Monday 22 August 2011

االوصايا العشرة في حماية الثورة

أولا ألف مبروك لأهلنا في ليبيا وربنا يتم عليكم ثورتكم على خير
بس أنا في قلبي كلمتين كده نفسي يوصلوا لهم وأكيد بعد ماالانترنت رجع طرابلس هيوصل لهم كلامي إن شاء الله .
المثل بيقول ايه بقى ..
الله يخرب بيت اللي اتجوز قبلي ومانصحنيش و ويخرب بيت اللي اتجوز بعدي ومسالنيش
أنا بقى بقول ايه : الله يسامح اللي ثار قبلي ومانصحنيش ويسامح اللي ثار بعدي ومسألنيش"
دي شوية نصايح كدة تاخدوها من اخوانكم في مصر.
علشان احنا ثورجية "سوابق" وكده ..

وطبعا قد نتفق وقد نختلف على ان مصر ليست ليبيا وان الوضع عندكم مختلف بس قشطة أنا هاقول اللي يخلصني من ربنا
طبعا موضوع انكم تشكروا "حلف الناتو " وتقولوا له كتر خيركم جميلكم ده على راسنا اتفضلوا مع ألف سلامة وحشتوا مراتاتكو ده مفروغ منه !!

أولا : ابوس ايديكم واحد واحد ماتسيبوا الشوارع إلا أما كل مطالبكم تتحقق من أول وضع دستور الى تحديد موعد للانتخابات.متسمعوش كلام حد يقول لكم" بليظ جو هووم" دي ابدا ابدا

ثانيا : لو مسكتوا القذافي واولاده بلاش الله يكرمكم انسانيات بزيادة و تدخلوا دور " محاكمات عادلة " دي اديكو شايفين "عادلة" عملت فينا ايه كام خرطوش ثوري كده يخلص المواضيع.

ثالثا : ممنوع منعا باتا نصب منصات وميكرفونات في الميادين يا لهوك يا لهوك لو عندكو واحد زي صلاح عناني ياختييييييي.

رابعا: بلاش والنبي والنبي والنبي "الجيش والشعب ايد واحدة دي" .. خليكو في الشعب يريد اسقاط كل النظام "كله كله" و ركزوا على "كله كله" دي وحطوا تحتها ميت خط .

خامسا :.... نسيت.

سادسا : أما تقبضوا على "كل" رجال النظام علشان تحضروهم للقتل زي مااتفقنا في ثانيا اياكم ثم اياكم ان تضعوهم في سجن واحد حطوا كل واحد في سجن بحيث يكون فيه بين كل سجن وسجن بلدين تلاتة.

سابعا : شيلوا النائب العام لو كان عندكو واحد.

ثامنا : لو طلع لكو واحد لابس كاكي وبيقول تحية لأرواح الشهداء وعمل تعظيم سلام قشطة عادي يعني بس ماتصدقوش أي حاجة غير اللي تشفوه عالارض دستور وانتخابات لازم لازم لازم.آه كمان الرجل اللي هيطلع لكم ده بتاع تعظيم سلام بيتحول بعد شارع شهور من الثورة لسلعوة عندها صباع مدوحس ..بااهي ؟؟
تاسعا : فككوا الجهاز اللي اسمه "الكتائب" ده اللي زي جهاز أمن الدولة يوه قصدي الأمن الوطني عندنا,
ولو حد ضحك عليكو وقال لكم تم "تفكيكه" وتم تغييره الى" الكتاتيب" مثلا وصدقتوا يبقى الله يرحمكو

عاشرا : اوعوا اوعوا اوعى تسمحوا لحد يفرقكم زي ماثورتوا كلكم على قلب رجل واحد واستشهد منكم ليبيين كانوا على قلب رجل واحد
وانجرح منكم ليبيين على قلب رجل واحد , كمان ابنوا البلد على قلب رجل ليبي واوعوا اوعوا تسمحوا لحد يفرقكم لاتحادات وائتلافت شتى ومجلس قيادة الثورة ومجلس رياضة الثورة ومجلس أنس الثورة ومجلس ابتهاج الثورة وائتلاف ام أحمد الثورة وائتلاف عم ابو حمزة الثورة
ربنا معاكم السهل اتعمل ايوة ماتستغربوش من كلمة السهل بناء الدولة ووحدتها ونهضتها هي الصعب اللي مستنيكم وانتم له
ادعوا لنا بقى نخلص البنود العشرة دي عندنا في مصر ونبي

Thursday 4 August 2011

عن حق التصويت للمصريين بالخارج للانتخابات البرلمانية والرئاسية

مجموعة من المصريين بالخارج يبدأون حملة لحق التصويت من الخارج على الانتخابات الرئاسية والبرلمانية, الانتخابات المقبلة ستكون حاسمة في تحديد الدستور والذي سيؤثر على البلاد لفترة طويلة .. نحاول ان نعرف المزيد عن المصريين المقيمين بالخارج لفهم النطاق والجهد اللازم لتشغيل محطات انتخابية خارج مصر ..
من فضلك ادخل وشارك و انقل هذا الموقع لمدونتك حتى نستطيع ان ننشر الفكرة بقدر الامكان
الموقع باللغة الانجليزية
لو المصريين بالخارج قدروا ينتزعوا حقهم في التصويت هتفرق معانا جدا جدا
يلا بينا


Tuesday 2 August 2011

مبادرة لعمل تجمع وطني لحماية اهالي الشهداء

نقلا عن مدونة اجي تايمز

لندخل فى صلب الموضوع مباشرة ,الفكرة تتلخص فى عمل تجمع وطنى على مستوى مصر كلها يضم مخلتف شرائح المجتمع من صحفيين واعلاميين ونشطاء ومدونيين ومحامين مهمتهم الاساسية هى عمل حصر بجميع اسر شهداء الثورة (اسماء-عناوين-طريقة اتصال) ,وتشكيل افرع لهذا التجمع المزمع انشائة فى كل محافظة تتركز مهمتة فى التواصل مع اسر الشهداء ورصد اى محاولات من شأنها ترهيبهم او ترغيبهم للتنازل عن القضايا من قبل المتورطين فى قتل ابنائهم من ضباط وافراد الداخلية ,وفى حالة اثبات وجود اى ضغوط من هذة يتم فضحها اعلاميا مع توفير الحماية القانونية للاهالى والشهود

بشكل اكثر تفصيلا

بفرض ان لدينا 1000 شهيد فى الثورة موزعين على مختلف محافظات مصر ,طبقا للمبادرة سيتم حصر اسماء وعناوين وارقام تليفونات اسرة كل شهيد بحيث تكون معلنة لنا كاصحاب مبادرة ولكافة فئات المجتمع التى ترغب فى التواصل مع هذة الاسر لتقدم لها الدعم المادى والمعنوى , هنفترض انة تم بالفعل انشاء هذا االتجمع وتم انشاء مجموعات لة فى كل محافظة ومنطقة ,اسكندرية على سبيل المثال قدمت للثورة اكثر من 100 شهيد , مجموعة المبادرة هناك ستبدأ عملها بعمل ندوة يحضر فيها جميع اسر شهداء الثورة بالاسكندرية ويتم دعوة جميع وسائل الاعلام والصحفيين والقوى السياسية لحضور هذة الندوة والتى سيعلن فيها الهدف من انشاء المبادرة ,اسر شهداء الثورة ايضا ستتوافر لهم جميع ارقام تليفونات لاعضاء مجموعة الائتلاف بالاسكندرية بحيث يتواصلوا مباشرة معهم ويبلغوهم بأى محاولة للضغط عليهم ليتم فضحها اعلاميا بعدها , ايضا وهذة نقطة مهمة ستكون من مهام التجمع الوطنى لحماية اسر شهداء الثورة متابعة حصولهم على التعويضات ومحاولة ازالة كل العوائق امام حصولهم على حقوقهم المادية , نفس الفكرة التى تحدثنا عنهم فى اسكندرية ستطبق فى اماكن ومحافظات اخرى