ريلاكسو يرحمكم الله

احنا اللي بنخلق رابع مستحيلاتنا وبنقعده جنبنا عالسفرة ياكل ويشرب وبعدين يغسل ايده عالحوض وينشف في فوطتنا وبيبقى واقع مرير بنعيشه لنفسنا.
احنا اللي بننفخ في الفاضي فالنتيجة ان الفاضي اللي ماكانش له فيها بيبقى مليان و أول مابيتنطط بيتنطط على اللي نفخوا فيه
من أول يوم في المدرسة واحنا اللي بنخلق زعيم الفصل أما ولد قاعد في حاله وقت الفسحة في الحوش و شاط شوطه حلوة احنا اللي بنمجده وبنخليه "الألفة " رغم انه ماكانش يقصد يبقى ده بس أما بيتحط في المشهد, اللعبة بتعجبه قوي ويبدأ يسيطر ويتحكم ويقول لده انت هتلعب في التشكيل أو يركن ده اللي في الغالب بيكون صاحبه اللي اصلا مجده وحكى عنه الأساطير على دكة الاحتياط ده ان ماقالوش اصلا انت برة اللعبة ! .
في يونيو 2000 مات حافظ الأسد الله يخرب بيته وحصل اللي حصل في سوريا
من توريث لبشار الله يخرب بيته وبت ابوه بالمناسبة .
ايه اللي حصل في مصر ؟ اللي حصل ان الناس عملت اسطورة جديدة أن ممكن يتكرر السيناريو في مصر , في الوقت ده كان جمال لسة شغال بانكير في لوندون في بنك اوف امريكا ومالوش فيها .
بس بطريقتنا وفزعنا وهسترتنا خلينا سوزي و الحوس يهرشوا في دماغهم ويقولوا : ليه لأ والنبي الواد طويل وهيبة وعنده بدل كتير وينفع يبقى ريس
استدعوه في نفس ذات السنة سنة 2000 اللي مات فيها حافظ الأسد وانضم لعضوية الحزب الوطني وكان ماكان بعد كده من حدوتة التصعيد المعروفة .
ممكن حد يعترض عليَّ وعلى كلامي ويقول لي ان مخطط التوريث كان موجود اصلا من ايام ماجمال ماأكان بيروح مدرسة " مسز وودلي" الابتدائية اللي في مصر الجديدة وانت اصلا يا شمب مش عارفة حاجة
هاقول له انت صح برضه لكن فرق كبير أما يبقى فيه حلم بيراودني وبيشوكني في قفايا يعني واني الاقي اللي يشجعني بدون مايدرى انه بيشجعني
خوفنا وقلقنا وندبنا و ذعرنا هو اللي قوى سوزي وحسني انهم يفرضوا الحيلة علينا
لقوا تعضيد ايجابي في سلبيتنا

تماما بالظبط زي خوفنا وقلقنا وتكميم افواه الثوار في بعد ايام من ذروة الثورة من ان الجيش ده ابونا وامنا وخالتنا وعمتنا اللي بتجيب لينا لعب كل مرة تيجي طورنا في اجازة نص السنة
وانه عيب اللي بنقوله انه يمشي وكده
وصدق المجلس وضحك الفرسان ال-19 وبصوا لبعض وغمزوا " وعجبهم الخوف الهيستراتيكي اللي كان ملازم النخبة والخبراء ولود ال ... وقالوا أهو أهو الشعب عاوزنا أهو
ودخل في دماغه انه يقدر يحكم.

حد تاني هيقول لي بطلي تنظير ده مخطط والمجلس كان ناوي من الاول انه مايسبش الكرسي الا على جثة النبيل علاء
بس أرجع واقول هسترتنا وخوفنا هما اللي ادوا له الفرصة
وقووا حلم المجلس انه يقعد ويربع ويدلدل رجليه وفي قول آخر يمرجحها .

نحرم بقى ؟ اتلسعنا مرتيين أهو ؟ مفروض نبطل بقى فزع وهلع ورعب لأ تاني بنكرر الغلط تاني بنفس الآليات تاني .
الانتخابات وتفوق التيار الاسلامي
سواء سلف أو اخوان
وهيلبسونا البرقع والرجالة مش بعيد يحجبوهم كمان و الستات
مش هتشتغل واحتمال يتوأدوا
و... و... و,.... خزعبلات
ونسي الناس ان الشعب مفروض هو اللي بيقرر وان النواب الليي داخلين البرطمان الماريونيتي دول مجرد موظفين
ليه بقى تخلعوا عليهم هالة القداسة وتلبسوهم هدوم سوبر ما وسبايدر ما وبات مان وكل المنذ اللي في افلام الخيال العلمي ؟
و تدوهم حق مش بتاعهم اصلا انهم إذا ارادوا فعلوا؟
ازاي يعني ؟
يعني هما سواء الاخوان أو السلف قاعدين ومبسوطين من حالة الهلع والفزع اللي انتو فيها ومستلقين على قفاهم من الضحك
انت بهلعك وفزعك ده قدام أي تصريح اهبل أو خايب بتقويهم وهتخليهم يصدقوا اسطورة انت اللي بتصنعها لهم
طائر رخ جديد نوفل انت اللي ابتكرته وعجبك وقلت له طير اقتنع من خلال تمجيدك ليه و نفخك فيه انه طائر وطار وحلق في السما ولمؤخذة أول ماعمل بييبيي عملها عليك انت
نهدى ونبي بقى وأي تصريح مستفز مانقفش قدامه كتير لانه تصريح لا أكتر ولا اقل ومالوش غير قوة الحبر اللي اتكتب بيه في الجرنان أو قوة ضربة صوابع اللي كاتب الخبر عالكيبورد
اللي بيدي للخزعبلات دي قيمة وووزن هلعنا وخوفنا وهسترتنااحنا اللي بنخلق واقع لأحلامهم .
ريلاكسو يرحمكم الله