Saturday 29 January 2011

بيان القوى السياسية المصرية الغير حزبية

الشعب يريد اسقاط النظام من اجل العدالة والحرية والكرامة الانسانية

ايها المواطنون والمواطنات, في هذه اللحظة الحاسمة وفي مواجهة محاولة مبارك لإجهاض ثورة الشعب المصري تناشد القوى الوطنية ابناء شعبنا للتمسك بمطالبهم وفي مقدمتها :

  1. استقالة رئيس الجمهورية فورا.
  2. العمل على تشكيل حكومة وطنية مؤقتة من قوى تثق فيها جماهير الشعب ويستثنى منه الحزب الحاكم بكل رموزه وقياداته تكون اولى مهمتها الافراج الفوري عن جميع المعتقلين.
  3. محاكمة المسئولين عن سياسات الافقار والتجويع والتعذيب.
  4. اطلاق الحريات لكل فئات الشعب لتشكيل منظماتهم بحرية.

وحتى تحقيق هذه المطالب, فإننا ندعو كل أبناء وبنات الشعب المصري الى:

  1. اعلان الاضراب العام عن العمل بدءا من غدا الاحد 30 يناير.
  2. تشكيل لجان شعبية بجميع الاحياء لحماية ممتلكات الشعب والمنشآت العامة والتصدي لكل محاولات التخريب التي يقوم بها فلول النظام الحاكم. بتشويه ثورة الشعب واجهاضها.

عاشت ثورة الشعب المصري

كل الحرية للشعب .. كل التفاني للوطن

----

The People Demand the Overthrow of the Regime for Dignity, Freedom, Social Justice

Fellow Citizens,

In this critical time and to confront Mubarak's efforts to abort the revolution of the Egyptian People. We – the political Forces – call on our fellow citizens to hold on to their demands and in its forefront:

  1. the resignation of the president
  2. Forming a Temporary Government from forces trustworthy by the people that excludes members of NDP with all its figures and leaders, its first job being the immediate release of all political detainees.
  3. Taking those responsible for the policies that impoverish and torture
  4. Freedom for all sectors of the population to form their own free organizations

And until realizing these demands we call on all our fellow citizens to:

  1. Announcing a general strike starting tomorrow Sunday 30 January 2011
  2. Forming popular committees in all neighborhoods to protect the assets of the people against all destruction administered by the dying regime to deform and abort the revolution of the people
Long Live the Revolution of The Egyption People

All the Freedom to the People .. All the Loyalty to the Nation


Friday 28 January 2011

خدعة

خدعة اللي بيحصل خدعة عاوزين يمتصوا غضب الناس اللي نزلت وبعدين ترجع ريما لعادتها القديمة مش ناافع الكلام ده
أنا مش عارفة أكتب على تويتر بس اللي بيحصل التفاف حول الأمور

Saturday 15 January 2011

تونس


مبروك للتوانسة
ثورة أصلي خرجت من رحم أمة
ثورة بنت ابوها وامها
ثورة بنت حلال ابوها الشعب البسيط العادي وامها الحاجة والجوع والعوز والبطالة
ثورة بلا شعارات جوفاء
ثورة بحق وحقيقي

نزل الناس بدون أي دعوة
انتشرت الدعوة كما تنتشر نوبة الضحك الجماعي أو دور الانفلونزا
نزل الناس بصدورهم عارية يواجهون الموت
نزلوا وهم موقنون بأنهم ربما لا يرجعون بيوتهم مرة اخرى
نزلوا بلا قائد يدلهم على الطريق
بلا اعلام أو بانرات تصنفهم وتميزهم عن غيرهم أو يحتمون تحت لواءاها
نزلوا مسلحين ببعضهم البعض وبايمانهم ان التغيير لا يحدث الا بأيديهم وسواعدهم ودماءهم
لم ينتظروا لقاء تلفزيوني كوميدي يحركهم
أو تغريدة على التويتر تقول لهم انه لأمر مشين
لم ينتظروا وجود كاميرات التلفزة
لم يهتموا برابطة عنقهم أو بتصفيف شعرهم حتى يطلوا علينا طلتهم اللزجة
نزلوا بلا أي انتماء حزبي أو ديني أو أيديولوجي أو شنكوتي
نزلوا يحركهم حبهم لوطنهم ورغبتهم الجارفة لتونس أحلى واجمل واكثر خضارا
لعلها فرصة لنا كمصريين ان نتعلم الدرس
ونراجع انفسنا مرة اخرى فيما مانقوم به ونسأل هل نحن على الطريق ام حدنا عنه .

داء هذه الأمة نخبتها
علينا ان نقوم بالثورة على النخبة اولا ان نتحرر من تبعية عقول بال وأكل ونام وشرب عليها الزمن
مصر بحاجة الى ناس ناس عادية
ناس لا تحترف الظهور على الفضائيات وبرامج الصراخ والعويل والندب الحواري
ناس عادية سواقين تكاتك وبائعي خضار ومندوبي مبيعات
وموظفين غلابة مش عارفة تكمل ليوم 12 في الشهر .
..........

مصر تحتاج لنشطاء أكثر حبا لبعضهم البعض واكثر ايمانا ببعضهم
نشطاء متواضعون لا يستعلون على الاخرين ولا يتفاخرون بكم الزيارات والمؤتمرات التي حضروها
متى كانت الثورات تنبع من قاعات المؤتمرات ؟
ثورات مكتبية هي ؟؟

ان لم تستطيعوا ان تتغلبوا على احقادكم وعلى اتهاماتكم لبعضكم البعض بالتخوين والعمالة اركبوا مركب النخبة غير ماسوف عليكم
.....................

آخر حاجة آخر حاجة : اضحكني جدا نسب بعض المصريين لما حدث في تونس انه انتصار" للعلمانية " بجد اضحكني اضحكني يعني -بغض النظر ان احنا قاعدين ننظر اصلا على حاجة مش بتاعتنا أساسا وكده بس عادي -
اراهن لو الشهيد- باذن الله -محمد البوعزيزي نازع فتيل ثورة الخضرة لو قلت له انت علماني يا محمد
هيرد يقول لك لأ بس أعرف ناس قرايبي سافروا علمان و بيشتغلوا هناك

Friday 7 January 2011

عاااااااجل

(1)
عااااجل : الريس : عمل حواجبه

حصريييييييي : اكتشاف فرخة بتبيض على سطوح الجيران.
عااااجل : عضو في امانة السياسات اشترى لعبة" انجري بيرد" للأيفون بتاعه .
بريييييككينج :احمد سبايدر نزل تراك جديد اسمه" آه ياسافلة"

بليز ريتوويييييت: مجلس الوزراء يقرر دهن حيطان المجلس بينك في براون وتركيب كرانيش في السقف .

اللي فوق دي كانت أمثلة لنوعية الاخبار العاااااجل والحصرييييي والبليززززز ريتووووووويت على شبكة تويتر الاجتماعية بس بقليل من المبالغة والفانتازي
أصل ده كان حال تويتر بعد تفجيرات الاسكندرية القذرة
كل واحد يسمع أي حاجة من أي حد ملوش أي لزمة أو من عيل صغير في الشارع ينزل بالكلمتين المعجزتين عاجل واختها حصرييي وبنت اختهم بليز ريتووويت كان ينزل بيها على التايم لاين كأنه ويليام والاس وهو رايح يقتل العسكر اللي قتلوا حبيبته
.. لأ ومش يكتفي انه منزل حاجة هو أساسا مش متأكد منها .. لأ كمان يضفي عليها حالة من القدسية والاجلال والأهمية بوضع كلمة
عااااااااجل أو حصرييييي ....قال يعني جاب الديب من ديله .

........
في الوقت اللي البلد كانت مش ناقصة وعلى كف عفريت يجي واحد عااااجل أو حصرييييي يقلب الدنيا وكأن مش مكفينا البلاوي اللي حصلت

............................................................................


(2 )


...............................الحاجة التانية اللي كانت ملفتة وبشدة .... جلد مامة الذات بالنسبة لاخوانا المسلمين
كل واحد عالتويتر بعد التفجيرات كان بيحاول يبين نفسه قد ايه هو كول وايزي خالص مع المسيحيين وقد ايه بيحبهم وقد ايه حاسس
بمشاكلهم وقد ايه زعلان من اللي بيحصل لهم وقد ايه ان احنا ولاد كلب
ده كان فاضل والله اعلم يستحمى بكلونيا- دكتور الشبراويشي - علشان الناس اللي بتقرف ..
جميل جدا أنك تحس بمرارة وألم اللي قدامك والاجمل أنك تحط نفسك مكانه وتشوف يا ترى كنت هتستحمل اللي بيحصل له ده ولا لأ

لكن النفاق واللزوجة وجلد الذات و مسح الجوخ لارضاء الآخر ملهمش أي تلاتة لازمة
عارف ليه ؟ انت اضايقت /ي ؟؟
لأنه في اغلب الاوقات الكلام اللي بيكون طالع من القلب بيدخل القلب بدون أي تملق أو مزايدة.
وصدقني الطرف التاني بيحس وبيوصله اذا كان الكلام ده كلام من القلب ولا بس علشان الشو... وكده حتى لو كنت صادق ومخلص في اللي بتقوله ماتجيش على نفسك قوي كده !

ده كان فاضل واحد- والله - كان ناقص يسب الدين وهو بيشرح قد ايه_احنا المسلمين - مالناش حق في اللي بيحصل !!
وكأن الأمر كله متعلق بسلوكيات الناس فقط
ماانكرش ابدا ان الناس وسلوكياتها الخاطئة وطريقة تربيتها المجرمة في البيت ولمدرسة والشارع هي اللي خلقت الأجواء المكهربة دي بين المسلمين والمسيحيين

بش مانتجاهلش كمان عوامل تانية
تجلت واضحة وبشدة من موقف النظام لطلب المسلمين بحضور قداس ليلة الميلاد
وتعاملهم مع الناس اللي راحوا قد ايه كان وسخ- عادتهم يعني ولا هيشتروها ؟ -
يبقى العيب واللوم ماينصبش فقط على المسلمين
وطريقتهم الفشيخة في معاملة المسيحيين
اللي حصل واللي شوفته ان فلان كان ملكي أكتر من الملك أو كاثوليكي أكتر من البابا نفسه.
مش كده لأ.....
كل حاجة بالعقل يا كوكو
الأوفر اكتينج ده مش حلو- حتى لو كان قصدك خير -
علشان اللي انت بتعمله ده ممكن يقلب بحاجات تانية مش حلوة لا ليك ولا لغيرك
طبعا كل الناس مش هيعجبها كلامي

اقولها واجري على الله واللي يحصل يحصل عادي جدا
دي الحقيقة - من وجهة نظري المتواضعة -
مش لازم علشان نعالج الخطأ نقع في خطأ اكبر اللي هو جلد الذات ومعاقبتها
ودمتم
عااااااجل : العثور على الملابس الداخلية لوزير الداخلية اللي اتسرقت من منشر البلكونة بتاعته ... بليييييز ريتوووويتتتتتتت

Sunday 2 January 2011

اللي حضر العفريت يصرفه

مش هتكلم عن حجم المأساة لاننا مش هبل وكلنا عارفين قد ايه الكارثة
مش " هاقول اني في شيء لله "ولا اني كنت بفكر قبل الساعة اتناشر أكتب على التويتر عبارة بتقول : " اتأخرتوا ليه " حسيتها هتبقى تويتة رخمة وملهاش أي لازمة خصوصا وان الامور كلها كانت على خير مايرام وكنا كلنا بنهني بعض بسنة جديدة و وبنتمنى تكون سنة سعيدة فصرفت نظر عن الفكرة وعن التويتة الرخمة وحمدت ربنا اني فعلا مكتبتهاش لانه بعدها بمفيش ربع ساعة جالنا خبر المذبحة اللي .حصلت
ساعتها كان ممكن أي حد موتور في دماغه أو اتجنن بسبب اللي حصل يقول شامبوا كانت عارفة أو شامبو معاهم .... لأ لأ أنا مش معاهم بس أنا كنت متوقعاهم زي ماجم السنة اللي فات برضه في نجع حمادي وقتلوا شباب زي الورد والشباب اتدفن والدنيا هديت والبابا راح على وادي النطرون باين اعتكف هناك كام يوم والدنيا بقت اناناس
والقتلة فين بقى ؟ اللي اتسببوا في الكارثة فين ؟ في المحكمة يا سيد في المحكمة بيعملوا ايه ؟ بياخدوا حقهم في محكمة عادلة. محكمة عادلة زي بتاعت خالد سعيد كدة... ؟ وليه ماكل حاجة واضحة والناس كلها شهدت بانهم هما اللي عملوا عملتهم السودة ومن اللي وراهم فاضل ايه
.؟ بس يا بنت اخرسي لا تعليق على قضاء مصر النزيه حاضر .
.....................
.... رجعت كل حاجة زي ماهي رجع السلفيين يعووا زي الكلاب في خطاب تحريضي كريه ضد اقباط مصر في الفضائيات ويقولوا
ويعيدوا عن وفاء وكاميليا والمسلسل المكسيكي اللي مخلصناش منه ... عمري ماشفت شيوخ السلف المحترمين دول بيتكلموا عن غلاء المعيشة ولا عن انتشار الأمراض بين الناس ولا عن جور الحاكم وظلمه اتضح بعد كده انهم مبرمجين زي الروبوت على خطاب كراهية قذر مقيت كريه ذو رائحة نفاذة كلام معين بيتملوه من ظباط أمن الدولة ...كانوا بينفذوا اجندة مالصالح أمن الدولة وده مش كلامي ده كان
بشهادة واحد منهم بوب الفضائيات التي تأخذك على الجنة نجم الليلة وكل ليلة شيخ صفوت حجازي .


بعد كده خرج علينا المحترمين بتوع جبهة علماء الأزهر المبجلين ما شاء الله ما شاء الله يقولوا ايه نقاطع المسيحييين ما شاء الله ما شاء الله لا نشتري منهم ولا نبيع لهم ما شاء الله ما شاء الله ... فضلت فاتحة بقي كده وبعدين جه في بالي كفار قريش أما عملوا الصحيفة بتاعة المقاطعة وابو لهب وابو جهل واقفين في كادر مظلم في فيلم فجر الاسلام بيقروا بنود الصحيفة لا يبتاعون منا
لا نشتري منهم لا يتزوجون منا
لا ن مش عارف ايه
كوميديا سودة وملهاة جديدة أسود من ضمن الملاهي اللي راكبينها من تلاتين سنة لا اللي ماسك الملاهي بيموت ولا الزرار بتاع الالعاب
يخرب بيته بيعلق .
موسيقى حزايني كلاكيت ربع مرة وينزل الدكتور محمد سليم العوا بالنكتة الفزورة

خرج علينا دكتور سليم العوا بكلام اعتبرثهأنا وقتها قد جر اليه جرا من خلال اساليب مذيعي الجزيرة حيث ينصبون لك الفخ وانت لاني يا تنصب لهم انت السيرك يا تقع في فخهم وانت وشطارتك
ونزل صاحبنا زي الشاطر في الفخ - ده لو اعتبرناه نزل بفعل فاعل مش بمزاجه يعني -واتهم المسيحيين بوجود اسلحة
الرجل ده كنت فكرة آخر الرجل المحترمين الوسطيين أو ذا لاست مان ستاندينج زي مابنقول
طلع" ممس " هو كمان زي بتوع جبهة العلماء ولا يقل تطرفا عن تجار الفضائيات,,,

كت أنزل بالمشهد قبل الاخير
هناء وشيرين
المظاهرات اللي قام بيها السلفيين في أرجاء مصر كلها واللي ريقنا بينشف علشان نلم خمسة ستة منهم في مظاهرات مناهضة التوريث أو الحد الأدنى للأجور ويعملوا فيها عبده العبيط كانوا بينزلوا بالالاف في المظاهرات دي
والأنكى بقى ان الأمن ماكانش بيتعرض لهم يا حلولي !! الأمن اللي بيسحل ويضرب ويقلع بنطلونات الولاد
ويتحرش بالبنات في المظاهرات كان بيأمن مظاهرات السلفيين ضدد المسيحييين ولم يتعرض لهم ابدا بأي سوء !!!!!
................................
طيب مش كل دي مقدمات تؤدي الى نتايج ؟ وبعدين دلوقت الأمن عامل زي الكتكوت الغرقان في شبر ميه مش عارف يرمي البلوة على مين ولا يقول ايه ولا فيه أي بيان محترم, يشرح اللي حصل أو يقول دوافعه واسبابه- اللي هما اصلا عارفينها كويس- ومخططين لها شبر
شبر وسنتي سنتي



تفخيخ ,بقى عملية انتحارية .... مهلبية مالناش فيه اللي لينا فيه دلوقت ان الداخلية على وجه الخصوص والنظام على وجه العموم حضر عفريت ومش عارف يصرفه
وبعدين ماتنظيم القاعدة هددك من ثلاث اشهر بالويل والثبور وعظائم الامور لو لم تفرجوا عن الاختين الحلوين كاميليا ووفاء قسطنطين
ليه ماعملتش احتياطاتك ؟ فين التغطية الأمنية ؟ فين التخطيط لدحر أي ضربة استباقية ممكن تحصل ؟ الطلبة بتوعك اللي في الأكاديمية أو المحمية الطبيعية دول ماعرفوش حاجة من دي ؟ كيفية تأمين منشأة وأشخاص وصلت لهم بالفعل تهديدات مباشرة وصريحة وواضحة وضوح العادلي في منصبه ؟؟

كل اللي فات ده كان بيأكد لي ان التويته اللي عدلت عن كتبتها كانت حق وانهم اتأخروا بس علشان فرق التوقيت
نحتسب عند الله الضحايا اللي راحوا نتيجة تقصيرنا كلنا شهداء
وندعي لهم بالرحمة

حاجة واحدة بس نفسي اقولها
بنحزن آه وبنكتئب وبيعدي الحزن من قدامنا بيمشي بيرحل بس بيسكن في قلوب أهالي الأبرياء اللي راحوا من غير أي ذنب ... هما بالنسبة لنا آه حدث جلل هزنا وبكانا بس حاجة بتعدي وبننتظر اللي بعده لكن الام أو الاخ أو الاب اللي ابنه أو بنته أو اخته أو اخوه راح في المذبحة دي بيفضل طول الوقت جرح مفتوح وعمره مابيتقفل مهما طال الوقت
اللهم ارحمهم يا رب العالمين ...آمين