Tuesday 31 May 2011

المهنية والانسانية

أول مرة هنا احتاج اني اشرح نفسي وابرر كلامي
لكن اللي بيحصل للاسف من تخوين واتهامات لمجرد أنك اختلفت في الرأي خلاني اسفة أكتب البوست ده
*أولا وقبل أي حاجة و علشان المناهدة المجلس العسكري بيشتغل موظف عندنا ويتحاسب ويتقال له انت غلط في كذا وكذا وكذا دي مفيهاش كلام .
نرجع لموضوعنا بقى
* مهنيا أخطأ محمود سعد عندما لم يعط حسام الحملاوي الفرصة كاملة في شرح وجهة نظره واغلق عليه الهواء .
*- لا أحد فوق المساءلة
*- الجيش وهناك فرق مابين الجيش والمجلس العسكري مفروض عليه رقابة من هيئات رقابية معينة لا يمكنني الفتى باني اعرفها أو أحددها لكن ما اجيش أنا بقى واقعد اقول لازم احاسب الجيش وأنا بدفع ضرايب يبقى اقعد على باب الجيش- مش عارفة فين بس هو كده زي اسماعيل يس أما راح ياخد ايجار المطافي وقسم العتبة- ونبي تكشكشوها متعرضوهاش قوي كده أحسن تتقطع منكم.
المفروض لجان في مجلس الشعب أو لجنة الأمن القومي هي اللي تعمل ده, طيب فين مجلس الشعب ؟ فين لجنة الأمن القومي ؟ طيب هو
ده وقته ؟ طيب مش أما نخرج من ازمة مامة المجلس العسكري اللي قاعد في قرابيزنا ؟. هو كله ضرب ضرب ضرب
اخد الحق حرفة نستنى نخلص من ورطة شاهين ورفاقه وساعتها نفشخ كل اللي محتاج الفشخ وكل اوجه الفساد في البلد بما فيها ميزانية الجيش وأما ساعتها نلاقي ان قضايا الفساد دخل الجيش أو غيره من المؤسسات مش بتلاحق كما ينبغي ان يكون ساعتها أنا كفرد مواطن معني بشأن هذا البلد اتدخل واطالب بالتحقيق والمساءلة
أما قلت ميزانية الجيش خط احمر ماكانش قصدي انه الجيش كمؤسسة فوق المساءلة لكن خط احمر لاخضاعه لنقاش ميزانيته على تويتر وفيسبوك
حقي اني اطالب برقابة مالية على الجيش زي مابيحصل في كل جيوش العالم المحترم .. لكن مش من حقي كفرد اني اقعد واقول تعالى هنا
وريني دفاترك ووريني صرفت كام وعملت ايه لاني ببساطة لا افقه في تلك امور.
هاجت الدنيا وماجت على محمود سعد
و قائمة الاتهامات جاهزة سلفا طبعا بأنه عميل وعبد ولحاس بيادة و.. و... و.. احنا ما شاء الله مانتوصاش
فجأة نسيوا موقف الرجل من يوم 27 ودعوته للناس انها تخرج يوم 27 مايو
وفجأة برضه نسيوا فقرة الدكتور مصعب اللي بسببه هيصدر قرار خلال ايام في ملف مصابي الثورة من مجلس الوزراء وفيه مصادر بتقول ان علاء الأسواني ودكتور ابو الغار هايتم تكليفهم من جهة حكومية رفيعة المستوى بمتابعة ملف مصابي الثورة
اللطيف فعلا ان فيه ناس ألطف اتهمتني أنا باني علشان عملت مداخلة مع محمود سعد يبقى لازم ادافع عنه!!!
المجلس العسكري كمجموعة موظفين بيديروا شأن البلد يجب ان تتم مساءلتهم وحسابهم لانهم ارتضوا ذلك منذ ليلة الحادي عشر من فبراير.
وده أنا أكدت عليه في مداخلتي مع محمود سعد في برنامجه .
الشق التاني بقى إنساني يعني واحد زي محمود سعد اتربى على ان الجيش ده حاجة مقدسة ولا يمكن الاقتراب منها .. دي عقيدته يا جماعة واتفاجئ بكلام حسام الحملاوي مهنيا طبعا كان مفروض ينحي عقيدته دي وتقديسه للجيش ككيان جانبا بس هو فعلا مقدرش يعمل ده
نفرمه احنا بقى ؟ نموته ؟ يفهم غلطه بس من غير كيل الاتهامات يمين وشمال
حد تاني هيقول لي طالما هو مااخدش على جرعة الحرية الجديدة يروح يقعد في بيتهم
اوكي هنخليه يقعد في بيتهم وتعالى انت أعمل الصح على رأي غسان مطر
احنا سقف حريتنا ايام مبارك كان محاسبة نائب رئيس حي مدينة نصر- مش رئيسه -وكان بيبقى اللي عمل كده عمل انجاز
نهدى كده وواحدة واحدة نشرب شوية شوية مش كله مرة واحدةعلشان مانشرقش
وطبعا حد تاني هيقول لي الحرية لا تتجزأ طيب اعملوا اللي انتو عاوزينه بس أنا مش حاظيت, الرجل مهنيا اخطأ بس منعلقلوش المشانق بقى احنا بقينا نترصد الأخطاء لبعض مش أكتر وادل شيء أما يسري فودة قال ماتطلبوش مني اكون قاضي في اشارة الى ماحدث من انتهاكات على يد الشرطة العسكرية يوم 9 مارس المشئوم اتقلب عليه التويتر وتم وصفه بنفس الأوصاف من ذات نفس الكتالوج بتاع الجبن والخسة ولحس البيادة الخ الخ الخ !!
طيب لو هو راجل بيخاف وكافي خيره شره ليه جاب حسام من اساسه؟
طيب لو هو جبان ليه دعى الناس بشكل مباشر وواضح وصريح انهم ينزلوا التحرير يوم 27 مايو ؟
أنا مش بدافع عنه علشان مستنية مكافأة أو حاجة
أنا لقيت ان أي حد بيقع احنا مبنرحموش مفيش تفهم و حطينا نفسنا قضاة وجلادين ومتهمين و مجني عليهم في نفس ذات الوقت
كمان لقيت ان احنا قاعدين نتفرج على سباق التوك شو ومستنيين مين هايفشخ أكتر !! يسري ولا سعد ولا عيسى ولا سين ولا صاد على رأي الله يمسيه بالخير احمد شفيق اللي ويالسخرية القدر أما محمود سعد رفض يعمل معاه حوار أيام الثورة اتشال محمود سعد على الأعناق مع انها كمان سقطة مهنية !!

Sunday 22 May 2011

ليه ؟

أنا مش هتكلم كتير أنا عاوزة اجابة من المجلس العسكري على شوية اسئلة
- ليه دخلتوا ذخيرة لقوات الأمن المركزي ليلة 28 أما الذخيرة من عندهم نفذت ؟
2- ليه موقفتوش تدافعوا عن الناس أما البلطجية دخلوا عليهم في موقعة الجمل ؟
- ليه بعد ماقلتوا هنحمي الثورة وهنحافظ على المظاهرات كهربتوا الثوار يوم 9 مارس 9 ابريل و 15 مايو ؟
- ليه وانت بتعذبوا الثوار وبتضربوهوم وبتشتموهوم بالأم كنتوا بتقولوا لهم حسني مبارك ده
سيدكم
- ليه السرعة الفشيخة في محاكمة الثوار وبطء السلحفاة في محاكمة مبارك واعوانه ؟
- ليه استموتوا في حماية السفارة الاسرائيلية بينما تباطأتم في حماية منطقة امبابة ؟
ليه صور حسني مبارك لسة موجودة في كتير من مناطق التجنيد لحد دلوقت ؟-
- ليه أما كان الهتاف الجيش والشعب يد واحدة كانت ايد في ا يد الشرطه والايد التانية بالسونكي في ضهرنا ؟

Tuesday 17 May 2011

جمعة الأدب

حنا عندنا جمعتين كده
جمعة حنبتديها بالادب.. اللي هي يوم 20 مايو
جمعة "احنا باديين بالادب" اعتراضا على الافراج عن كل من:
مرتضى منصور، فتحي سرور، سوزان مبارك، زكريا عزمي، وحكاية الاعتذار وكلام يحيى الجمل عن قانون المصالحات
واحنا عارفين ان القانون ده والافراجات دي جاية من السعودية رأسا.. ولو احنا عملنا ثورة عشان السعودية تبقى هي الباب العالي كده لازمنا ثورة تانية.. بس احنا مش حنقول كده، احنا حنقول، سيبكم من السعودية والامارات والكويت اللي بتقول ادونا مبارك وخدوا عشرة مليار دولار كأننا رقاصين ومستنيين النقطة... مش عايزين نبص في خلقهم اساسا
بالنوسبة للحجة بتاعة الاقتصاد
احنا مستعدين لتدشين حملة تبرعات لانقاذ الاقتصاد الوطني، قولوا لنا عايزين كام واحنا رقبتنا من مليار لترليون، وحتشوفونا حنعمل ايه؟
شريطة تحقيق المطالب الاتية:
وقف المحاكمات العسكرية بكل اشكالها وانواعها
1- اعادة اعتقال كل من افرج عنهم.. احنا في قانون طوارئ، ولا ايه؟
2- محاكمة مبارك عن جرائم القتل
3- فتح ملف كنيسة القديسين بشكل عاجل وفوري والتحقيق فيه.. والموضوع ده حيقضي على الطائفية خالص
ثبت براءة الاسلاميين من تفجير كنيسة القديسين، وتم الافراج عن كل المتهمين في القضية
طب الكنيسة دي انفجرت لوحدها؟ فيه بلاغ متقدم ان العادلي هو اللي فجرها، والصحف الاجنبية بتقول انه فجرها بناء على تعليمات من مبارك اللي اخد بدوره تعليمات من اسرائيل اللي كانت عايزة تضرب غزة
القضية لو اتحلت واتعمل فيها حكم مافيش حد حيتكلم عن فتنة طائفية تاني ابدا، لا المسيحيين حيتهموا المسلمين، ولا المسلمين حيقعدوا يدوروا للمسيحيين على اي غلطة عشان ما يحسوش انهم هم متهمين لوحدهم
ماهو خلينا نبقى صرحا، المسلمين بيعملوا كده في المسيحيين عشان حاسين انهم متهمين لوحدهم، والشهادة لله المسيحيين مش مقصرين في الموضوع ده، وكل ما بيتهموهم اكتر، كل ما المسلمين بينكشوا عليهم شعرهم اكتر، فالتانيين بينكشوا شعرهم عليهم راخرين لانهم بني ادمين مش كنب يعني.. وهكذا
حلوا لنا الموضوع ده من جدوره.. الاتنين اهبل من بعض وحيبوسوا بعض ويعيطوا لما كل واحد فيهم يعرف ان التاني مش متهم
4- تقديم مبارك الى محاكمة عسكرية بتهمة الخيانة العظمى
المشير طنطاوي في خطابه لدفعة الشرطة المتخرجة حديثا قال بالنص "طلب منا اننا نفتح النار على المتظاهرين وكان قرارنا بالاجماع لأ مش حنفتح النار على المتظاهرين" لا والشرطة صقفوا.. صقفوا للجيش عشان ما فتحش علينا النار وهم اللي نالوا لوحدهم شرف فتح النار علينا
5- الافراج عن كافة المعتقلين في حادث السفارة الاسرائيلي
6- الافراج عن كافة النشطاء اللي اتقبض عليهم في المحاكمة العسكرية.. خصوصا
عمرو البحيري
7- وقف المحاكمات العسكرية للمدنيين بشكل فوري
شوفوا الادب؟
شوفوا الاخلاق؟
شوفوا الاحترام؟
عدانا العيب؟ اذا كان على الفلوس بنقول لكم رقبتنا... اعلنوا عن حملة تبرعات وشوفوا المصريين بقى، وبالسلامة استثمارات الخليج الى غير رجعة
جمعة 27 بقى حتبقى جمعة قلة الادب.. اديني قلت اهو

Monday 9 May 2011

خزعبلات

تعودنا دايما اننا ناخد أي كلام من أي حد وكأنه مسلمات غير خاضعة للنقاش ولا جدال عليها .. زي مثلا اكذوبة ان الطفل المصري اذكى طفل في العالم أو ان الولاد المصريين جاذبيتهم لا تقاوم بالذات عند أهل الخليج والأوربيين وخصوصا الايطاليين ,

تمام كده اخدنا مسلمات كتيرة عن المسيحيين في مصر من غير مانفكر فيها أو نعديها على التجويف المليان مهلبية اللي فوق عنينا .... أخدت اراء المتوترين عن اهم الخزعبلات دي وكانت الردود كالتالي

المسيحي ريحته وحشة

ودي ردي عليها يتلخص في أنا أي حد فينا ممكن ينزل المترو ويركب تلات محطات بس وساعتها هيكون عنده يقين ان البلد كلها ارتدت وبقت مسيحيين . وليه تروح المترو ده أيام التحرير أما الدنيا بقت حر شوية قررت بيني وبين نفسي انه لازم يكون فيه جمعة اسمها جمعة مزيل العرق أو جمعة الديودرانت .

المسيحي اكله طعمه غريب

ده على أساس ان المسيحيين بيشتروا الخضار بتاعهم من جزر القمر والمية اللي بيطبخوا بيها بتيجي لهم من نهر الأمازون أو الميسيسيبي على افضل الفروض مش استغفر الله العظيم بياكل من نفس الخضار اللي مروي بمية الصرف الصحي ولا بيشرب مية التيفود بيرعى فيها .

المسيحي مزيت :

طيب بذمتك انت مصدق الكلام ده ؟ دهاحنا كمصريين ممكن ندخل موسوعة جينس للأرقام القياسية لتعدد أنواع الزيوت عندنا .. خد عندك زيت حار وزيت زيتون وزيت تموين وزيت عربيات وزيت درة وزيت الكافر أو مايعرف بزيت عباد الشمس .

المسيحي لونه مصفر

حوش حوش الشقر اللي بتتكعبل فيهم في كل حته واللي الدموية والصحة هاتبظ من وشهم ولا عندهم أمراض سوء تغذية ولا واخدين دهبية العالم في أمراض الكبد وفيروس سي ومحتفظين بها بلا منازع تلاتين سنة .

المسيحي حريف في السحر والشعوذة وبيعمل اعمال ماتخرش المية.

كانوا عملوا لنا كلنا عمل بخيبة الامل أكتر من الخيبة اللي احنا فيها دي ده غير ان الاحصائيات بتقول ان العالم العربي صرف على اعمال الدجل والشعوذة السنة اللي فات بس خمسة مليار دولار كان نصيب المصرييين منهم حوالي 10 مليار جنيه مصري وده مش كلامي ده كلام الدكتور محمد عبد العظيم الخبير بمركز البحوث الجنائية والاجتماعية بالقاهرة ...طيب مش كان أولى بيهم يعملوا اعمال للناس اللي مطلعة عنيهم ومخلينهم مش عارفين حتى يصلوا ؟؟


المسيحيين عندهم اسود واسلحة جوه الأديرة والكنائس

آه بدليل ان الأسلحة دي كلها طلعت أيام الثورة ايشي دبابات وايشي طيارات واشي بوارج واللي كان بيشرف على تدريب الأسود والنمور جوه الكنيسة محاسن الحلو واخوها محمد الحلو تأكيدا لروح الوحدة الوطنية