Monday, 22 August 2011

االوصايا العشرة في حماية الثورة

أولا ألف مبروك لأهلنا في ليبيا وربنا يتم عليكم ثورتكم على خير
بس أنا في قلبي كلمتين كده نفسي يوصلوا لهم وأكيد بعد ماالانترنت رجع طرابلس هيوصل لهم كلامي إن شاء الله .
المثل بيقول ايه بقى ..
الله يخرب بيت اللي اتجوز قبلي ومانصحنيش و ويخرب بيت اللي اتجوز بعدي ومسالنيش
أنا بقى بقول ايه : الله يسامح اللي ثار قبلي ومانصحنيش ويسامح اللي ثار بعدي ومسألنيش"
دي شوية نصايح كدة تاخدوها من اخوانكم في مصر.
علشان احنا ثورجية "سوابق" وكده ..

وطبعا قد نتفق وقد نختلف على ان مصر ليست ليبيا وان الوضع عندكم مختلف بس قشطة أنا هاقول اللي يخلصني من ربنا
طبعا موضوع انكم تشكروا "حلف الناتو " وتقولوا له كتر خيركم جميلكم ده على راسنا اتفضلوا مع ألف سلامة وحشتوا مراتاتكو ده مفروغ منه !!

أولا : ابوس ايديكم واحد واحد ماتسيبوا الشوارع إلا أما كل مطالبكم تتحقق من أول وضع دستور الى تحديد موعد للانتخابات.متسمعوش كلام حد يقول لكم" بليظ جو هووم" دي ابدا ابدا

ثانيا : لو مسكتوا القذافي واولاده بلاش الله يكرمكم انسانيات بزيادة و تدخلوا دور " محاكمات عادلة " دي اديكو شايفين "عادلة" عملت فينا ايه كام خرطوش ثوري كده يخلص المواضيع.

ثالثا : ممنوع منعا باتا نصب منصات وميكرفونات في الميادين يا لهوك يا لهوك لو عندكو واحد زي صلاح عناني ياختييييييي.

رابعا: بلاش والنبي والنبي والنبي "الجيش والشعب ايد واحدة دي" .. خليكو في الشعب يريد اسقاط كل النظام "كله كله" و ركزوا على "كله كله" دي وحطوا تحتها ميت خط .

خامسا :.... نسيت.

سادسا : أما تقبضوا على "كل" رجال النظام علشان تحضروهم للقتل زي مااتفقنا في ثانيا اياكم ثم اياكم ان تضعوهم في سجن واحد حطوا كل واحد في سجن بحيث يكون فيه بين كل سجن وسجن بلدين تلاتة.

سابعا : شيلوا النائب العام لو كان عندكو واحد.

ثامنا : لو طلع لكو واحد لابس كاكي وبيقول تحية لأرواح الشهداء وعمل تعظيم سلام قشطة عادي يعني بس ماتصدقوش أي حاجة غير اللي تشفوه عالارض دستور وانتخابات لازم لازم لازم.آه كمان الرجل اللي هيطلع لكم ده بتاع تعظيم سلام بيتحول بعد شارع شهور من الثورة لسلعوة عندها صباع مدوحس ..بااهي ؟؟
تاسعا : فككوا الجهاز اللي اسمه "الكتائب" ده اللي زي جهاز أمن الدولة يوه قصدي الأمن الوطني عندنا,
ولو حد ضحك عليكو وقال لكم تم "تفكيكه" وتم تغييره الى" الكتاتيب" مثلا وصدقتوا يبقى الله يرحمكو

عاشرا : اوعوا اوعوا اوعى تسمحوا لحد يفرقكم زي ماثورتوا كلكم على قلب رجل واحد واستشهد منكم ليبيين كانوا على قلب رجل واحد
وانجرح منكم ليبيين على قلب رجل واحد , كمان ابنوا البلد على قلب رجل ليبي واوعوا اوعوا تسمحوا لحد يفرقكم لاتحادات وائتلافت شتى ومجلس قيادة الثورة ومجلس رياضة الثورة ومجلس أنس الثورة ومجلس ابتهاج الثورة وائتلاف ام أحمد الثورة وائتلاف عم ابو حمزة الثورة
ربنا معاكم السهل اتعمل ايوة ماتستغربوش من كلمة السهل بناء الدولة ووحدتها ونهضتها هي الصعب اللي مستنيكم وانتم له
ادعوا لنا بقى نخلص البنود العشرة دي عندنا في مصر ونبي

8 comments:

  1. very nice, i like it......we rabena ma3ana ba2a 3ala el2araf elly e7na feeh..:(((

    ReplyDelete
  2. liiiiiiiiiiiiiiiiiiiiike

    ReplyDelete
  3. ربنا يخليكي للغلابه :) ..

    ReplyDelete
  4. جامد جدااااااااا
    وخصوصا متمسكوش في الجيش و الشعب إيد واحدة
    واللهي عنك حق

    ReplyDelete
  5. كانت فين الوصايا دي أيام الثورة :(
    ربنا يسامحكم يا بتوع تونس مفطمتوناش على اللي هيجرا :)

    بجد كلام رائع وعندك مليون حق

    ReplyDelete
  6. الوصايا دي مهمة جدًا و دواء لكل ثائر و لازم تتحط في روشتة الثورات المستعجلة و كتب من نوعية (كيف تثور) اللي بتطلع في صربيا xD

    كلامك صحيح 100 %
    و ربنا يستر

    ReplyDelete
  7. تحية طيبة
    أقوم بإجراء دراسة عن المدونين فى مصر فى إطار رسالتى للماجستير ،وأتشرف بإضافة مدونتكم فى عينة المدونات الخاصة بى ، وأرجو من سيادتكم الإجابة عن استمارة الاستقصاء المرفقة بالرسالة ، وسيكون لكم جزيل الشكر على تعاونكم واهتمامكم ، وأتشرف بالرد على أى استفسار بخصوص طلبى .
    https://docs.google.com/spreadsheet/viewform?formkey=dExYMDRfQ1dfVzl1WWxjakdfQ1llbFE6MQ

    مع شكرى للاهتمام والتعاون مرة أخرى
    bloggingsurvey@yahoo.com
    مها بهنسى المعيدة بكلية الإعلام-جامعة القاهرة

    ReplyDelete