري مقاول 33 سنة يبدو انه ملم بموضوع التغييرات وان فه استفتاء بس مشكلته انه محدش شرح له ايه الاستفتاءات دي وليه وكده لكنه قال انه أما يفهم هيروح الاستفتاء ويقول آه أو لأ حسب مايشوف بس اهم حاجة يفهم ايه هي المواد وايه اللي هايتغير

هو ده الشارع يا اخوانا الحصيلة تكاد تكون صفر واحنا قاعدين على فيسبوك وتويتر نعيد ونزيد في ذات نفس الكلام مابنزهقش
لازم لازم لازم حملة تثقيفية للناس دي
آه بالنسبة للستات اللي قابلتهم ولا واحدة وافقت تتكلم معايا... يا ريت بتوع مليونية المرأة بدل ماينزلوا التحرير ينزلوا يشوفوا خيبة الستات القوية
.

Wednesday 9 March 2011

يا رب ارحم


النهاردة نزلت اروح كنيسة شبين الكوم اللي فيها مقر المطرانية بالمنوفية
نزلت مشحونة بأحداث امبارح اللي حصلت في قرية صول مركز اطفيح وباللي حصل في منشأة ناصر
كانت أول مرة أنزل اروح كنيسة في مصر
كانت خبرة جديدة بالنسبة لي ماكنتش عارفة أنا هاروح اقول ايه أو هاعمل ايه
نزلت الساعة تسعة من بيتنا دخلت باب الكنيسة كان فيه عامل بينضف مدخل الكنيسة شافني ابتسم لي ابتسامة صافية جدا سألته عن حد من القساوسة قالي ابونا بيصلي وهيكون موجود بعد الساعة عشرة وبعدين فيه قداس الساعة عشرة ونص ممكن تيجي هتلاقيه شكرته ومشيت

...
بالمناسبة كشك الحراسة اللي عالكنيسة بعيد الى حد ماعن بوابة الكنيسة
يعني سهل جدا حد يتسلل جوه الكنيسة من غير فردين الحراسة اللي مرزوعين قدام الباب ماياخدوا بالهم

رجعت تاني الكنيسة لقيت القداس ابتدى ومفيش حد واقف علشان استأذن ادخل
جازفت ودخلت

كان لقاء الناس لي مشوب بالدهشة والاستغراب والحذر
دهشة من وجود بنت محجبة جوه القداس واستغراب هي ليه هنا؟ وحذر لانه واضح جدا انهم مش متعودين على منظر زي ده
مرت عدة دقائق من الارتباك الغير معلن بيني وبين كل اللي شافوني وقفت وكل اللي أنا في مستوى نظرهم بيبصوا على باستغراب شديد وقلق اشد ..
بعد شوية جت راهبة من الراهبات وسألتني انتي جاية من المجلس علشان النضافة ؟ كلمة "علشان النضافة " ضحكتني شوية وقللت من الضغط اللي جوايا والارتباك... بابتسامة جاوبتها وقلت لها لأ أنا جاية احضر الصلاة واقول ان احنا واحد بصت لي شوية وقالت لي : ربنا يعديها على خير معرفش كانت تقصد يعدي الصلاة على خير ولا يعدي اللي بيحصل في البلد
كان فيه بنتين 14 و-13 سنه يبصوا عليَّ ومستغربين وجودي جدا وبيضحكوا كل شوية ولسان حالهم يقول من الهبلة دي وايه اللي جايبها هنا ؟
شوية جت لي سيدة تانية وطلبت مني اخرج معاها
خرجت وكان مستنينا واحد يبدو انه موظف كنسي وسألني ايوه يا بنتي فيه حاجة نقدر نساعدك ؟
ارتبكت كده لانه واضح فعلا انهم مش واخدين على زيارات من النوع ده.
أنا افتكرت ان أيام احداث كنيسة القديسين الوضع بقى عادي أو انه عادي حد مسلم يحضر صلاة
حاولت اشرح له أنا جاية ليه واني عاوزة اعبر عن رفضي للي حصل ابتسم قوي والست اللي جت تاخدني من جوه الكنيسة حضنتني وقالت: " يا حبيبتي " حاولت امسك نفسي لان الموقف كان عاطفي لأقصى درجة وأنا سهل جدا اعيط في مواقف زي دي
. قلت لهم أنا مستعدة أمشي لو وجودي هيسبب أي مشكلة خصوصا اني ماقلتش أو استأذنت قبل ماادخل القداس
قالوا لي لأ طبعا انت منورانا
ودخلت معاهم تاني بس المرة دي وأنا مرتاحة الى حد ما كانت كلمة كيرياليسون أ يا و رب ارحم بتهزني بشدة

وبرحمتك لا بخطايانا
بدأت اردد معاهم كيرياليسون وبرحمتك لا بخطايانا
انتهت الصلوات وقابلت احد القساوسة بمساعدة طنط ماري- اللي اخدتني بالحضن بره- .. و قلت له أنا ليه جاية وقالي الرب راعي و حامي مصر طول مافيه ناس زيك قلت له أنا اللي زي كتير وأحسن لكن عاوزين ننسق ده معاكم رحب جدا

سألت طنط ماري هو مفيش حد جه أيام تفجير اسكندرية ليلة قدس الميلاد ؟ قلت لي لأ اللي جم ناس" رسميين" من المحافظة فقط لاغير

انتهت الزيارة وعرفت قد ايه ان التركيز على تحركاتنا كان بيصب في القاهرة ولو طلع برة شوية يبقى اسكندرية.. لكن باقي مصر ولا الهوا
صحيح مفيش فتن في الدلتا لكن مفيش تفاعل من أي نوع موجود في الأماكن دي

مشيت من الكنيسة بفكر ازاي نحيي روح قدس 2011 اللي راح فيه ناس كتير مسلمين لحماية المسيحيين بعد تفجيرات القديسين الآثمة
يا ريت كلنا نبدأ نعمل أي حاجة علشان الروح دي هي أكتر حاجة البلد مستنياها ومحتاجة ليها في الوقت الصعب اللي كلنا بنمر بيه
وأنا هاكون سعيدة باي اقتراحات

افتكرت كمان وأنا ماشية ان الوحيدة اللي ابتسمت لي وعاملتني بكل بساطه ودون أي تكلف كاني اعرفها من سنين بنت عمرها مايزيدش عن اربع سنين لسه محدش زن في ودنها

Friday 4 March 2011

شهادة على واقعة القبض على عمرو عبد الله البحيرى فجر السبت26 فبراير 2011

المحتوى منقول من مدونة ماعت


مقدمه د. ليلى مصطفى سويف
مدرس بكلية العلوم بجامعة القاهرة
رقم قومى25605018800105

فى حوالى الساعة الثانية من صباح السبت 26 فبراير 2011 بشارع القصر العينى، امام مجلس الشعب، عقب فض الاعتصام الذى
كنت مشاركة فيه امام مجلس الشعب بالقوة على يد قوات من الجيش والشرطة العسكرية واثناء انصرافنا من مكان الاعتصام قام بعض عناصر من الجيش باختطاف السيد عمرو عبد الله البحيرى(32 سنة من كفر الزيات) واخذوا يوسعوه ضربا واصابوه فى وجهه دون سبب واضح حيث كنا جميعا نهم بالانصراف، وحين احتججت ومن معى على هذا واعلنا رفضنا للانصراف إذا لم نصطحب الشاب معنا، قام ضابط كبير الرتبة بتهدأتنا وامر الضباط الاقل رتبة باحضار الشاب عمرو عبد الله وكان مصابا فى وجهه اصابة بالغة، واصطحبناه معنا وسرنا فى شارع القصر العينى وكان معى د. شادى الغزالى حرب والاستاذ تقادم الخطيب (المدرس المساعد بآداب المنصورةوعضو حركة 9 مارس لاستقلال الجامعات) وابنتى منى أحمد سيف الاسلام عبد الفتاح وابنى علاء أحمد سيف الاسلام عبد الفتاح وزوجته منال بهى الدين حسن والاستاذ احمد عبدالله (قريب الاستاذ عمرو) الذى كان يعاون قريبه المصاب واثناء انصرافنا توقفت بجوارنا سيارة ملاكى بها 2 من الشباب ( للاسف لا أعرف اسم أى منهما حتى الان) عرضوا علينا المساعدة فى توصيلنا الى أى مكان فطلبنا منهم اصطحاب الشاب المصاب وقريبه وتركنا د. شادى والاستاذ تقادم حيث ذهبا معا ليستقلا سيارة د. شادى وينصرفا وانصرفنا انا وعائلتى سيرا على الاقدام داخل شوارع جاردن سيتى. وبعد دقائق اتصل بى استاذ تقادم وابلغنى ان ضباط الجيش قد اوقفوهم مرة اخرى وانزلوهم من السيارة فعدت الى شارع القصر العينى ووجدت كل من شادى حرب وتقادم الخطيب وعمرو واحمد عبدالله والشابين- الذين كان كل ما فعلوه هو تقديم المساعدة لجريح - مقبوضا عليهم جميعا من قبل عدد ضخم من ضباط الجيش.

حوالى الساعة الرابعة والنصف صباحا اتصلت بالاستاذ تقادم وعلمت منه انه قد افرج عنه هو ود. شادى اما الاربعة الاخرين فكانوا لايزالوا محتجزين ويدعى الضباط الذين يحتجزونهم انهم وجدوا سلاحا (قيل انه طبنجة صوت) بحوزة عمرو
فى الساعة الثانية من ظهر اليوم السبت 26 فبراير 2011 وبعد ان عرفت بالبيان 23 الذى اصدره المجلس الاعلى للقوات المسلحة و اعلن فيه انه سيتم الافراج عن من قبض عليهم هذا الصباح اتصلت بالاستاذ احمد عبد الله كى اطمئن فابلغنى انه قد تم الافراج عنه للتو وان الشابين الذين قدما لنا المساعدة قد افرج عنهما قبل ذلك أما عمرو فلا يعرف عنه شئ
واود ان اؤكد هنا ان عمرو عبد الله البحيرى لم يكن يحمل اى شئ يمكن ان يحتوى طبنجة بل أنه كان محتجزا اصلا لدى الجيش فلو كان معه سلاح لما تركوه يصحبنا، والارجح ان استمرار احتجازه ومحاولة تلفيق تهمة له ناتج عن محاولة تبرير اصابته حيث قامت ابنتى منى احمد سيف ود. شادى الغزالى وأستاذ تقادم الخطيب بتصوير اصابته وكان واضحا اننا ننوى الابلاغ عن الامر،
هذا ويذكر ان كل من تحدثت معهم من الشباب الذى احتجز قد افاد بانه تعرض للضرب المبرح اثناء احتجازه كما افاد بعضهم بتعرضه للتعذيب عن طريق الصعق بالكهرباء

ليلى مصطفى سويف
مدرس بعلوم القاهرة
تحريرا فى 26 فبراير 2011

عمرو عبد الله البحيري


ا
لمحتوى منقول من مدونة ماعت
حتى يستدعي الاسم عمرو عبد الله البحيري صورة في خيالك

عمرو شاب مصري شارك في اعتصام سلمي امام مقر مجلس الوزراء و مجلس الشعب الجمعة 25 -السبت 26 فبراير 2011, و الذي تم فضه بعنف مروع من قبل الجيش .
شاءت الأقدار ان أشهد انا و أمي و أخي و مراته و أصدقاء واقعة الاعتداء على عمرو من الجيش, فتصبح صورة عمرو تلازمني في كل لحظات يومي, و يصبح هاجسي ان أؤدي واجبي و اعمل على نشر شهادتي و قصة براءته حتى يعود عمرو بسلام الى أهله.


عمرو ضرب و اعتقل صباح السبت 26 فبراير مع 5 أشخاص اخرين, اخلى سبيلهم في خلال ساعات و أعلمونا انهم لم يخلوا سبيل عمرو و ستوجه له تهمة حيازة طبنجة
قمنا بمحاولات لتوصيل شهادتنا عن حقيقة ما حدث لعمرو لقادة القوات المسلحة و و جاء الرد انه سيتم اخلاء سبيله صباح الأحد.
يوم الأحد بعد الظهر اعلن اسم عمرو على التلفزيون المصري من ضمن 9 اسماء "بلطجية" محولين لمحاكمة عسكرية
قدمت والدتي - د. ليلي سويف - شهادتها للنائب العام, و مرة أخرى حاول بعض الأفراد مساعدتنا في ايصال شهادتنا لقادة القوات المسلحة و التي تؤكد انه لم يكن بحوزته سلاح, و جاءنا الوعد بان عمرو سيخلى سبيله في خلال يوم, ثم فوجئنا يوم الثلاثاء الموافق 1 مارس 2011 بأن عمرو تم عرضه على المحكمة دون ابلاغ عائلته او محاميه للدفاع عنه, وتمت ادانته و توقيع عقوبة السجن 5 سنوات بتهمة " التعدي على مكلف بخدمة عامة, و كسر حظر التجول"

4 أيام فقط تم فيها اتهام عمرو, تغيير التهمة, محاكمته و ادانته!

ساعدونا في نشر قصة عمرو, ساعدونا في اعلاء صوته, ربما ساعد ذلك في تحرير أصوات اخرى من قصص مشابهة.

بيان منظمات حقوق الانسان الخاص بقضية عمرو


رجاء نشر النداء على اوسع نطاق ممكن

نحاول تكثيف جهودنا الان للتصدي للمحاكمات العسكرية للمدنيين في جرائم غير عسكرية، لمخالفة ذلك لأبسط حقوق المواطنين في المحاكمة العادلة.
لذا نناشد أهالي المدنيين المحكوم عليهم بأحكام عسكرية خلال احداث ثورة 25 يناير او المفترض عرضهم على محاكم عسكرية سرعة الاتصال بنا لتوفير الدعم القانوني المناسب : تقديم التماس او طلب لاعادة محاكمتهم محاكمة مدنية عادلة تكفل لهم حقهم في الدفاع و تقديم أدلة في و شهود نفي ان وجد.

رجاء الاتصال على الارقام التالية
عادل رمضان - محامي بالمبادرة المصرية للحقوق الشخصية 0102423673
منى سيف ناشطة 0102850271

و تزويدنا بالمعلومات التالية:
رقم القضية
تاريخ القبض
تاريخ الحكم
مكان الاحتجاز
التهمة
و اي ملاحظات اخرى خاصة بالاحداث المرتبطة بالقبض على المتهم