Tuesday 6 December 2011

ريلاكسو يرحمكم الله

احنا اللي بنخلق رابع مستحيلاتنا وبنقعده جنبنا عالسفرة ياكل ويشرب وبعدين يغسل ايده عالحوض وينشف في فوطتنا وبيبقى واقع مرير بنعيشه لنفسنا.
احنا اللي بننفخ في الفاضي فالنتيجة ان الفاضي اللي ماكانش له فيها بيبقى مليان و أول مابيتنطط بيتنطط على اللي نفخوا فيه
من أول يوم في المدرسة واحنا اللي بنخلق زعيم الفصل أما ولد قاعد في حاله وقت الفسحة في الحوش و شاط شوطه حلوة احنا اللي بنمجده وبنخليه "الألفة " رغم انه ماكانش يقصد يبقى ده بس أما بيتحط في المشهد, اللعبة بتعجبه قوي ويبدأ يسيطر ويتحكم ويقول لده انت هتلعب في التشكيل أو يركن ده اللي في الغالب بيكون صاحبه اللي اصلا مجده وحكى عنه الأساطير على دكة الاحتياط ده ان ماقالوش اصلا انت برة اللعبة ! .
في يونيو 2000 مات حافظ الأسد الله يخرب بيته وحصل اللي حصل في سوريا
من توريث لبشار الله يخرب بيته وبت ابوه بالمناسبة .
ايه اللي حصل في مصر ؟ اللي حصل ان الناس عملت اسطورة جديدة أن ممكن يتكرر السيناريو في مصر , في الوقت ده كان جمال لسة شغال بانكير في لوندون في بنك اوف امريكا ومالوش فيها .
بس بطريقتنا وفزعنا وهسترتنا خلينا سوزي و الحوس يهرشوا في دماغهم ويقولوا : ليه لأ والنبي الواد طويل وهيبة وعنده بدل كتير وينفع يبقى ريس
استدعوه في نفس ذات السنة سنة 2000 اللي مات فيها حافظ الأسد وانضم لعضوية الحزب الوطني وكان ماكان بعد كده من حدوتة التصعيد المعروفة .
ممكن حد يعترض عليَّ وعلى كلامي ويقول لي ان مخطط التوريث كان موجود اصلا من ايام ماجمال ماأكان بيروح مدرسة " مسز وودلي" الابتدائية اللي في مصر الجديدة وانت اصلا يا شمب مش عارفة حاجة
هاقول له انت صح برضه لكن فرق كبير أما يبقى فيه حلم بيراودني وبيشوكني في قفايا يعني واني الاقي اللي يشجعني بدون مايدرى انه بيشجعني
خوفنا وقلقنا وندبنا و ذعرنا هو اللي قوى سوزي وحسني انهم يفرضوا الحيلة علينا
لقوا تعضيد ايجابي في سلبيتنا

تماما بالظبط زي خوفنا وقلقنا وتكميم افواه الثوار في بعد ايام من ذروة الثورة من ان الجيش ده ابونا وامنا وخالتنا وعمتنا اللي بتجيب لينا لعب كل مرة تيجي طورنا في اجازة نص السنة
وانه عيب اللي بنقوله انه يمشي وكده
وصدق المجلس وضحك الفرسان ال-19 وبصوا لبعض وغمزوا " وعجبهم الخوف الهيستراتيكي اللي كان ملازم النخبة والخبراء ولود ال ... وقالوا أهو أهو الشعب عاوزنا أهو
ودخل في دماغه انه يقدر يحكم.

حد تاني هيقول لي بطلي تنظير ده مخطط والمجلس كان ناوي من الاول انه مايسبش الكرسي الا على جثة النبيل علاء
بس أرجع واقول هسترتنا وخوفنا هما اللي ادوا له الفرصة
وقووا حلم المجلس انه يقعد ويربع ويدلدل رجليه وفي قول آخر يمرجحها .

نحرم بقى ؟ اتلسعنا مرتيين أهو ؟ مفروض نبطل بقى فزع وهلع ورعب لأ تاني بنكرر الغلط تاني بنفس الآليات تاني .
الانتخابات وتفوق التيار الاسلامي
سواء سلف أو اخوان
وهيلبسونا البرقع والرجالة مش بعيد يحجبوهم كمان و الستات
مش هتشتغل واحتمال يتوأدوا
و... و... و,.... خزعبلات
ونسي الناس ان الشعب مفروض هو اللي بيقرر وان النواب الليي داخلين البرطمان الماريونيتي دول مجرد موظفين
ليه بقى تخلعوا عليهم هالة القداسة وتلبسوهم هدوم سوبر ما وسبايدر ما وبات مان وكل المنذ اللي في افلام الخيال العلمي ؟
و تدوهم حق مش بتاعهم اصلا انهم إذا ارادوا فعلوا؟
ازاي يعني ؟
يعني هما سواء الاخوان أو السلف قاعدين ومبسوطين من حالة الهلع والفزع اللي انتو فيها ومستلقين على قفاهم من الضحك
انت بهلعك وفزعك ده قدام أي تصريح اهبل أو خايب بتقويهم وهتخليهم يصدقوا اسطورة انت اللي بتصنعها لهم
طائر رخ جديد نوفل انت اللي ابتكرته وعجبك وقلت له طير اقتنع من خلال تمجيدك ليه و نفخك فيه انه طائر وطار وحلق في السما ولمؤخذة أول ماعمل بييبيي عملها عليك انت
نهدى ونبي بقى وأي تصريح مستفز مانقفش قدامه كتير لانه تصريح لا أكتر ولا اقل ومالوش غير قوة الحبر اللي اتكتب بيه في الجرنان أو قوة ضربة صوابع اللي كاتب الخبر عالكيبورد
اللي بيدي للخزعبلات دي قيمة وووزن هلعنا وخوفنا وهسترتنااحنا اللي بنخلق واقع لأحلامهم .
ريلاكسو يرحمكم الله

20 comments:

  1. جميلة تسلم ايدك

    ReplyDelete
  2. في القران اخوات يوسف ذهبوا الي والدهم وقالوا نريد يوسف يلعب معنا فقال لهم اخشي ان ياكله الذئب فجاءت فكره ان الذئب اكل يوسف من ابوهم نفسه فهو الذي اوحي لهم بالفكره

    ReplyDelete
  3. الناس المبدعه لما بيبقى ليها مزاج للتدوين .. بتكتب حاجات جامده كده :)

    ReplyDelete
  4. شكرا يا هشام شكرا يا رامي شكرا يا ميزو

    ReplyDelete
  5. عندك حق فعلا و ده زى ما المجلس بيحب ياخد قرار ما يقوم يسربه على انه اشاعة عشان يشوف رد فعل الناس و على اساسه يتخذ القراراّه أو لأ هما كمان بيصرحوا تصريحات فالبشر يجى لها هلع فيتمادوا فى الفعل نبطل بقى نديهم اكبر من حجمهم لأن الشعب مفيش حد ح يعرف يمشى عليه حاجه غصب عنه احنا عمرنا ما ح نرجع تانى لورا لأننا كسرنا حاجز الخوف و طوق القهر ... ربنا يحميكى انتى و اللى زيك و بيكوا ح تنور مصر

    ReplyDelete
  6. ما فيش حاكم غير من خيال محكوم ,, أو بمعنى أصح من خيال منتفع زي خدام و صفوت والشاذلي وغيرهم

    ReplyDelete
  7. فعلآ عندك حق!!كلام جميل ومنظقى...تحياتى

    ReplyDelete
  8. عن نفسي مش قلقان المجلس ده عمره قصير و بعد ما يتحط الدستور لو غير في تركيبة البرلمان بإنه يلغي نسبة العمال و الفلاحين و يلغي مجلس الشورى زي مطلبنا كلنا يبقى لازم إنتخابات جديدة

    ثم حتى لو مفيش انتخابات قريبة أكيد فيه انتخابات كمان 5 سنين و محدش حيخلد في الكرسي و الشعب حيفرز مع الوقت و الإنتخابات المتتالية و الشغل على الارض حيفرزالكويس من الوحش
    أنا متفائل خير و الله

    ReplyDelete
  9. الوليه سوزى دى من يومها قرشانه بنت وسخه صدقتى القول

    ReplyDelete
  10. This comment has been removed by the author.

    ReplyDelete
  11. مقال فشيخ ..ودمه خفيف لواقع مؤلم

    ReplyDelete
  12. ياريت مذيعين القنوات الفضائيه يسمعوا الكلام ده علشان يرحمونا من استضافتهم فى القنوات لانها زادت اوى

    ReplyDelete
  13. كلام سليم جداً .. الله يفتح عليكى يابنتى

    ReplyDelete
  14. تسلم إيدك
    زى ما المثل بيقول اللى يخاف من عفريت يطلعله

    ReplyDelete
  15. كلامك خطأ عن مبدأ التوريث. المشروع بدأ 1997-1998 لما عين المحروس فى "المجلس الرئاسى المصرى الأمريكى". و لم يكن الموضوع أحلام ساعتها.

    ReplyDelete
  16. I am sorry my friend .. this is kinda telling me that we have to ignore everything around us and keep silent and if I only think happy thoughts we are going forward .. this is not Peter Pan or Disney Land world.. Politics is way way further than this plain idea .. Simply because Syrian accepted Bashaar silently they thought now it is the right time to start in Egypt .. Simply go back to Nations history and easily you will see there is nothing like sit and have happy thoughts .. If I dream that tomorrow is pink then it will be pink .. I don't need some painkiller tablet to lie to myself about what is a "fact" and what is an "illusion" that due to my "Phobia" can turn into a "fact" .. Well written article though I do not agree with its base idea :)

    ReplyDelete
  17. ما تنسيش الاعلام له دور كبير، يعنى الموضوع مش واقف علينا احنا كمان، فى اعلام بيقوى الحاكم لان الاعلام هوه اللى بيؤثر على الناس، اعلام يحب يطبل ويزمر ويسقف للحاكم واعوانه وهوه اللى ليه المصلحه انهم يبقوا موجودين، الدور للاعلام النظيف السوى اللى يقدر يحافظ على احترامه لجمهوره واحترام عقليتهم وتوجيههم نحو الافضل.. وشكرا

    ReplyDelete