Wednesday 28 April 2010

المسقعة


استشعرت شامبو حركة غريبة خارج منزلها جيران كثيرون قدموا إلى بيتها -على غير العادة -

في وقت القيلولة حيثو كله نايم وهمدان

فتحت الباب لترى مايجري في الخارج

بادرها جارها الطيب دايف قائلا بلكنة انجليزية قحة كونجراتيولاشنز يا" مزة "- هو قال يا مزة بناء على طلب شامبو اللي اقنعته
إن ده

النيك نايم بتاعها في وطنها الأصلي شمبونجا العظمى

المهم

في إيه يا جودعان ؟
دايف الطيب : لثورة قامت في دولة شمبونجا

بتقولوا إيه يا ولاد

في شمبونجا

كمان تاني كده

شمبوونجا

طب وحياة النبي لتقولوا تاني

شمبووووونجاااااااا

هوورااااايييي

هبلة

عباطيتو أصْلي


والناس بيبتسموا ومش فاهمين هي بتقول إيه

الواقع

كانت بتغني ترقص وتصرخ بهيستريا فظيعة

للامانة وللتاريخ كانت بتغني اغنية ابو الليف الاشهر

"أنا مش خرونج أنا كينج كونج "

جريت بسرعة على التلفزيون فتحت على الفضائيةالشمبونجية كان شغال مارشات عسكرية

"وبس "

قالت عادي أكيد علشان " ترسيخ مبدأ المواطنة "وكده :D

المهم سمعت بيان الثورة :

بني وطني

...........


اجتازت شمبونجا فترة عصيبة في تاريخها الأخير

من الرشوة والفساد والحديد والعز

وعدم استقرار الحكم

تحديدا من 29 سنة كده

وتسبب المرتشون والمغرضون في تلوث دماء الشعب باكياس الدم الملوثة
و

غرق زينة شباب شمبونجا في مواجهة البحر هربا من جحيم العيش فيها

وتسللت الامراض وتسرطنت الخيرات

....................


"كما تسبب الاهمال في العلاقات الافريقية من حرماننا من شريان وعصب حياتنا نهر الواجاونجا "النيل سابقا

وتآمر الخونة على الشعب

وتولى امرهم إما قزعة -عارفينه طبعا مش محتاجة تفسيرولا أفسر؟؟

وتولى امرهم إما قزعة أو هاماني الجثة

طوييييييييييل


وعلى ذلك

- فقد قمنا بتطهير انفسنا - بديتول

وتولى امرنا رجالة ونساءا

نثق في قدرتهم وخلقهم ووطنيتهم

ولابد ان شمبونجا كلها ستلقى هذا الخبر بالفرح والترحاب

انتهى البيان


قفلت شمبونجا التلفزيون والدموع نزلت من عيونها مش مصدقة اللي بيحصل
...........

.المكان: شمبنجينا العاصمة

نهار داخلي

نجم الجير يقلب في القنوات مش لاقي ولا كليب مذاع ليه

يفرك شعر صدره بيده ويفكر,,,,, يطلب الحملاوي على المحمول ؟
....

يتردد للحظة.... ثم يطلب الرقم

:يرد الحملاوي

أهلا يا فنان


أهلا يا فندم أنا بس كنت عاوز استفسر ليه ميلودي وروتانا ومزيكا مش بيذيعوا لي أغاني ؟

الحملاوي :ا إزاي ده

نجم الجير: بيقولوا ان انا من العهد البائد:)

الحملاوي : إزاي ده ؟!!!ده أنا مبعرفش أعمل دماغ إلا أما اسمعلك 3 أو 4 تراكات مع الديث ميتال قبل مانام

يتصل الحملاوي بالاذاعة والتليفزيون

يرد عليه جيعبارة

أيوه يا باشا

الحملاوي في عصبية : جعبورراااة

جعبورة: بااااشا

خد كام بلدوزر دلوقتي وانزل على مدينة نصر وتحديدا سيتي ستارز هاتوه الأرض خلوه هريسة

جعبورة : ليه يا كبير

الحملاوي متهكما : أصل سيتي ستارز ده من العهد البائد


يسدل الستار بينما المسقعة اتحرقت في الفرن




Monday 12 April 2010

الفرح

الجدعان ... كمان مرة الجدعان
المعازيم .....
العصابة ألف مرة العصابة
........
ولعها يا شيشاااااااا
أهل العروسة ......ألف مرة أهل العروسة
مصر
وصاحب مصر
....... و
مدير شؤون مصر
والمصريين
جوه وبرة
ابو العروسة الباشا الكبير
هو ابوها ولا جوزها ؟
المهم ..........
النقطه دي جاية اية من الكويت
سبعتاشر شمعة نقطه للعريس المجدع
" ماركة" ودع شغلك
أو ودع أكل عيشك
.......نقطة بس على نظام
"رحل المربوط يخاف السايب "
ويا عم ولع
يا سيدي ولع
وأنا شرب سيجارة بني
الكبير ...
كمان مرة
الكبير قوي
البوب
الكينج
.......
اللي وجب معانا في الايام السودا بتاعت أغسطس 90
احنا بنقولوا فاكرين يا بوب
ومش ناسييين وجه وقت رد الجميل يا جميل
بنمسي على الباشا
وبنقولوا يا كبير الفستان الأبيض
مش هيتلوث بعار الديموقراطيه أبدا
ماهو أصل الفستان لو اتلوث بالحرية هنلبسوا كلنا
واحب أسمع سلام" ذئاب الجبل "قالوا
علينا ديابه واحنا يا ناس غلابة
بجد عيب قوي
ده أول ناس وقفت لصدام أيام غزو الكويت كانوا معارضي مصر الشرفاء
أي نعم كان شجب واستنكار ورفض وكدا
بس ماحدش قال لهم حاجة
ولا أيام الكوايته ماكانوا بينظموا وقفات في مصر
أمام مقر جامعة الدول العربيه
أو فروع منظمة الأمم المتحدة
ماحدش قال لهم حاجة
ولا تكدير للصفو العام ولا الخاص
بس زي مااحنا شايفين
نظام
و
مولد
و
فرح
له قوانين وحسابات تانية
غير اللي بنحسبها احنا
نقطه بتتجمع
وبتوزع على الكل
شرا للخواطر
شلني واشيلك
اسكتلي واسكتلك
كل االأنظمة المستبده خايفة من الفيروس اللي اسمه الحرية
بس الناس دول مش عارفين إنه مش شرط تقفل الأبواب أو الشبابيك
علشان تحمي نفسك
لأ لأ خالص
لان السماء لا أبواب لها
وهي اوسع وأخصب بيئة تنتشر فيها الحرية
وانهم بكده عملوا لنا أحلى دعاية
لهم ولينا
شكرا حكومة الكويت
وسمعني سلام
" بيتي وبيقول بيته

Wednesday 7 April 2010

photo of the day

عملوها الوحوش
عملوها الوحوش
يا ريتني كنت معاهم ............

معانا ولا مع الناس التانيين ؟

امبارح كان يوم مشهود للداخلية وللبلد كلهـا
اليوم اللي اقصده هو طبعا حفل ختام الأنشطة الطلابية
في جامعة عين شمس تحت شعار

هعـ هعـ هعـ

وقد ابدع فيه محمد حماقة كما لم يبدع من قبل

بل انخرط الشاب "حماكي" السيس في حقل العمل السوياسي الوطني وصرح قائلا :

أشعر بالسعادة لاني شاركت في منع المظاهرات يوم 6 أبريل وتمنيت أن اغني للرئيس لكن الظروف لم تساعدني
آه والنيييعمة قال كده
حماكي " اللزوز" بتاع" أنا جايلك وناويهااظبط" بيتكلم عن 6 أبريل
!!!!!!
عجبت لك يا زمن
بس علشان ربنا مش بيحب الظلم
الحفلة فشلت يا حماكي وكان فيها تحرش بالعبيط
وربنا مش بييجي على الغلابة
على الجانب الاخر كان فيه إيه بقى كان فيه مدعكة6 ابريل شباب زي الورد
نزلوا الشارع
وماخافوش من دول
قالوا اللي في قلبهم
قالوا بنحلم ببلد محترمة
ببلد مفيهاش قانون طواريء غبي
مش بيفرق بين البلطجي وصاحب الرأي
ببلد المدرس فيها له حترامه
ببلد مايوقفش الوزير فيها كأنه الحاكم بأمر الله فرحان بشبابه
وفرحان أكتر
وهوبيوقف المعلم الذي كاد د ان يكون رسولا في طابور ذنب
ويصفه بالعشوائي امام طلابه
طيب مين اللي خلاه عشوائي ؟
مش موضوعنا يلا
ببلد فيها مية نضيفة
مش مية صرف صحي
ببلد فيها تعليم جامعي
مش حفلات واتحادات طلابية فشلت حتى إنها تجمع الناس حولها
ببلد لها احترامها في باقي بلاد الله وخلق الله
نزلوا وماخافوش
ماخافوش من شامهورش وزبانيته
ماخافوش وهما يمكن أول مرة ينزلوا مظاهرة
ماخافوش وهم بيعتقلوا
ماخافوش يباتوا ليلة مايعلم بهاـ غير الله
نزلوا
نزلوا نزلوا الشاارع
انضربوا واتسحلوا واتاهنوا بس ماخافوش
أنت بقى عاوز تبقى في انهو فريق؟
فريق" حماكي اللازوز"
ولا فريق" مصر الحرة "؟
الكلام قدامك وعقلك في راسك
اعرف خلاصك
هـا بقى ؟
معانا ولا مع الناس التانيين ؟
مع الناس التانيين ؟ طيب إيه رايك بقى إن احنا الناس التانييين :@_@
...........
شكر خاص لصاحبة مدونة إنسانةاللي لولاها بعد ربنا مش كنت هاعرف أكتب البوست ده