Sunday 25 December 2011

كتابة الاستربتيز.. وحقوق الإنسان التي سقطت

طالعتنا جريدة الوفد الغراء بمقالة نارية تنينيه كتبتها الأستاذة لميس جابر ولمن لا يعرف لميس جابر هي السيدة التي كتبت حلقات مسلسل الملك فاروق وفيلم مبروك وبلبل وزوجة الفنان يحي الفخراني
لم أتمالك نفسي أنا وغيري من الرزع على صدورنا وقولنا يا ساتر يا رب “ تسقط حقوق الإنسان ” ؟ !1 أنت بتتكلمي بجد يا لميس ؟ في الأول افتكرت أن العنوان للفت الانتباه ليس أكثر لكن يبدو أنها كانت تعني كل كلمة في الجملة
كل اللي هاقدر اعمله إني- بعد ما ادعي ربنا باللي في نفسي- إني أفند كلامها لأنه سهل جدا لطالب في رابعة ابتدائي يفنده
بدأت لميس تقول :
ما حدث في الأسبوع الماضي في منطقة مجلس الوزراء ومجلس الشعب والذي أسفر عن مكسب حضاري رائع وهو حرق (المجمع العلمي) الذي هو أحد الكنوز المعرفية النادرة ليس علي مستوي العالم العربي ولكن علي مستوي العالم كله.. بعد هذا الانجاز الثوري حاولت الفتاة ذات العباءة المفتوحة (أم كباسين( “
فعلا يا ست الكل ما حدث في الأسبوع الماضي في منطقة مجلس الشعب ومجلس الوزراء أسفر عن خسارة “إنسانية “ مقدارها حتى الآن 15 نفس بشرية . بشرية اللي هو الإنسان خليفة الله في أرضه وليس الكتاب مع احترامنا كل الاحترام للكتاب وقيمته ودوره … فما قيمة الكتاب سيدتي الفاضلة لو لم يخلق الله بشرا ليقرؤوه
؟ … نعم يا أستاذة كانت فضيحة على كل المستويات و بالنسبة لما أسميتها بـفتاة “الكباسين” نسميها نحن ” ست البنات” وتاج رؤوسنا جميعا رجالة وستات … أما بالنسبة لحكاية الكباسين فمكنتش أنا وغيري نعرف إن لبس أي شيء يحتوي على كباسين هو وسيلة إغراء جديدة … يعني مثلا لو أنت لابسة بلوزة بكباسين ودخلتي على رئيس تحرير جريدة الوفد مثلا هيقول في سره : ” ده إحنا ليلتنا فل أو الليلة خمر وغدا أمر ” مع استبعاد انه هيقول كده خالص لأسباب أنت أول من يعلمها .
.
أبسط مثل على دحض افترائك بقيمة المجمع العلمي أمام قيمة الإنسان … تخيلي كده لا قدر الله إن ابنك الصغننن جوه فيلتكم المتواضعة وحصل حريق داخل الفيللا مركزه مكتبة حضرتك القيمة اللي مليانة من أمهات الكتب أشكال وألوان هل ساعتها كنت هتقولي التراث التراث ابني مش مهم خلاص ؟ .؟ . أشك .
هل نسيت قول رسول الأنام عليه أفضل الصلاة والسلام عندما كان سيدنا عمر يدور حول الكعبة المشرفة مبديا إعجابه بها عارفة سيدنا محمد ة رد على اعتزازه بالكعبة قال له إيه ”لأن تهدم الكعبة حجرا حجرا أهون عند الله من أن يراق دم امرئ مسلم” …… انتحر الكلام يا ابتسام
وبعدين قلت :
عمل نوع من الاستعراض و(الإستربتيز) حتي تنهمر الكاميرات فوق ملابسها الداخلية ليصبح جندي الجيش المسكين هو السفاح الذي يهتك الأعراض ويسحل النساء في الشوارع.. وحاول الاخوة الثوريون المحرضون أن يتم هذا الاستعراض ويتم تداوله وتوزيع آلاف الصور منه حتي نتلهي في أعراض حريم الشعب بدل حريق تراث الشعب وحتي تخرج علينا الست كلينتون وتهددنا بحقوق الإنسان.
يا أستاذة لميسوف .. الاستربتيز حصل فعلا والشو بتاع البورنو والله وقع حقا بس عارفة حصل امتى ؟ أما جندي الجيش المصري وعلى رؤوس الأشهاد جميعا شرق وغرب شمال وجنوب فتح لمؤاخذه في دي الكلمة ” السوستة ” ولوح بعضوه الذكري من فوق مبنى مجلس الوزراء هو ده الاستربتيز اللي يمكن كنت تقصده واتلخبطي ‘؟؟ . لو حد قال لك انه كان بيتبول علينا من عل اوعي تصدقي المحروس كان مخرج عضوه الذكري علشان يطفي حريق المجمع العلمي اوعي تصدقي أبدا انه كان بيبول علينا من فوق اخصي !
رجعتي تاني تقولي :
ما حدث يا أعزائي في الأسبوع الماضي وتفاصيله الصغيرة جعلني أغير آرائي تماما وأعيد ترتيب توقعاتي من الأول.. كنت من قبل كئيبة ومتشائمة وأنا أحذر من السقوط والتداعي والانهيار ولكن الآن أنا لا أحذر بل أدعوكم معي لمشاهدة ومتابعة السقوط الهائل في مراحله النهائية المشوقة وعندما أعرف القناة الفضائية التي سوف تأخذ حق البث المباشر للسقوط حصريا سوف ألفت نظركم لنلحق بهذا الحدث الذي لم يتكرر مثله منذ دخول الجيوش العثمانية إلي مصر وهذا بفضل حقوق الإنسان. ”
وأنا من مزنقي هذا بحب ابشرك واقول لك ان كلنا إن شاء الله هندعوك لمشاهدة نهاية السقوط الهائل سقوط الظلم والفساد وانتهاك الحريات … سقوط كهنة عواجيز وكهنوت كان يعتقد انه يستطيع ان يستمر في حكمنا واذلالنا بمزامير قديمة اكل عليها الزمان وشرب … غالبا يا لميسوف هيكون اسم القناة الفضائية اللي ها يتذاع عليها مشهد سقوط التماثيل دي هو “ حرية “ بعدين.. بالمناسبة دخول الجيوش العثمانية هو اللي جاب لنا أحد أفراد هذه العائلة الرشيدة اللي فضلتي تتباكي عليه طول شهر رمضان ولا فاروق الأول ده من الكونغو برازافيل ؟
ثم تساءلتي :
“وأتساءل ويارب يقرأ أحد أفراد المجلس العسكري الموقر الذي رغم كل شيء مازلت أبجله واحترمه وأدعو الجميع للوقوف معه ومؤازرته ضد هجمات التتار والمغول ولكن لابد لكي تستقيم الأمور أن يقف المجلس العسكري أولا بجوار نفسه وبجوار الوطن بقوة وحسم وردع ولكنه يخشي منظمات حقوق الإنسان إلي يومنا هذا.
يا مجلسنا العسكري في أي بلاد العالم النايم والقايم والمتحضر والمتخلف يسمح لبعض الصبية مدمنين (الكوللة) وأطفال الشوارع ومحرضيهم من جماعات ابريل ومايو ويونيو بالاعتصام ونصب الخيام والرقاد أمام مدخل مجلس الوزراء ومجلس الشعب؟
سبحان الله يا جدع مش افراد المجلس الموقر – رغم كل شيء – مش هم دول نفسهم ورثة العسكر اللي عملوا انقلاب يوليو على ابو عيون جريئة وطردوه من البلاد شر طرده ولا دول عسكر تانيين ؟ عجبت لك يا زمن .
اقولك أنا بقى في أي بلاد العالم المتحضر مبيحصلش اللي حصل ده أولا تعالي نتكلم عن مدمنين الكولة .. مش ذنبهم على فكرة يبقوا مدمنين كله ولا ذنب اهاليهم اللي لو اصلا لقوا تمن الكله هما كمان حيقبلوا عليها وهايدمنوها ويشموها علشان ينسوا الغلب اللي هما فيه هما واهاليهم ولو ان اطفال الكله دول اشرف واشجع من مدمنين المونت ديو والبلاك ليبل والتيكيلا ومشكلتهم ان معندهمش اب مثلا بياخد في المسلسل الواحد ستة.. سبعة مليون جنيه في حين ابوهم مش لاقي سبعة أو ستة جنيه يشتري بيهم عيش وفول مدمس يسد به جوع اولاده .. بالمناسبة الدكتور الفخراني اخد كام في مسلسل قصص الانبياء /. مش اقل من 2 أو 3 مليون طبعا الاجر قل علشان كان طالع بصوته معلش تتعوض رمضان الجاي إن شاء الله . بالمناسبة الشيخ عماد عفت والشهيد علاء عبد الهادي والطفل عمر السيد مكانوش مدمنين كله كانوا للاسف مدمنين حب الوطن لذا لزم التنويه .
لو كان المجلس يخشى ربنا – مش حقوق الإنسان – ماكانش عمل اللي عمله ماكانش ضحيانا يتداس عليهم بالبيادات و لا يترمي شهدائنا في الزبالة ولا تتهرس صدور بناتنا - اللي لابسين عبايات بكباسين للمصداقية – بالنعال ما بالك بقى بمجلس لا يخاف الله هيخاف بتوع حقوق الإنسان ازاي ؟
قلتي كمان :
في أي بلد في العالم يتبادل الحكام وأطفال الالتراس التهم وإلقاء الحجارة ويقيمون السدود الأسمنتية والأسلاك الشائكة ونسمع عبارات مثل التفاوض والهدنة وخطف الأسري والحوائط البشرية وخارطة الطريق ولن يتبقي سوي أن نعرف مواعيد فض الاشتباك الأول والثاني؟
أنا مش عارفة أقول لك ايه ؟ روحي اسألي كده في كل اعتصامات العالم واقربها” لوندون ريوتس ” أو احداث شغب لوندون أو في اعتصامات”" اكيوباي وول ستريت ” هل حصل اللي أنت بتسألي عليه ده ؟ بناء سور من السلك الشائك أو بناء حوائط ؟ رغم كل العنف اللي كان حاصل في احداث شغب لوندون على سبيل المثال مسمعناش انهم بنوا جدران عازلة أو وضعوا اسوار شائكة وده ليه ؟ سألتي نفسك ليه ؟ لان القوات اللي جاية تفض الشغب ده جاية لوظيفة معينة ومهمة محددة وهي فض الاعتصام والشغب بدون أي تاريخ اسود ولا تار بايت بينها وبين المعتصمين جايين يفضوا بدون قتل أو عنف أو اذلال جاييين من غير شحن معنوي زي اللي حصل لجنودنا ان اللي في التحرير دول اعضاء الوطن واللي ناويين يخربوه كم من المهازل تحدث باسمك يا احمد يا سبع الليل… عارفة يا لميس أسوء حاجة عملها الشرطيون في نيويورك علشان يفضوا الاعتصام ايه ؟ رشوة شطة حارة على الارض علشان تحرق لمؤاخذة مؤخرة المعتصمين و ده كمان ماكانش مقبول ده اتعمل لهم فضيحة بجلالجل و الشرطي للي عمل كده بيتحاكم ومنتظرين حكم رادع على جريمة رش الشطة الحراقه آه والله مابهزر عندنا هنا لم يحاكم القتلة لم يحاكم مستخدمي الرصاص الحي أو الغاز الذي لا نعرف كنهه حتى الآن … عرفتي بقى الاخفاق جاي منين ؟ خيبة قوية بعيد عنك وفضيحة أما تسمعي عن جدران عازلة في قلب القاهرة آخر عهدي الجدران كان جدار برلين والجدار العازل في غزة .. آه آه والجدار المسخرة اللي اتبنى قدام سفارة اسرائيل ده أنا ناسيه بلا نيلة والله .
أنت بتقولي
في أي بلد في العالم تتم مهاجمة وزارة الداخلية بالطوب والحجارة والمولوتوف والمنجانيق والسباب؟ وفي أي بلد في العالم يتبول الصبية علي وزارة الأمن لديهم ويعبر الحدث دون حسم وردع وعين حمراء حتي يلحق به حادث السفارة الإسرائيلية ويلحق بنا إعلامنا الواعي الوطني ليجعل من متسلق المواسير بطلا قوميا أسقط العلم ويصرح بعض المضللين بأن إسرائيل مابتنامش الليل من الرعب والخوف من القوة الشعبية المصرية الجبارة والتي سوف تزحف إلي الحدود وتبتلع «إسرائيل» علي حد قول أحد المثقفين؟
أولا محصلش ان حد رمى مولوتوف ناحية وزارة الداخلية ولا حجارة ولا نيلة الكلام ده كان في ايام الثورة الاولى بعدين ايه حكاية المنجانيق دي ؟ هو فيلم الناصر صلاح الدين مأثر على عقلك الباطن قوي كده ؟ منجانيق ايه يا حاجة ؟ المنجانيق ده محتاج آلة قديمة جدا ترمي من عليها كرات اللهب من على برج عااااالي مش موجود دلوقت ولا فيه امكانية تحقيقه لان الناس اصلا مش عارفة تاخد نفسها تقولي لي منجانيق .. اين الدمشقي ؟ فين عيسى العوام يشوف الغلب اللي إحنا فيه ؟ فين فرجينيا ؟
وبعدين هو أنت لسة هتتكلمي عن احداث سفارة اسرائيل ؟ ينفع الكلام ده ؟ أنت مطبعة ؟ قولي متتكسفيش والله عادي يعني ايه الغلط في احداث سفارة اسرائيل ؟ أمال لو كنا عملنا زي الايرانيين بقى واقتحمنا سفارة امريكا يا لهوك كنت قلت علينا ان إحنا احفاد ام لهب روحي يا شيخ… الله يسامحك .
وآه اسرائيل مابتنامش الليل من ساعة ماعرفت ان البلد دي فيها ستا ت – بكباسين- ورجالة- بزراير- مش هيسكتوا على الظلم تاني ولا هيهيصوا لحد تاني ولعلمك نتنياهو نفسه مرعوب وبيغير البامبرز كل ساعتين هو ده يزعلك في حاجة ؟ أما نرجع تاني مهابين الجانب ولينا وزن وكرامة ؟ ولا أنت اتعودتي على حفلات السفارة والتورته في عيد ثورة يوليو وكده قولي لي بس علشان ابقى فاهمة واعذرك !
رجعتي تاني تقولي :
ومع هذا التدليل المتواصل من المجلس وصلنا إلي الأحداث الأخيرة وكان أن لعب بعض المعتصمين الكرة فسقطت داخل مجلس الشعب وكان أن تسلق اللاعب الأسوار لإحضار الكرة من داخل المجلس وانظر يا عالم يا إنساني وانظروا يا حقوق الإنسان لقد تم صعق هذا اللاعب البريء بالفولت العالي وتم سحله علي الأرض وضربه وإلقاء القبض عليه وغالبا سابوه يروح بعد شوية وتوالت الأحداث من اقتحام غرفة كاميرات المجلس الثابتة لأنها قامت بتصوير المعتصمين وهم يلفون سجائر الحشيش وتصاعدت الأمور وأشعلت الحرائق وألقي بالمولوتوف وتم اطلاق الرصاص وسط المتجمهرين فأصبح المجلس هو السفاح والقاتل ومشعل الحرائق وهاتك أعراض النساء وساحل الشباب علي الأرض.. و… وكل هذا ومازال المجلس يخشي منظمات حقوق الإنسان وإذا كان لا يعلم فهذه المنظمات هي السلاح الذري الجديد المصمم خصيصاً للناس اللي زينا يا سادة التاريخ لن يسامح الضعفاء.. ولتذهب حقوق الإنسان إلي الجحيم.”
تدليل تدليل أنت بتقولي تدليل ؟ الهي وانت جاهي تدلليي التدليل اللي إحنا بنتدلل بيه من المجلس ..وعليك منيو التدليل : تدليل بالسحل.. تدليل بالضرب الموجع وتكسير العضم.. تدليل بالخطف.. تدليل بالشتيمة بـأقذر الالفاظ .. تدليل بالتحرش للبنات - أم عبايات بكباسين و جينز بسوسته.. تدليل بالمحاكمة في 24 ساعة .. تدليل بالحبس غير القانوني.. تدليل بحرمان اب من حضور ولادة ابنه.. تدليل بالغاز الخانق الحارق.. تدليل بالرصاص المطاطي.. تدليل بالخرطوش.. تدليل باللحمة الضاني .. تدليل بالكوسة … واخيرا تدليل بـ فقأ العيون.. وتدليل بالرصاص الحي”.. قدامك المنيو شوفي انهو تدليل يناسبك يا حاجة واحنا - قصدي – والمجلس حاضر وجاهز لتوصيل طلبات التدليل للمنازل كمان .
على فكرة احترمت وجهة نظرك زمان وأنك مختلفة مع الثورة لاني مش لازم اكون نسخة منك ولا أنك تكوني نسخة مني.. انما لا احترم تدليسك وعوارك الأدبي الذي كتبتيه وساعة ما يحصل وإن شاء الله الثورة تنجح وتكوني مطلوبة للمحاكمة على ما اقترفتيه من تأليب للشارع على ثوار اطهار… كل الناس وأولهم الثوار هيطلبوا يحاكموكي وفقا لحقوق الإنسان

Monday 12 December 2011

مصر ليست القاهرة !

مصر ليست القاهرة

بيقولك الشارع مش مع الثورة !

طيب ماهو لازم الشارع يبقى مش مع الثورة بعد ماالثوار بطلوا يتكلموا بلغة الشارع ومبقوش يتكلموا غير لغة " فيما يبدو... ومما لا شك فيه... والآليات .. وينبثق اللي هي من الاخر لغة القنوات الفضائية اللي أفسدت الثوار ..وعلى فكرة مش بس ماسبيرو والقناة الاولى والفراعين هما اللي تسببوا في عزوف الناس أو الشارع بوجه عام عن الثورة, لأ.. ده كمان الظهور المبالغ فيه لمن يطلق عليهم مجازا" النشطاء" أو شباب الثورة" ايوة هما كمان السبب أضواء الاستديوهات و الكاميرات ومين هيطلع فين كمان افسدتهم ده أنا ساعات الخيال بيشطح بيا وبقول ان دي نظرية المؤامرة اللي موجودة في جنات كل مصر نظرية المؤامرة تبعي انهم يغرقوا الشباب الطاهر بتاع خمسة وعشرين يناير لحد ودانهم في أضواء الشهرة والمجد علشان يبعدوهم ويفصلوهم عن الشارع .. وقد كان .

نرجع تاني للغة الخطاب الشوارعي ايوه هو كده مش هو من الشارع والى الشارع يبقى شوارعي... مش مقعر أصل احنا مش هنعمل ثورة في قهوة ريش أو صالون العقاد.. علمونا في التحرير ان الثورات بتحصل في الشوارع .

يعني مثلا أما واحد يكتب ايفينت عالفيسبوك أو التويتر ويقول : فيه النهارده ندوة في " تحرير لاونج" - خد بالك ماقالش" التحرير لاونج" لأ تهرير آه خواجه خواجه يعني ماعلينا .. أما يقول فيه ندوة في" التحرير لاونج" لمناقشة مقاطعة الانتخابات أو المشاركة فيها .. اقول ايه أنا لعم سامي زبادي البقال اللي في أول شارعنا ؟ اقول تعالى نناقش الانتخابات يا عم سامي في التحرير لاونج ؟ والله كان ضربني بسكينة الجبنة الرومي اللي قدامه

عنوان الندوة اصلا مبشر جدا.. بس تعالى بقى وقول لأي واحد في الشارع فيه ندوة في تحرير لاونج أو فيه دورة تدريبية لمراقبة الانتخابات في" ايوارت هول" في الجامعة الأمريكية ...روح كده قول لواحد كفران نازل من ميكروباص العتبة بيجري علشان يلحق ياخد اتوبيس 65 اللي رايح" الدويقة" و"منشية ناصر" ..قول له تعالى تحرير لاونج أو ايوارت هول .. هتسمع كل انواع الشتيمة اللي سمعتها واللي عمرك ماسمعتها قبل كده ده غير طبعا الكلاشيه الشهير يا متموليييين.

الناس كلها كانت حوالين الثوار علشان كانوا بيناموا مع بعض في الشارع, بيتكلموا نفس اللغة البسيطة , بيشربوا من قزازة ميه مالينها من الكولدير اللي على أول شارع محمد محمود .. وبياكلوا من على نفس عربية الفول اللي في الشارع الجانبي اللي قبل ماكدونالدز .

ده يودينا بقى للسبب الأساسي لكتابة الكلام ده مصر ليست القاهرة يا سادة

في الأرياف الناس بتقول وهي نازله القاهرة : احنا مسافرين مصر ويبدو أن الناس في قاهرة المعز أخدت الكلمة دي من على لسان القرويين والبسطاء أمثالي وحلفوا ميت يمين ان مصر هي القاهرة .. لا يا اخوانا مصر مش القاهرة ... مصر قطور وبنها والسنبلاوين وديروط وبور توفيق والسنانة والحامول مصر مش التحرير لاونج ولا ايوارت هول ولا مسرح الاوبرا .. مصر ينفع تبقى مؤتمر انتخابي كبير لو نزلنا لكل الناس عالقهاوي البسيطة اللي كوباية الشاي فيها بخمسة وسبعين قرش .. مصر هي قاعات الافراح الشعبية اللي نقدر نعمل فيها مؤتمرات توعية. أصل انت لو دعيت الناس الطيبة يروحوا الريتز أو الكونكورد- وبتدعيهم بقلب جامد يعني مش عزومة مراكبية- الناس دي أصلا هاتتكسف تروح علشان هما طيبين ومش متعودين على ريحة الهوا المتكيف ولا الصالات القزاز والأرضيات اللي بتلمع .. لكن لو رحت لهم لحد عندهم هيسمعوا لك و يطمنوا وكمان هيعاملوك كأنك واحد منهم , ساعتها بس الشارع هيرجع تاني معاك .

عاوز الثورة تستمر أنزل للناس في الشوارع اقف مع الستات اللي بتنقي طماطم من على عربية الخضار مش بس بتوع هايبر ماركت أو مترو روح عند أي محل بيبيع فول وطعمية وكلم الناس . فهمهم بلغة بسيطة بدون تعالي وبلاش ابوس طراطيف صوابعك بلاش تحشر" الانجليش لانجويج " في كلامك وانت قدام موظفة بسيطة كانت آخر علاقة بينها وبين الانجليزي كتاب ويلكوم تو انجليش" مش حتى كتاب هالو" . كلموا الأغلبية الصامتة الطيبة اللي قلبت الموازين ونصرتكم ال 18 يوم الأسطورة بـلغة طيبة زيهم .

كلامي طبعا مش تعميم لأن فيه ناس فعلا نزلت الشوارع زي الناس بتوع" اللجان الشعبية لحماية الثورة" بدأ يبقى لهم صوت ووزن في شوارع مصر يعني في المنصورة و اسكندرية وبورسعيد ودمياط والمنوفية .. كمان الولاد اللي زي الورد بتوع" توييت شارع" اللي بينزلوا ومفيش جواهم أي دافع غير حبهم وخوفهم عالبلد دي وشباب حكاوي التحرير اللي بيلفوا مصر بطولها وعرضها من اسكندرية لأسوان لانهم فهموا واقتنعوا وعرفوا ان مصر ليست القاهرة .

*عالواقف : دخول الطبيب حازم شومان حفل بجامعة المنصورة وصراخه في الولاد والبنات اللي معهومش فلوس يروحوا كايرو جاز أو يدفعوا تمن تذكرة لفرقة" مشروع ليلى" بأن الموسيقى حراااااام ومزمار الشيطاااان .. وحياتك يا دكتور حازم نوادي القوات المسلحة بيتعمل فيها حفلات من النوع ده وأكتر ده حتى أصحاب الافراح اللي بتعمل هناك بيجيبوا راقصات وغوازي والعياذ بالله ابقى روح قول لهم البقين دول لو تعرف ورفعا للحرج عنك وعلشان اريحك مش هتعرف لان النوادي دي بتمنع بشكل غير معلن واحيانا معلن بتمنع الملتحين والمنقبات من الدخول ليها اصلا ..هع .