في المسألةالتحتية

صباح الندى

وكل سنة وانتو بالف خير وهنا

ورمضان كريم الحقيقة رمضان طلع كريم قوي جدا خااالص

بغض النظر عن نوع الكرم ده و بغض النظر برضه ان التلفزيون المصري انتج مسلسلات وبرامج كوميدية بمبالغ تربو على المليار جنيه

أي والله حوالي ثلاث أرْباع المليار جنيه مصري

علشان اليمين بس -

دول كانو مثلا -التلات تربع مليار - لو كانوا اتصرفوا على البنية التحتيه اللي بقت فعلا اسم على مسمى تحتيه آخر حجم

تحت تحت البدروم البدروم لو كانوا صرفوا نص المبلغ على "الموكوسة التحتيه" اللي كل ماالقيادة تتكلم تعايرنا بيها

وتقول البنية التحتيه

أنا بتاع البنية التحتيه

أنا البنية والبنية أنا

أو من نوع : أنا البنية التحتيه انت مين؟

أو مثلا بكره تشوف يا ناكر خيري بنيتي من بنية غيري

أو .....:

قارنوا بين بنيتي التحتيه وبنية اللي قبلي

وشوفوا بنية من أحلى

وكلام كتير جدا عن البنية

ده طلع ان فعلا ان دي مدرسة سياسية جديدة ..ولها خططها ومريديها وعباقرتها خطط مدروسه

وسياسات- تحتيه برضه - مرسومه بدقة وعناية فائقتين

آه صدقوني طيب خد عندك

مثلا خطة الحائط" التحتي " بينا وبين قطاع غزة تحيته دي ولا مش تحتيه ؟ انطق

.....

خطط وزارة التعليم العالي والتعليم الواطي اصدق كلمة تتقال عليها خطط تحتيه

لانها بتصر وتلح اصرارا انه المعلم يبقى " تحت" أمر الطالب و خط الفقر في نفس ذات الوقت

بلاش دي مبنى اللهم احفظنا

في مدينة نصر

لأ مش سيتي ستارز يا خفة :D

كل الناس اللي دخلته - مبنى اللهم احفظنا - علشان تشرب كبوتشينوا في خدمة الكوفي شوب اللي هناك

"اللي وصفها المؤرخخخخخ الصاعد بسرعة الصاروخ وحيد حامد انها خدمة " اربع نجوم " كل الناس اجمعت انهم وهما داخلين الميكروباص بينحدر بيهم قوي" لتحت

تحتي ده ولا مش تحتي ؟

أما تدخل مثلا مستشفى حكومي وابنك على ايدك وبيحاول يتمسك بالحياه- على ايه مش عارفة- وتقول لهم دكتور يا عالم موظف الاستقبال بيقولك إيه ؟ هـا بيقول إيه ؟؟ ماتنطق بيقولك ايه ؟

"ايوه اسم الله عليك بيقولك وهو مكشر وقرفان منك ومن ابنك ومن نفسه ومن كل حاجة : أنزل ادفع تأمين:" تحت "

بلاش دي ودي وده...... نهر النيل اللي مش عارفين ايه مصيره لحد دلوقت مجراه مثلا من تحت لفوق

مش من فوج لتحت

ومن ساعة ماالقيادة استلمت والتاريخ المصري المعاصر انقسم الى عهدين :عهد ماقبل البنية وعهد مابعد البنية

مش هتكلم عن مسلسل الجماعةلانه اخد نصيبه وزيادة في النقد بس الصراحة بغض النظر عن الهراء اللي بيعرضه والترجيع اللي كتبه وحيد حامد فنيات المسلسل من اضاءة وتصوير تحفة

االصدفة وحدها خلتني وأنا بحاول اشوف برامج إيه دي اللي اتصرف عليها كل ده برنامج اسمه الشيكروباص

اصلا مش بحب النوع ده من الضحك على الناس والاستخفاف بعقولهم والتريقة عليه ووضعهم في موقف اقل مايقال عليها انها واطيه رجعنا تاني لتحت - واجبار الناس بطريقة ملتوية انهم يذيعوا حاجة كل الناس أما هايشفوها هيضحكوا عليها

ناهيك اصلا عن ان تسعة وتسعين وتسعة من عشرة مش غريبة عليك النسبة دي صح :

ناهيك اصلا عن وجود شبهة تواطيء بين المخرج والبني ادم اللي المفروض هيقع في الفخ وبيبقى شكله واضح جدا وهومبحلق للكاميرا اللي المفروض تبقى خفية ومفروض هو مش شايفها

أنا اتفرجت على حلقتين على اليوتيوب واللي فعلا شدني هو ردود أفعال الناس

لان غالبا أول حلقات بيحاولوا يجيبوا ناس" جد بجد " مش متفقين معاها

لو شفت حلقة التليفون المحمول وملخصها انه الخفيف بتاع البرنامج بياخد تليفون واحد من اللي راكبين الميكروباص يعمل بيه مكالمة وبيشتم اللي بيكلمه

فـاللي اتشتم بيتصل على نفس نمرة الموبايل وبيقول لصاحب الموبايل الأصلي

انه ظابط من جهة امنية رفيعة المستوى رفيعه رفيعه يعني الولد وشه جاب ألوان السما السابعة

وعرق واصبحت حالته حالة وراسه وألف سيف انه ياخد بطاقة الخفيف اللي عمل المكالمة

وبيحاول يفهم الباشا اللي على الخط واللي نازل فيه سب وشتم انه " مش أنا والله ...والله ماأنا يا بيه

آخر ماغلب من انه يفهمه رجع للتاني وراسه وألف سيف انه يطلع البطاقة مش عارفة كان هيعمل بالبطاقه ايه الحقيقة

والا... والا دي اذ نفاجيء بالولد وهو نحيف جدا بالمناسبة وجسده هزيل

هوبا حط ايده في جيب البنطلون الخلفي وطلع "كتر" الكتر ده آلة حادة بنستخدمها لتقطيع الأوراق أو أي حاجة وسلاحها حاد جدا

وكان خلاص بقى هيقول حلال الله اكبر ويقوم بالواجب مع اللي اخد منه الموبايل

عجيب فعلا أمر شعبنا

كان من ثلات ثواني بس عرقه مرقه

وبعدين أما لقاها دخلت في سكة اللي" ميتسموش"... الفرعون اللي جواه طلع وطلع معاه الكتر

مجتمعنا اتغير وبقى اكثر جبنا و عنفا الاتنين يركبوا إزاي مع بعض مش عارفة بس هو كده

و..عظيمة يا مصر يا أرض العجب

و......

البنية التحتيه

أسود - أبيض

استيقظ فوجد أنه من المفروض ان يعود إلى النوم مرة اخرى لان الليل مازال مخيما على أجواء غرفته

لم تدخل خيوط النهار الفضية المعتاده عبر ثقوب الستارة الملونة

لتعلن عن مولد يوم جديد واحداث جديدة

حاول ان يعود إلى فراشه الدافيء مرة اخرى لكنه وجد حركة غير معتادة في مثل هذا الوقت من " الليل" يأتي مصدرها من وراء الستارة ذات الدوائر الكثيرة

-قاوم الكسل وذهب ليستكشف ماذا يدور بالخارج في هذا الوقت المتأخر- هكذا ظن-

فتح باب الشباك فوجد ان الكل مستيقظ

وان الجميع بدأ في نشاطاته المعتادة

المملة والمتكررة

صاحب السوبرماركت فتح أبواب المحل

وهاهو البواب ينتهي من غسيل سلالم مدخل العمارة

كذلك المدرسة التي يطل شباكه عليها فتحت ايضا ويسمع اصوات الطلاب

الغريب في الأمر ان كل شيء اكتسى بالسواد

هو يرى بواب العمارة لا يراه كما اعتاد لكنه يراه كتلة سوداء تتحرك ببطء لمسح المدخل

تعاونه ابنته الصغيرة

وقد تحولت هي الأخرى إلى بقعة شديدة الظلام

كذلك رأى التلاميذ يلعبون ويصرخون

هو يراهم لكنهم ايضا كتل سوداء تتحرك في ظلمة شديدة لا يعرف متى بدأت ولا متى ستنتهي

ولا كيف حدثت

حاول ان يتحسس يده "ا ويقرصها" لكي يتأكد ان هذا كابوسا من الكوابيس التي اعتاد عليها في السنوات الأخيرة

لكنه شعر بألم القرصة

.....

فتح باب الغرفة ليجد امه تحضر الافطار لكنها هي الأخرى مكتسية بالسواد

كذلك اباه يطالع نشرةالاخبار

وهو غائص في مقعده المعتاد الذي لم يغيره منذ امد بعيد ثلاثون عاما تقريبا ...
رآه هو ايضا لا يظهر منه شيء

جن جنونه ماهذا الذي يحدث ؟

مجرد أشكال هندسية اعتاد ان يراها لكنها الآن اختفت أو تحولت إلى كتل متحركة غاية في الغموض

صباح الخير يا أمي لم ترد عليه

أو خيل اليه كذلك ...هي ردت لكنها لم تنظر اليه

فتح باب الشقة ليحضر جرائد الصباح

من جارهم الاستاذ عماد لانه يستيقظ مبكرا ويأتي بها إليهم

دق الباب فتح له عماد الموغل في سواد لا قرار له واعطاه الجرائد وقفل الباب دون ان يعطيه أي فرصة للكلام معه

هي نفس الجرائد بنفس العناوين المستفزة المعتادة كلام المسئولين الممل الكئيب المتكرر عن الاستقرار ومعدلات النمو

وعن حكمة الزعيم الملهم الذي لم ولن تنجب بنات الأرض مثله

وكلام المعارضين والنخب الأكثر كآبة

.......كلام.... عن احلام التغيير التي لم يلمح أي منها سوى تغيير رابطات عنق النخبة الداعين إلى التغيير

دخل إلى غرفته سريعا ليكتشف ان صفحات الجريدة هي الأخرى سوداء

لكنه يستطيع بسهولة ان يتعرف على الحروف ويجمعها لتكتمل الجمل

والاخبار والقصص

براءة صاحب قضية اكياس الدم الملوثة

الحكم على مراكبي بالسجن عشرة سنوات لتسببه في مقتل 6 فتيات

بينما المتسبب في مقتل ألف وثلاثمائة نفس حر طليق في بلاد الضباب

بداية محاكمة لنشطاء حقوقيين

وسط تكهنات ان المحاكمة سوف تدار بأحدث تقنيات " التحكم عن بعد "... والثري جي اس من مكتب ال.... مباشرة

احتمالات زيادة معدلات سرطان الاطفال والفشل الكلوي في مصر بحلول عم 2040

اعلان الدولة الفلسطينيه من جانب واحد

قانون الاحوال الشخصية الموحد ....

صحة الرئيس ونشاطاته التي لا تنتهي ....

الصراع الكوميدي مع دول حوض النيل

كلها حروف ثقيلة وكئيبة

تكون جملا اكثر كآبة
تداخلت الكلمات مع بعضها البعض لتكون دوامات من الاحرف
لا معنى ولا نهاية لها

تمكنت الكلمات البائسة من التسلل الى أعماقه متحولة لفيروس يأس قاتل

وسيط ذاك اللعين عليه بحيث لم يعد هناك مكان لاي بارقة امل

حول ان يغمض عينه ليخلد مرة اخرى إلى النوم الذي اصبح في هذه اللحظة الملجأ والملاذ الاخير

لكن دخلت عليه شقيقته علياء تخبره بأن عليه ان ينزل لاحضار بنات اخته الكبرى من" محطة مصر" لانهم عالقون هناك

ويخشون الركوب مع أي سائق تاكسي

طلب منها ان تعطيه دقائق ليجهز نفسه

نظر إلى علياء فاكتشف انها الوحيدة دون الجميع تظهر له بشكل طبيعي ملائكي طالما اعتاد على رؤيته

وليست شبحا من تلك الاشباح السوداء المرعبة التي رآها منذ بداية اليوم العجيب

السكوتر هو الحل

طالعتنا الصحف الحكومة والمستقلة بخبر جد عظيم عن صحة الرئيس مفاده ان الرئيس


بخير حال وبأفضل صحة.
!!! بل تمادت التصريحات بقول السيد عمر سليمان بأن: الرئيس مازال يمارس رياضة الاسكواش
و ان الموظفين برئاسة الجمهورية يلهثون جريا وراء الرئيس في مداخل ومخارج وطرقات قصر الرئاسة
من فرط نشاطه وحيويته
وأنا من مزنقي هذا أطالب ديوان الرئاسة صرف
عدد واحد سكوتر ستانلس أمريكااني لكي يلاحقوا على النشاط الزائد للرئيس .

في البحر سمكة

 لكم كنت أتمنى ان اكون سمكة

......

 استنى اضرب دي وأنت بتقرا

لانه يقال ان السمك  لا ذاكرة لديه على الإطلاق

زمان قيل ان الانسان كائن مفكر

وهذا يميزه عن باقي الكائنات التي خلقها الله سبحانه وتعالى

                    

لكن اتضح فيما بعد ان هناك بعض الحيوانات تفكر ربما افضل  

من بعض البشر  

راجع  مثلا كيف يفكر  اعضاء حكومتنا الالكترونية الرشيدة  في معالجة بعض الملفات الحساسة  كقضية دول حوض النيل  وستجد ان القرد شمبونجو في بعض الأحيان يخرج علينا بأفكار افضل من افكار الحكومة الخزعبلية

 الأسماك لا تتمتع  إلا بذاكرة مؤقته  قصيرة جدا  تكاد لا تتعدى  ثواني معدودة

لذلك ينصحك خبراء الأسماك والمعنيون -حلوة المعنيون دي ها؟

  بينصحوك بايه بقى  آه بينصحوك يا سيدي إن لو عندك  حوض  سمك وفيه 5 سمكات

مش عارفة ليه خمسة بس خلينا نقول خمسة علشان الحسد وكده

اوعى تحط أي امل انا ايا من  السمكات الخمسة تلك هاتفتكرك أو هترتبط بك زي مثلا مابيرتبط بيك  اسم الله على مقامك - كلب

أو قطه

ولا هيعبرك ولا هيفتكر إن انت اللي كل يوم بتحطله الأكل وبتنضف الحوض

وبتزود الموتور كام فولت علشان ينعنش

فالسمك بالنسبة لنا كده واطي  واطي يعني  ياكل وينكر

بس دي الفطره التي فطره الله عليها يعني مالوش أي ذنب

الكارثة بقى في البني آدمين

اللي هو احنا

عندنا ذاكرة  ومش أي ذاكرة شورت ولونج وبكرانيش كمان 

بس بنستهبل ونعمل زي السمك  بناكل وننكر

وننسى اللي مد لنا ايده بطبق فاهيتا

أو حتى سندوتش فول  من عند الشبراوي

بننسى اللي وقفوا جنبنا

ليه ؟

علشان احنا رجالة ووقفنا وقفة رجالة

أنا مش عارفة أنا بقول إيه أو إيه الهدف من التدوينه دي

بس هو عمو احمد خليل قال إني بقيت كسلانه وبقالي  21 يوم مش كتبت حاجة

...................................

..................................

 

                                                       cut                                                 

اجمل حاجة في الدنيا فعلا ان عندنا ذاكرة

سينما مجانية

مخرجين فشر سبيلبرج  وريد سكوتلي وممثلين وكتاب سيناريو ولا بلال فضل في ازهى عصوره

نجوم

متقولش سير شين كونوري

أو حتى احمد حلمي كونوري برضه  ومنة شلبي طبعا

 بس ساعات الذاكرة بتاعتنا دي

بتودينا مناطق تراجيدي اخر حاجة

مثال

           - افتكر  كده أول مرة  ابوك ماوافقش على رحلة المدرسة للعين السخنة- بحجة انه خايف عليك 

 قمة التراجيديا طبعا
خصوصا لما تكون  مدي  امل ل "نور" زميلتك أنك طالع يعني طالع

 - ساعات  تانيه  بتكون سينما الذاكرة دي مليانة- سسبنس

فاكر أيام ماما  اما قالت لك: مش هقولك يا خالد  إيه المفاجأة اللي  محضراها لك إذا نجحت في الثانويه العامة بمجموع كبير ؟

 ..............

............................ وكانت بمبه طبعا  يا خالد

 لا انت نجحت بمجموع كبير

لانه يفترض المجاميع الكبيرة  أيام د . حسين كامل بهاء الدين

             باطني- اطفال - حميات

تكون فوق التسعة وتسعين وتسعة من عشرة في المائة

آه آه بتفكرك بموضوع الاستفتاءات ......يوه قصدي الانتخابات واخترناه اخترناه

فـلا انت بتجيب المجموع الكبير ولا ماما بتجيب الهدية اللي اصلا هي ماكنتش عارفة هي ايه

ساعات تالته بقى بتكون  أفلام ذاكرتك دي طفولية وبريئة آخر خمس حاجات

اللعب  مع اصحابك على سلالم العمارة

 "إنك تكون لاول مرة في تاريخ شارعكم  والشوارع المجاورة"صاحب اللعبة  "

بعد سنوات الضياع اللي كنت بتقضيها  كصاحب أو تابع لصاحب اللعبة

وصاحب اللعبة اهم امتيازاته انه يختار من اللي يبقى معاه ومن اللي مش معاه

وهو اللي بيحدد قوانين اللعبة

ومن اللي يلعب ومن علي يقعد يستنى دوره 

اللي ساعات كتير مابيجيش

وممكن يطلع بافتكاسات غريبه زي انه يوزع "أسهم  "اللعبة على عيال الشارع وفي ستميت داهية الاجيال اللي جاية بعدك انت وأصحابك

المهم أنك تتمزج

بالذمة مش بيفكرك الكلام ده بصاحب امانة السياسات ؟

أهو كله لعب في لعب

كمان أفلام الذاكرة عندك بتكون مليانةبالعواتشيف الجياشة

ومن منا ينسى حبه الاول

مش بنت الجيران بقى أو ابن الجيران

أنا عن نفسي كان حبي الاول مش ابن الجيران

 كان...... وانت مالك يا رخم

المهم يعني

اللي نفسي اقوله أو اوصله لك

وليَّ أنا كمان

دايما انعش ذاكرتك

وخليها

دايما مصحصحه

وفايقة كده .....

........

الغريب بقى ان نفس ذات الخبراء

ونفس ذات "المعنيون" السالف ذكرهم أعلاه

بتوع السمك مالوش ذاكرة

هم اللي  بينصحوك تاكل سمك كتير قوي جدا خالص على قد ماتقدر ......ليه ليه ليه ؟؟؟؟

قلت لي ليه

لانه بيقوي الذاكرة

 وده يؤكد لنا  عدم صحة المثل القائل

 فاقد الشيء لا يعطيه

.......

تدوينة حداد

حدادً على شهيد الداخلية خالد سعيد

اللفافة

 اعلنت مصلحة الطب الشرعي نتائج الكشف الطبي على خالد سعيد شهيد الطواريء
والدكتور  شكشك  ابو ضمير مابينامش  بدون دخول في تفاصيل أو" سي اس آي" أو جرايز  اناتومي"  ...... طلع التقرير عنب عنب عنب "
يعني خالد  ضريب ترامادول وبانجو وحشيش وكله كله
والاصابة اللي في وشه بسبب انه كان بيخبط نفسه في  السلالم الرخام من تأثير الترامادول . كل الكلام ده مش جديد وكلنا عارفينه أنا اسفة
الجديد بقى إيه ....
الداخلية بقى غيرت شعارها وبقى " الشعب في خدمة اللفافه  "
وفتحت فروع  مشروع : خدمة حشر اللفافات

الشعب بس عليه يفتح بقه واللفافه موجودة
عندنا كل الاحجام
وجميع المقاسات
اولادي /..... بناتي...... وحريمي ورجالي
لفافة بطعم الفراولة والتفاح والمانجو  والبانجو طبعا
لفافة وسط لفافة حجم صغير لخالد وأمثاله
لفافة حجم كبير لل..... وأمثاله- أحسن أفول على الراجل -
لفافة بنكهة الذل  وطعم الظلم و الزور والزيف والطغيان 
                شعارنا:
عارضونا تجدوا مايسركم
لفافة التمرهندي والبانجو دي مخصوص علشان رمضان
لفافة اللحمة اللي الناس نسيت شكلها ودي بنقدمها في عيد الاضحى-   يا سلام على الحنية يا سلام على الانسانية -
لفافات حجم عائلي لو عيلتك كلها بتشتغل معارضة 
يقوم بالخدمة مخبرين وامناء شرطة مدربين على احدث انواع الحشر
افضل تقنيات اللفافات......... اسرع خدمة
فقط كل ماعليك  ان تفتح بقك وتقول لا
 خدمة توصيل اللفافات للمنازل
فقط اتصل بـفروعنا في جميع انحاء الجمهورية 
نحن نوصل اللففات اسرع من ماكدونالد وك إف سي
 سعر الشحن ثابت    (عمرك بس ..)  سعر اللفافه ثابت..( احنا مبنشتريش بنجيب من الاحراز اللي عندنا ) اينما كنت
مع تحيات
العادلي وشركآه

وقع

(مشهد (1 )

نهار خارجي ميدان التحرير ......عادل يقوم بترتيب الفرشة بتاعته يضع طرح الحجاب الملونه بعضها بجوار البعض )

ثمة آمين شرطه - رزل- الحقيقة يقترب صارخا في وجه عدل : شيل ياد الفرشة بتاعتك دي من هنا ويلا غور.

عادل : ليه بس يا باشا ده احنا لسة بنقول يا هادي روق كده .....أنت فطرت ولا لأ يا باشا ؟

...... الأمين: لا فطرت ولا نيلة احنا شوفنا حاجة منك يا ابن ال....

يضع عادل يده في جيبه ويعد 10 جنيهات ورقية هاي كل مامعه وبحركة مسرحية يضعهم في جيب الأمين

آه نسيت اقولكم : عادل : 28 سنه بكالوريوس خدمة اجتماعيه من 7 سنين وواقف على الفرشة و......بـيحلم بالتغيير

.....قطع ...

ينتظر ان تعلن المضيفة عن قيام رحلتها المتجهة إلى مطار هيثرو يدخل دكتور البرادعي مطار القاهرة من صالة ... كبار الزوار الغير مرغوب فيهم طبعا -على اعتبار أنه موظف أممي قديم -.... .... ...

زززززززززز اصوات محركات الطائرات واعلانات قيام الرحلات تختلط مع اصوات الباعة الجائلين في ميدان التحرير

( مشهد ( 2

نفس النهار ونفس الخارجي

مستشفى ابو الريش التعليمي ....تقف صباح تدل الملابس التي ترتديها انها من ريف دلتا مصر الخمار الطويل والشبشب الأسود و كيس بلاستيك يحتوي على صور اشعة وتحاليل تخص ابنها الذي احتار الاباء في تشخيص الحالة المرضيه التي عنده تحمل على كتفها طفلها الذي يبكي بلا انقطاع وتحاول ان ترضيه باي طريقه تسأله في حنان متناهي : راضي

.

..............اجيبلك علبة عصير يا ضنايا ؟

.......وكمان قطع

يدخل الدكتور البرادعي احدى الكافيهات السياحية في المطار ويطلب عصير طماطم ويبدأ في شربه بتؤده ومزمزه

يرد الطفل بـ.............

فتذهب صباح لشراء علبة عصير يفاجئها البائع ان العلبة بـ3.75 قرش تسأله ليه ؟ دي بجنيه وربع في البلد يرد عليها بفتور شديد : روحي اشتريها من البلد .تاخذ العلبة صاغرة وتفتحها لولدها وتذهب مرة اخرى للوقوف على بوابة المستشفى تستسمح كل من دخل من اطباء وممرضين وأفراد أمن ان يسمحوا لها بالدخول لمقابلة الدكتور فلان المشهور اللي بيطلع في التلفزيون لان اولاد الحلال قالوا لها انه بيشتغل هنا وهو الوحيد اللي هيقدر يشخص ويعالج حالة ابنك ...بلا طائل تتحايل ولا مجيب ....

صباح..... 23 سنه آه والله ....عاملة نظافة في التأمينات الاجتماعية- بعقد مؤقت -ابنها مريض ولا تعرف ماذا تفعل وتحلم بالتغيير

(مشهد (3

نفس النهار اللي مش عاوز يعدي .... أحد مكاتب مصلحة الجوازات

سيد ومصطفى ومحمد وأمير ورياض وحسين ...واميل وتوفيق وشهاب واحمد .....و غيرهم كتير قوي قوي ........يستخرجون

جوازات سفر .......لكي يهجوا من البلد على حد تعبير احدهم .......

..........مستنيين دورهم أما صول المكتب ينادي على أساميهم

واقفين في الطابور

في طابور آخر يقف الدكتور امام ضابط الجوازات المرتب الذي يريد ان يبتسم وفي نفس الوقت خاف ان يظبطه أحد يبتسم للبرادعي حقه تبقى مصيبه سوده

يحاول ضابط الجوازات- بتاع المطار مش التاني بتاع جوازات الشباب اللي مستنيين أما الصول ينادي عليهم- ..يحاول ان يتحكم في اعصابه ويعطي للدكتور جوازه مع ابتسامه محايده

فوفو فو فو فو فو فو فوفوفوفوفوفو- صوت الطائرة تهبط أرض مطار هيثرو

مساء خارجي

يلتقي الدكتور ببعض اعضاء الجمعة الوطنية للتغيير ويصتحبونه للفندق وهناك يرى جورج

طبعا كلنا عارفين حكاية جورج

بس الباشا جاب حكاية جورج على التويتر ومش جاب حكاية ابانوب بتاع ليلة عيد الميلاد اللي اتقتل في نجع حمادي ....

ابانوب 17 سنة مصري ولد زي الورد كل جريمته انه قبطي وكان رايح يحضر قداس عيد الميلاد ولابس هدوم العيد الجديدة ........اتقتل...... أكيد ....أكيد أكيد كان بيحلم بالتغيير

(ززززززززززززززززز ......ززززززززززززززز. (مطره)

يلقي الدكتور كلمته وسط حشد من ابناء الجالية المصرية في بلاد صاحبة الجلالة ويتوجه إلى مطار هيثرو عائداالى قاهرة المعز

يصعد سلم الطائرة

أكيد كان راكب درجة رجال الأعمال وش يعني

وهناك يلتقي بنهلة

...

يخرج عم رجب من طابور العيش يسب ويلعن للجميع وياخذ العيش ويجري لاهثا ليصعد به لأولاده واولاد ابنته التي طلقها زوجها ويعيشون جميعا في نفس الغرفة وتبدأ ابنته- نهلة -ايضا - شوف الصدف العجيبة يا أخي -في تحضير الغذاء

........

تحب اللحم دون ولا ويلدون يا فندم؟ تسأل المضيفة الاسكندنافية الملامح السيد المذكور أعلاه بلهجة انجليزية متقنة

لا أنا هاخد أي حاجة فيجي مع تروفيلي وكوباية صودا من فضلك

.....

تبدأ نهلة- التانية - في غرف أطباق الفول النابت وتقوم بتحضير البصل الأخضر والعيش لكي تبدأ وليمة الغداء

-على الجانب الاخر من الطائرة كان" الحاج " يتناول غداه مع نهلة - بتاعة انجلترا

تحكي له عن تعليمهاالجامعي وانها تحلم بفرصة عمل جيدة في بنك باركليز فرع جاردن سيتي وان تغير سيارتها البي ايم دبليو من الفئة السادسة الى السابعة

ينصت اليها مهتما ومن فرط اهتمامه لا ينتظر حتى تهبط الطائرة ويرسل لنا تويتايه جو أرض عن نادية والتغيير الذي تحلم بيه

آخر مشهد

عادل يجري بالفرشة ليختبيء في أحد ممرات الشواربي من عساكر البلدية ....

صباح تتوجه لموقف عبود لتركب ميكروباص يوصلها للبلد بعدما فشلت في مقابلة الدكتور المشهور

مجموعة الشباب ياخذون جوازاتهم من مكتب الجوازات فرحين

يتوجه بعضهم إلى سمسار مراكب يضعون الباسبورتات في يده لشحنهم على أول مركب موت مغادرة البلاد

تذهب ام ابانوب إلى قبر ابنها تتلو بعض الصلوات بعيون ذابله لم تجف ابدا

ويستمر الدكتور في حديثه اللانهائي مع نهلة

على وعد بأن يقابلها في أول اجتماع لنادي الليونز

يأبى الستار ان يسدل

مياه معدنية

 كانت المظاهرة عنيفة اليوم ليست ككل مرة ....... الاعداد تتكاثر و الأطياف تتنوع  نساء وأطفال شيوخ ورجال  شباب وشابات كان هناك  سيده في مقتبل الخمسينات واخرى أربعينية وطفل لم يتعدى الثامنه مع أمه لطالما ذكرته نظرة نظرة هذا الطفل   ب "علي "  ابنه   ...تجنب النظر إلى وجه "علي"  لا لا ليس هو

الحر يزداد  والضغط على اعصابه يزداد اكثر واكثر كلما  اشتدت الهتافات وعلت في الفضاء    .....  النداءات والهتافات  تخترق سمعه وبصره  وقلبه كالسهام  الحادة   .... ....... لم يعطها اهتمام .وباشر  عمله في جديه و صبر لا ينفذان.... الحر اليوم لا يحتمل
يشخط في  أحد عساكر الخدمه بان يحضر له زجاجة مياة معدنيه من عربة المهمات  فحلقه اصبح  مثل   عود اخضر يابس حرم من الماء  لأيام وأيام
سأل  نفسه  أجلس   تحت المظله وأرشف المثلجات والماء  واشعر بكل هذا التعب  مالهؤلاء  لا يتعبون ؟
تجاهل  أفكاره  السلبية وأمر بتضيق الخناق أكثر وأكثر على  المتظاهرين .. تعجب من هذا الرجل الذي يبدو انه على اعتاب  الستين كيف له ان يخاطر بصحته وحياته؟؟ ....... لبرهة  .. يتبادلان  -هو والعجوز- حديثا صامتا ... خيل اليه انه يتحدث لوالده   ينهره الوالد على مايفعل ويبرر له الابن متخاذلا : هذا عملي يا ابي وهذا واجبي نحو وطني وأنا افعل الصواب والحق  ينهره الوالد نهرا  لاذعا : ليس هذا ماوعدتني حين كنا  نكتب استمارة الرغبات  ..... يستفيق من غيبوبة العراك الافتراضي ويشيح بناظريه عن وجه الرجل ...... يأتي  عسكري المراسله  بزجاجة المياه يشرب قليلا وينظر إلى الوراء يجد سيده  أكل الزمن وشرب على وجهها  تنظر اليه   وتبتسم   ابتسامه حانيه و غاضبه  في الوقت ذاته .... لم يستطع ان يبتلع  شربة  الماء   وقفت  قطرات الماء في  حلقه  وابت ألا  تنزل جوفه  بصق الماء وفي هدوء  وعلى استحياء  سألهـا :تشربي يا أمي ؟ لم ترد عليه  لبرهة...ثم اردفت :كيف لي ان اشرب وانت تمنعون عن كل الماء ؟  شكرا يا ابني .....   لمعت عينه وتذكر أمه وهي تصلي داعية له بالنجاح في امتحانات الثانويه العامه  كانت  رحمها الله اكثر من المعارضين  لدخوله كلية الشرطه ... تمتم في صمت رحمك الله يا امي .....
كانت الهتافات تتزايد والمتظاهرون يحاولون بشتى الطرق ان يخترقوا  حلقة الحصار المحكمة عليهم دون فائده .. كلمة حاولوا اختراق الحلقه كلما  طالب اعداد اكثر واكثر من جنود الأمن المركزي بمحاصرتهم وتضييق الخناق عليهم حتى يستسلموا ويطلبوا مغادرة المكان ...... سمع صراخ قادما  من قلب الحلقة المحكمة الاغلاق
 فتح  ثغره  يبدو انها تخطت عامها الجامعي الاول لم تحتمل الحر والعطش و التعب   فاغشي عليها .... طلب  من جنوده بفتح ثغرة صغيره لإخراجها .... بدت الفتاة شاحبة وفاقده تماما للوعي ..... ألا تشبه  "علا  "؟   لا لا  لا تشبهها  كلا تشبه  "علا"  ؟,,,,نعم هي تشبهها تماما وكيف له ان ينسى أول من  خفق قلبه لها بالحب  ... تخيل الفتاه المغشي عليها تسأله : هل  يخفق قلبك مثلنا  ؟ واجابة دون ان تنتظر منه  الرد :اشك ..... اطرق بوجهه وطلب من عناصر الشرطه- النسائيه- ان يرافقوها حتى تأتي سيارة اسعاف .
 
   طرد الافكار    اللعينه التي تهاجمه من  من رأسه  وحدثته نفسه : آه..... لو كانت الافكار رجلا لأعتقلته  وطبقت عليه قانون الطوارئ في الحال  ... لماذا لا نعتقل الافكار كما نعتقل  أصحاب الافكار ا ؟ يبدو ان سهرة أمس  تركت  على  عقله غلاله رقيقه  من ذلك الدخان الازرق المحبب إلى قلبه  ابتسم.......
وبدأ في اعطاء الأوامر بـتشديد وتضيق الخناق عليهم أكثر واكثر    ......  تعالت اصوات الصريخ : حرام عليكم فيه هنا بنات هتموت من الخنقة ارحموهم هنموت انتوا إيه كفار !! 
شعر بالزهو  فخطته قد اوشكت  على النجاح وسيبدأ الجميع بطلب وقف الحصار وانهاء المظاهرة 
لكن فجأة وعلى عكس كل توقعاته........
... اشتدت الهتافات اكثر واكثر   وازدادت حيويه  الأجسام المنهكه والحناجر المشروخة كأنها تبعث من جديد لم يعرف السبب إلا بعد ان رأى "عماد" آه  لقد جاء   مصدر التعب والقلق للجميع  عماد ..... شاب في مقتبل  الثلاثينات   يطلقون عليه  اب المظاهرات الروحي   ,,,, يحبه الجميع بلا  استثناء  الوحيد الذي تتفق عليه كافة اطياف المعارضه  ما ان يأتي حتى يبعث الروح والامل في الجميع وتبدأ المظاهرة من جديد في ترديد هتافاته المثيرة  بلا تعب أو كلل ... ابتسامته تشرق على الجميع وتظلهم  من قيظ شمس يونيو ........
ذكره "عماد " بـصديقه " احمد" الذي طالما طلب منه  كثيرا  ان يجلس ولو مره  بهدوء مع نفسه ليراجع  مايقوم به ويحاول ان يتفهم حال البلد والناس ولماذا يفعلون ذلك ..... وأن الضغط يولد الانفجار وان الحل في ان يصبح الناس أحرار .. كيف له ان يعرف مايصح وما لا يصح ؟.... أنا لا احب التنظير يا احمد  اسكت بقى يا اخي ..... لن اسامح نفسي أبدا لقد  احتديت عليه في آخر نقاش  لنا معا وسافر ونحن  متخاصمون كيف لي ان افعل هذا بأقرب اصدقائي واحبهم إلى قلبي .....  تتعالى الهتافات  أعلى وأعلى تكاد تصك الآذان
    تمر اللحظات ثقيلة  بطيئه هي تمر لكنها   تبدو  وكأنها لا تمر أبدا ,,,,,لحظه يأتي له أحد العساكرلاهثا ويبدو عليه الارتباك يا باشا  سعادة اللوا فهمي باشا وصل  يا باشا
يسرع  لمقابلة اللواء فهمي ويحاول ان يبتسم في وجهه ...... يرد عليه اللواء بنظرة امتعاض
يوبخه بعنف قائلا: ماهذا يا حضرة الظابط إيه الحنيه دي كلها ؟ دي رحلة للعين السخنه دي ولا مظاهرة ... يحاول ان يشرح له  انه يفعل كل مايستطيع حتى لا يعطي الفرصه للقنوات الفضائيه للتشهير كما يفعلون كل مرة .....
 ينهره اللواء ويامره بالابتعاد  فهو من سيتعامل مع هولاء  "العيال "يستدعي فرق الكاراتيه والقوات الخاصه المتخفيه في زي المدنيين
يأمر بجتياح المظاهره بلا هواده ولا رحمة
الضرب في كل اتجاه بلا  أي تفرقه  ........ الشباب يسحلون ... وتجرجر الفتيات من ملابسهن وتمزق  بل و تهتك اعراضهن على يد  كلاب الباشا  دون ذرة احساس أو شعور .. الصراخ يعلو  ...حرية حرية ....  المشهد يصبح اكثر سخونه من شمس منتصف النهار الحارقه  يرى" علي"   أو  كما رآه  هو علي  يضرب وامه تحاول الذود عنه بلا  طائل تصرخ  الام :ده طفل يا اولاد الكلب إيه مفيش رحمة ؟؟  يجرجر الاب العجوز إلى عربة الترحيلات وتسحل الأم  المتعبه بلا رحمة......  البنات تصرخ والشباب يهتفون حتى وهم مقيدون .... يتحول المكان إلى فوضى لانهاية  لها
يجد نفسه  بدون شعور يحرك شفتيه ويقول : يسقط  يسقط حسني مبارك

يسدل الستار

ليه ؟

يا ترى كان نازل السيبر علشان  النت عنده مش كان شغال ؟

...

  طيب يكون مدفعش فلوس الاشتراك والولد بتاع الوصلة قطع عنه السلك ؟

......................

 يا ترى كان نازل علشان يقعد على النت يدور  على أي وظيفة

و لو حتى اوفيس بوي لانه بقى عنده   28 سنه ولسه بياخد مصروف من والده....

 أو مبقاش يستحمل كل كام يوم أما يلاقي والدته   تسيب له  20  جنيه تحت المخده

لان المصروف مش كان بيقضيه ؟

يمكن كان داخل على موقع من المواقع   بتاع الهجره لكندا أو امريكا  وكان بيحاول يملا  ابليكاشين

لانه زهق من حاله ومن حال البلد وهايسبها للي فيها

أصل مصر  مبقتش بلد ولادها 

 مصر بقت بلد  ولاد الحرام اللي اشتروها   بفلوسنا

و

 شعور الفرد بآدميته في مصر رفاهية  وحلم  بعيد المنال

......

طيب تفتكر كان رايح يكلم صاحبته ؟

أصل الرصيد بتاعه خلص وكان ضروري يكلمها لانهم كانوا متخانقين علشان كل يوم يجيلها عريس جاهز وخلصت كل أسباب الرفض ومش عارفه تعمل إيه وده موضوع كبير محتاج ساعة ساعتين وهو مش معاه يشحن بعشرة جنيه ؟

أو يمكن كانت وحشاه قوي فقال يكلمها وخلاص   فقرر ينزل يكلمها ساعة بـاتنين جنيه ونص اوفر من انه يشحن  

 ويخلي العشرة جنيه يبقى يعزمها بيها  على الكورنيش

.............

 مش يمكن كان مدي ميعاد لواحد صاحبه  في النت كافيه

 و هيروحوا لواحد تاني صاحبهم برضه وينزلوا " مصر "  يدوروا على أي شغل 

..................

طيب يمكن كان زهقان ورايح يلعب ميدال اوف اونر أو سيلك رود

طيب كلل اللي فات ده  يدي أي حد الحق انه يعمل فيه كده ؟

لا سرق

ولا تاجر في المخدرات ولا كان ارهابي

لا اشترى الأرض برخص التراب وراح بنى عليها فيلات وقصور و منتجعات

لا ورد للمستشفيات  اكياس دم ملوثة

ده حتى مضيعش نصوص اتفاقية  حوض النيل

ولا كان صاحب عبارة  غرقت وأخدت معاها 1300 واحد

ولا استورد  أسمده  مسرطنه

هوعمل إيه ؟

بورتريه 1 - حضرة المحترم

إذا اردت ان تتعلم فن الحوار وسعة الصدر ورحابة الفكر   فلتكن وجهتك إلى هذا الشخص

هدوء الطبع ورقي الحوار وبساطته- على عمقه- كلها سمات اصيلة في هذه الشخصية

صانع الامل ومورده الأساسي ومديره التنفيذي  على الشبكة العنكبوتيه

الناظر دائما  إلى نصف الكوب المليان

 "كلما اعترى الجميع اليأس يأتي هو ليبدده  بعبارته الأشهر والاجمل والاروع :" روقوا بس بكره هتروق  وتحلى

مبدأه  : الجميع خير مطلق إلى ان يثبت العكس

........ 

حتى خلال اختلافه مع الاخرين تجد رومانسية الاختلاف العذب الهاديء

الوحيد- واكررها- الوحيد الذي يكن له المختلفين معه قبل المتفقين  كل احترام وادب

عنده ويقف الجميع انتباه لا  خوفا أو رهبة بل حباواحتراما

 مثقف إلى الحد الذي يجعلك تنظر إلى نفسك  خجلا فتجري على اقرب مكتبه لتقرأ كتاب

 ...رغم انه لا يستعرض ابدا خالص جدا  ثقافته هذه على الاخرين .....

على العكس تماما  من اشباه و انصاف

 وارباع المثقفين الذين يحاولون  بشتى الطرق ان يظهروا ضعفك وجهلك وخيبتك القوية

-يحاول ان يساعد الجميع بلا اسثناء- حتى أنا

يحترم الكبير والصغير والنص نص

  .........

دمه شربات

كثير السفر والترحال رغم انه لا يعلن عن ذلك ابدا"  لول "

.مش زي ناس تانيه قبل مايسافروا ولما يسافروا وبعد مايرجعوا من السفر يعلنوا عن "السفرية"

يشعرك بأهميتك وأهمية رأيك لدرجه تعتقد معها أنك

فعلا مهم !!!

نقول كمان ؟ ؟

نقول كمان

 عيوبه بقى

أكتر عيب لما  يقولي : يلا يا بنوته قومي ذاكري

!!!أو مش كفاية كده بقى

اخر هينت

عنده حد قريبه على التويتر

ومن اجمل اللحظات واعذبها وهما بيكلموا بعض قدامنا

أكتر من كده هتبقى سهلة بقى ويا "ويلك  "  لو  مش هتعرفوا

حذر  فزر يطلع مين

فورمات

استيقظ على عجل ...... دخل الحمام غسل أسنانه ورش وجهه بالماء .....ووضع التيشيرت

والجينز على جسده المتعب على أثر ليلة أمس

نزل بسرعة وخفه متحديا التعب الواضح على أجفانه المنتفخة ......... على سلالم العمارة

!!!!تذكر انه لم يحضر اللابتوب ...كيف لهذا ان يحدث

صعد السلالم مرة اخرى اخذ اللابتوب ونزل

بدأت اأطرافه ترسل اشارات إلى مخه انه اصبح نصف متنبه

كان على يقين ازلي ان نصف عقله الاخر سيعمل بكفاءة متناهية لحظة دخوله وسط الزحام

بسرعة أدار محرك السيارة وتوجه إلى العمل

لم ينسى هذه المرة ان يضع "الكوفيه الفلسطينية " على كتفه على الرغم من حرارة الجو .....

دائما يحتفظ بـكوفية "سباير" في تابلوه السيارة

هذا اليوم هام جدا بالنسبه له اليوم" معركة البقاء" لأجل "الفولتيلا

رتل االسفن الذي انطلق من تركيا متحديا الحصار الاسرائيلي على القطاع

....لازم تبقى " ترند توبيك " ابتسم مكتشفا انه يتحدث الى نفسه بصوت خفيض لازم" الفولتيلا "صوتها يوصل للعالم كله النهار ده إن شاء الله

اكمل حديث لنفسه غير عابيء بجاره في السيارة الأخرى الذي كان ينظر له بإشفاق كبير

وذاب في الزحام

ابتسم في وجه ندى زميلته في المكتب

" بسرعة قام باعداد الملفات التي طلبهاالمدير التنفيذي للشركة راجيا " ندى " ان ترسلها لانه " مش فاضي خالص "

جلس في حماس ونشاط

فتح موقع التويتر....

....

ثم بدأت "معركته" الخاصة جدا

بدأ بالتنقل بين مواقع وكالات الأنباء والصحف الغربية والعربية يجمع الاخبار والمقالات

من على الشبكة العنكبوتيه

وبدأ يرسل التويتات

..

عاوزين فلوتيلا تكون" التريند توبيك" النهاردة يا جما عة

هكذا ارسل

بدا في ارسال كل ما تقع عليه عينيه من اخبار

.............

كان يشعر بأنه قائد وخبير محنك في ساحة القتال

كان يعلم كيف ينتقي الخبر بل كيف يعيد صياغته ليجذب الانتباه ولا افضل محرر أخبار ,,,,

ويشعر كل مرة بالزهو و والفخر وهو يرى تويتاته

كلمة RT: تعاد مرة اخرى بلغة اخرى أو يضاف عليها (via) عصام

............

الاخبار تتلاحق والامور تزداد سخونة وسوءا في نفس الوقت

..

والانباء عن اقتحام القوات الاسرائيلية لقافلة الحرية تتوالى

ويتم التأكد من صحتها

وكلما زادت سخونة الأحداث ازداد هو ايمانا ويقينا بأن" مايفعله " سيكون له اثر

على الاقل سيعرف العالم كم هم جبناءوكلاب " هكذا كان يشجع نفسه ويحاول ان يقنعها "

الأنباء تبدو اكثر سخونه عن ذي قبل

يفقد القدرة على التركيز

لا يعلم أي الاخبار يقوم بنشرها وايها لا

......

الوضع يزداد غموضا

....انباء عن وجودجرحى

انباء اخرى عن وجود اسرى وقتلى

على متن احدى السفن التي

انباء من مصادر موثوق بها تذيع ان هناك قوات كوماندوز

انباء ثالثة ورابعة وخامسة و...و...و...

تتوالى بلا هواده ودون رحمة أو شفقة

الأرقام هي الأشياء الوحيدة في الحياة

التي لا تتجمل

تبدو عليه الحيرة

....لا يعلم ماذا يفعل

ينشر وينشر وينشر ويعيد نشر مايرسله له اصدقائه

...

منذ سبعة أيام وهم يحاولون ان يوصلوا للعالم انباء اسطول الحرية

ومنذ سنوات بعيدة يحاولون توصيل

معاناة أهل غزة المحاصرين

للعالم

الآن فقط تأكدت الانباء عن وجود قتلى على السفينة

والآن-فقط- أيضا- اصبحت الفولتيلا تريند توبيك

لكن ليس بالطريقة التي كان يخطط لها في عقله

لم تصبح شيء معلوم للقاصي والداني من خلال اطراف اصابعه التي تضغط على لوحة المفاتيح

لكنها اصبحت كذلك من خلال تلك الأصابع الهمجية القذرة التي كانت تضغط على زناد الأسلحةالأمريكية بلا رحمة ولا شفقة

فالقاموس الاسرائيلي يخلو أساسا من تلك الكلمات

أومرادفاتها

.....

فقط دماء الضحايا هي من جعلت ذلك العالم القاسي الاصم الاعمى المغيب يسمع

وويرى ويدرك ويعرف ان هناك...بعيدا بعيدا ...... علىالناحية الأخرى من العالم بشر ... بشر

بشر .... من المفروض ان لهم حقوق ككل البشر في كل مكان

لهم عيون ترى وقلوب تنبض ...

هم ليسوا بالكائنات الخرافية التي يسمعون عنها في كتب الاساطير

بشر في سجن كبير

يتم غلقه عليهم باحكام ليتضوروا جوعا

.....محرومون من الطعام والشراب

كوب اللبن لأطفالهم بمثابة الحلم بعيد المنال

قرص الدواء لمرضاهم رفاهية كبرى

...........

يحاول الخروج من نطاق الافكار التي بدأت تحاصره بضراوة

.............

يرسل له أحد المشاركين في" الحرب الالكترونية " على التوتير رسالة وبها لينك

يفتح اللينك ......

كانت اللينك عبارة عن فيروس قضى على الحاسوب تماما

بدأ الجهاز يتغابى

وبدأت الملفات تختفي الواحد تلو الآخر ...

حاول ان يسيطر على الموقف بلا طائل

اصبح الجهاز قطعة من الحديد دون أي فائدة

اوه

لا شيء يهم

اهم شيء ان الفولتيلا اصبحت ترند توبيك

هكذا حدث نفسه

عادإلى المنزل

وبدا يعمل للحاسوب

فورمات