Friday 18 November 2011

الصبار


تعبت من الكلام في السياسة
منذ أيام قلائل حلمت بجدي لأمي
"سيد الحكايات" كما كنت اسميه
كان هو مصدري الدائم للبهجة
نصعد سويا لفقاعات البهجة المكتملة الألوان
في حكاياته عن الشاطر حسن و"ام شمندر" زوجة ابو ست الحسن ليه" شمندر" يا جدو ؟
لان رأسه تشبه راس الفجل الأحمر الشمندر

كان جدي المعين الذي لا ينضب من الحكايات والسعادة
كل من يسألني من أين اتيت بكل هذه المعلومات عن مصر وهذه الالفاظ الضاربة في القدم ابتسم واتذكر سيد الحكايات
قررت أمس أن اقوم بزيارة قبر جدو" سيد " أو "بابا سيدو" كما كان يحلو لي ان اناديه
بالمصادفة أمس كان الخميس حيث العديد من الأسر في مدينتنا تقوم بزيارة
احباء غابوا منذ فترة ليست بعيدة واخرون ظلوا على العهد يأتون كل خميس منذ سنوات الرحيل وكأنه موعد أو اتفاق مقدس غير معلن بين هذه السيدة العجوز وزوجها الذي قضى نحبه منذ سنوات بعيدة كما يشير شاهد القبر.
ترجلت من السيارة ودخلت لأرى أطفالا يقومون بملء جراكن المياه لكي يقوموا بري الزرع أمام كل مقبرة أو داخل كل مدفن وذلك حسب اتفاق مالي مسبق بينهم وبين عائلة كل متوفي
دخلت لأفتح باب المدفن فجاء "عم سعد " المسئول عن مدفن العائلة مرحبا
هالني منظر نبات الصبار المزروع في بداية مدخل المدفن الذي يعلوه التراب ويبدو كأنه لم يتم ريه منذ وقت بعيد
سألته متى سقيت الزرع يا عم سعد آخر مرة؟

اخبرني بأنه "يسقيه كل "خميسين" أصل الصبار مايحبش المية كتير وكنت لسة هاجي حالا يا ابله علشان أسقيه"
طلبت منه ان يهتم اكثر بسقاية الصبار
وان يفكر في زرع نوع آخر من الأشجار يحتاج منه رعاية اكثر حتى يقوم بفتح المدفن كل اسبوع على الاقل وليس كل "خميسين"
فأجاب بالقبول
نقدته ماشاء الله من المال ..وطلبت منه ان ينصرف وجلست أنا اقرأ قليل من القرآن و يدي اليمنى تتحسس بداية المقبرة كأنها تتحسس رأس جدي شعره تحديدا .
نهضت .. اغلقت باب المدفن وانصرفت
رأيت كثير من أشجار الصبار وأنا في الطريق
منها الذي ارتوى حتى غرق لأذنيه
ومنها الذي ينتظر قادم يرأف بحاله ويعطف عليه بشربة ماء ومنها من حاول جاهدا ان يبحث لنفسه عن مروىلتستمر حياته فأخذ يخطو بجذوره
حتى خلع نفسه أو خلعته أقدام الزائرين للقبور.
خرجت وقرأت الفاتحة لجميع من أعرف ومن لا أعرف

ودعوت بالرحمة للجميع
وسألت نفسي لماذا الصبار الم يكن طعم مرار الموت كافيا
أم انه الشيء لزوم الشيء ؟
رحم الله أهل الأرض جميعا











Tuesday 8 November 2011

الانتخابات

يسعد مساكم . Link
بقالي كتير مكتبتش على البلوج منه لله التويتر سرقني
ايه يا شمب انت هتندبي ؟

بغض النظر عن اتفاقنا أو اختلافنا عن أهمية الانتخابات وجدواها
وبغض النظر عن جدل البيضة ولا الفرخة
الانتخابات ولا الدستور
بس احنا حققنا انتصار وانتزعنا حق المصريين اللي في الخارج انهم يقدروا يشاركوا في التصويت في الانتخابات

!!
ندخل في الموضوع العاشر نوفمبر ده بداية الميعاد اللي اتحدد لتسجيل المصريين في الخارج على السايت ده لحد يوم 19 نوفمبر مفيش وقت صح ؟
لا إن شاء الله في وقت
الحملة اللي هنعملها هتكون شقين شق هايقوم بـالدعاية والتوعية في اوروبا وأمريكا وجنوب شرق اسيا
والشق التاني اللي هتكون التوعية فيه أهم واكبر للاسباب اللي هقولها هيكون في الخليج
أولا: الخليج مهم نظرة للكثافة العددية للمصريين هناك
الله يخرب بيته حسني مشردنا في كل حته علشان أكل العيش
الاهم من كده ان التوعية في الخليج مهمة قوي مقارنة بـاوروبا وامريكا لان الناس في المناطق دي المفترض ان مستواها العلمي والاجتماعي يؤهلها انها تكون على وعي كاف
مش عاوزة حد يطلع في النص يقول ده كلام طبقي وتعالي على الناس وتنطيط والكلام اللي مالوش لازمة ده
احنا بنقول حقايق
يعني أكتر الناس في الخليج نظرا لحال الراتب مش هيكون عندها
امكانية الدخول على الانترنت ليل و نهار زي اللي في اوروبا وامريكا مثلا
ده غير ان في كتير من المصريين في الخليج هايستتقلوا الدخول على الموقع والتسجيل والكلام ده كله
ده دورك بقى برة يعني تشوف هاتقدر تعمل توعية للناس إزاي
شوف اماكن تجمع المصريين في البلد أو المكان اللي انت عايش فيه و لنك أو اتصل مع ناس تانية في المدن اللي جنبك وانشر التوعية على قد ماتقدر
الوقت ضيق أنا عارفة بس ليس في الامكان ابدع مما كان
اللي مهم في رأيي المتواضع مش ان الانتخابات تحصل في البلد دي المهم أكتر ان احنا نجر رجل المصريين برة مصر للتفاعل مع اللي بيحصل في مصر
مش مهم التجربة تبقى ناجحة بنسبة كبيرة لو نجحنا في جر رجل 40 في الميه من الناس يبقى ده شيء هايل
وأكيد في تجربة الانتخابات التانية والتالتة والرابعة النسبة والوعي هيزيدوا
تنزل توعي الناس تعرفهم مفروض يعملوا ايه اللي ميعرفش يسجل بياناته الكترونيا تساعده انت واللي تقدر تجمعهم معاك
زي ماقلت اروبا وامريكا فيه ناس زي السكر زيك كده هيعملوا نفس اللي انت هتقوم به بس انت اللي عليك العين والنية علشان العدد الكبير
لو فيه بانرات أو فلايرز] صغيرة تقدر توزعها تكون مكتوبة بطريقة مبسطة جدا لأن زي مااتفقنا احنا قصدنا نوصل لكل الناس وخصوصا المطحونين الغلابة اللي بيشتغلوا أي حاجة علشان تفضل بيوتهم مستورة
يبقى المطلوب منك
1- نشر التوعية
2- مساعدة الناس في ادخال بياناتها أول ماالموقع يشتغل
3- توزيع فلايرز بأهمية المشاركة وكدهون
لو أي حد قال ان ده خطر أو حاجة أو ان السفير ممكن يضرك أو يؤذيك حط صوابعك في عينه انت معاك حكم قانوني
ومش بتعمل حاجة ضد القانون ولا بتروج لمرشح أو ايدولوجيه أو حزب معين انت بتوعي المصريين أن لهم حق انتزع من بق الأسد ولازم يستخدموا الحق ده
وربنا معانا كلنا
الله.. الوطن ...الصندوق