وأنا مراهقة قريت في مقدمة كتاب مش فاكرة اسمه " أنا الخير والشر معا, لاني أنا الإنسان " . ومن ساعتها عرفت ان مافيش انسان خير مطلق وإلا يبقى ملاك . وكمان مافيش انسان شر مطلق وإلا يبقى شيطان . حاولت اطبق ده في حاجات كتير ساعات كانت الحسبة بتظبط وساعات تانية لأ .
بالنسبة لي كل اللي حكموا مصر بما فيهم مبارك نفسه " انسان ' , لا هو خير مطلق ولا هو شر مطلق , اللي كان بيفرق هو خيره اللي تفوق على شره ولا العكس .
ملحوظة : أنا مكنتش بعتبر مبارك انسان لوقت قريب , من وقت ماالاخوان ظهروا لي على حقيقتهم وأنا اوقات اختلق الاعذار ليهوذا نفسه مش بس مبارك "
أنا مش ناصرية , ولا بتبع أي ايدلوجية,أنا بتبع الحق والخير والعدل واحيانا الجمال .
أما شفت الفرحة اللي فرحانينهاالاخوان والشماتة اللي شمتانينها بمناسبة حلول ذكرى 5 يونيو , تأكدت تمام انه احنا شعبين مختلفين , ساكنين على أرض واحدة اسمها مصر .
كان هناك تشابه كبير بين ماينفثه الاخوان بقيادة حزبهم الشامت , من بوستات على الفيسبوك والتويتر وبين ماتنشره حسابات اسرائيلية تحتفل بذكرى النصر في الخامس من يونيو ولم اتعجب كثيرا ليه ؟ لان مايجمعه ا الله , لا يفرقه انسان على راي الزميل العزيز احمد الدريني .
ونحب نقول :
النكسة مبدئيا هي " عزيزي بيريز " .
النكسة هي ان جنود ابرياء على الحدود يتقتلوا وفي بقهم تمرة بيغيروا بيها
طعم بقهم بعد الصيام , ولحد دا الوقت ماتعرفش مين قتلهم , ولا ليه .
النكسة ان أساسيات حياة زي الكهربا , والمياه والبنزين والدوا ميبقوش موجودين .
النكسة هي انك تمشي في الشارع, منتظر الحصة الرسمية من كعكة التحرش سيئة الطعم .
النكسة هي خطف قوة شرطة ورجوعها بسيناريوهات تفوقت على سيناريوهات افلام فطين عبد
الوهاب .
النكسة هي ان اجتماع لمناقشة أخطر قضية امن قومي تتم دون معرفة المشاركين ان
الاجتماع مذاع على الهوا .
النكسة أنك تلاقي رئيسك واقف في غيط قمح وتشوف بوابات
الكترونية في الخلفية .
النكسة ان تدعي كذبا زيادة في محصول القمح .
النكسة ان تخرج على مؤيديك أمام قصر الرئاسة لتتوعد
المعارضين .
النكسة هي أنك تروح تشتري لبن اطفال من الصيدلية
فمتلاقيهوش وتلف لحد رجليك ماتورم وتتحايل على كل اللي تعرفهم علشان ابنك مش بيعرف
يرضع غير النوع ده من الحليب .
النكسة هي ان الكهربا تقطع كل شوية وعواميد الكهربا
مولعة بالنهار واستراحات رؤساء المدن عاملة زي المساجد في رمضان أو حنة العروسة .
النكسة ان رئيسك يتم استقباله بواسطة عمدة قرية
اوروبية أو وزير مفوض .
النكسة هي الملثم بتاع خط الغاز اللي بيطلع ويختفي
حسب المزاج .
النكسة ومرسي دو ميكس .
تحياتى اولا .. احب ان اقول ان الزمن لم يعد فى صالحهم ولن يرحمهم التاريخ لانهم انكشفوا للشعوب بعدما كانوا يدعون ان الانظمه ظلمتهم وهاهم يفعلون الاعاجيب و الفظائع و الجرائم من اجل الكرسى الذين ماتوا عليه قبل ان يجلسوا عليه انشاء الله يجلسوا على كراسى النيران فى جنهم الحمرا هم والمنافقين اتباعهم الذين يتلاعبون ويميلون ترة عنا وتارة هناك .
ReplyDelete