موجودة

الثورة موجودة عايشة ومامتش زي مابعض المتشائمين بيقولوا الثورة في ضحكة علاء النهاردة الضحكة اللي حابسة وراها كل سجانينه موجودة ومستمرة في صرخة خالد أما يخرج من بطن امه يلاقي ابوه مش أول واحد يشيله بس هيلاقي مصر كلها حضناه كل مرة العسكر يضرب فيها بقوة وغل وغباوة دليل أكبر على وجود الثورة أصله لو مش عارف قد ايه احنا خطر عليه لا كان ضرب ولا قتل ولا سحل موجودة كل ماعند الداخلية يزيد وهي بتحاول ترجع تاني تكسر نفس المصري وعزته وتلاقي عناد مالوش حد موجودة محفورة على كف آخر خمسين شهيد ماتوا في محمد محمود الثورة موجودة طول ماتويتات رامي محسن اللي البعض بيعتبرها مستفزة كل مارامي يغرد عن الثورة كل مااتاكد اننا موجودين الثورة موجودة في وش كل واحد ماشي وبيتكلم في السياسة وبكرة هيكون عامل ازاي موجودة .. موجودة أما بتلاقي واحد بيشتم في الثورة والثوار في الميكروباص واول ماينزل ويحاول الأمين يرخم عليه زي زمان يشخط بعلو حسه لااااا فووووق الكلام ده كان زمان احنا في ثورة.
موجودة حتى اسأل جمال مبارك المسجون في طره واللي كان مفروض بيحضر نفسه لانتخابات الرئاسة موجودة وأسأل ابوه وامه واخوه اكبر دليل على اننا في ثورة.
بتوه ساعات بس بترجع تاني مكانها مفيش حاجة بتفضل على حالها, لكل جواد كبوة واحنا زي الحصان الاصيل يمكن نقع يمكن تغلبنا الحواجز أو تكون عالية علينا بس إن شاء الله هنوصل لأخر السبق وهانفوز