Wednesday 31 March 2010

أبو فريدة

شدني النهار ده خبر إن موظفي وعمال مركز المعلومات كانوا عاملين اعتصام
الخبر عادي
لان الاعتصامات بقت زي حوادث سواقين الميكروبصات على الدائري
اللي مش عادي بقى هتافات المعتصمين
اللي هي إيه بقى
...........
"يا جمال يا ابو فريدة احنا بقينا على الحديدة "
وكمان .....
" يا ابو فريدة اوعى تسيبنا احنا اخواتك يا حبيبنا "
وبتسألو احنا ليه كده ؟
طيب مااحنا اللي نفخنا في الناس دي
وخليناهم يتأكدوا انهم فعلا أصحاب الكلمة العليا
يمكن علشان الناس دي غلابة وتعليمهم على قد حالهم عملوا كده
بس اللي ميعرفهوش الناس دي إن كلامهم ده بيزيد العائلة المالكة المباركة طغيانا وعتوا
بيخليهم يثبتوا رجليهم أكتر
ويضحكوا الضحكة الشريرة نيوههاهاااااع
ويتأكدوا أكتر وأكتر ان لو حتى جه البرادعي
أو تمنتاشر واحد زيه ومتسألش ليه تمنتاشر هو كده
مش نافع أي حاجة
قال يا فرعون إيه فرعنك
قال لقيت الناس مظلومة ومكويه بتهتف بإسمي
!!!!!!!!!!!!!!
ده حتى عيب لما نلاقي حد بيمسح لنا الكرسي وينضف المكتب ويرتبه
ومنقعدش ونحط رجلينا وجزمتنا في وش الطخين والرفيع والطويل واالقصير
ليه ندي العالم دي فرصة يحسوا فيها فعلا انهم بقوا اصحاب اليد العليا
طيب إيه رايكوا في كام هتاف كده من عينة ابو فريدة؟ زي مثلا
يا ابو فريدة يا فنان فاضل إيه تاخده كمان؟
يا ابو فريدة يا شربات يا آمين السياسات
كرسي الحكم منور ليه ابو فريدة قاعد عليه
لولولولولويييي
مفيش فايدة يا عايدة

3 comments:

  1. يا ابو فريدة يا فنان فاضل إيه تاخده كمان؟

    ReplyDelete
  2. ماينفعش ألاقيكي بتزغرطي وما أدخلش أكمل زغاريط معاكي أبدا

    لولولولووللىىىىىىىىىىىى

    ReplyDelete
  3. مبدأيا إنت فاهمة منطق الناس دى غلط لأنهم فى النهاية ما يختلفوش عنك فى رأيك أبو فريدة أو جدها و بقيت العيلة لكنهم ماشيين بمبدأ إن كان لك عند الكلب حاجة ..

    اللى فاهم ده أكتر منك هو النظام نفسه لأنه لو صدق إن الناس دى بتهتف و ترفع يفط تعبر فعلا عن قناعاتها كان ممكن يتطمن و يعمل إنتخابات نزيهة و حرة و هو متأكد إن الشعب المضحوك عليه هينتخب حزب البيه الصغير و أبوه لكن اللى النظام متأكد منه هو إن فى إنتخابات نزيهة حقيقية الحزب الوطنى هياخد بالجزمة القديمة و السبب إن كل واحد من الناس بيلعن سنسفيل جدود اللى بيهتف له بصوت عالى

    الناس دى نازلة للحصول على حقوق معينة هى بالنسبة ليهم مسألة حياة أو موت مش أهداف أو أغراض سياسية و بالتالى هيستخدموا الوسائل المتاحة حتى اللى ما يعجبكيش منها .. لكن اللى يهمك و يهمنى إن حراكهم بيهز النظام و بيحطه فى موقف صعب لأن عدم الإستجابة بتزيد الغضب و الإصرار و الإستجابة بتغرى آخرين بتكرار التجربة و مشكلة النظام إنه فعلا ما يقدرش يستجيب لطلبات كل الفئات المظلومة و خزانته بالفعل خاوية نتيجة النهب المفرط و ذراعه الأمنية على قوتها لا تستطيع قمع كل الفئات دى و لو حاولت بتغامر بإشعال ثورة فى البلد..

    لو شفت الموضوع فى الإطار ده هتعرفى إن كل إحتجاجات و إعتصامات العمال و غيرهم من المقموعين و المهمشين لها قيمة كبيرة جدا تتجاوز أى كلام يهتفوا بيه

    ReplyDelete