أبو فريدة

شدني النهار ده خبر إن موظفي وعمال مركز المعلومات كانوا عاملين اعتصام

الخبر عادي

لان الاعتصامات بقت زي حوادث سواقين الميكروبصات على الدائري

اللي مش عادي بقى هتافات المعتصمين

اللي هي إيه بقى

...........

"يا جمال يا ابو فريدة احنا بقينا على الحديدة "

وكمان .....

" يا ابو فريدة اوعى تسيبنا احنا اخواتك يا حبيبنا "

وبتسألو احنا ليه كده ؟

طيب مااحنا اللي نفخنا في الناس دي

وخليناهم يتأكدوا انهم فعلا أصحاب الكلمة العليا

يمكن علشان الناس دي غلابة وتعليمهم على قد حالهم عملوا كده

بس اللي ميعرفهوش الناس دي إن كلامهم ده بيزيد العائلة المالكة المباركة طغيانا وعتوا

بيخليهم يثبتوا رجليهم أكتر

ويضحكوا الضحكة الشريرة نيوههاهاااااع

ويتأكدوا أكتر وأكتر ان لو حتى جه البرادعي

أو تمنتاشر واحد زيه ومتسألش ليه تمنتاشر هو كده

مش نافع أي حاجة

قال يا فرعون إيه فرعنك

قال لقيت الناس مظلومة ومكويه بتهتف بإسمي

!!!!!!!!!!!!!!

ده حتى عيب لما نلاقي حد بيمسح لنا الكرسي وينضف المكتب ويرتبه

ومنقعدش ونحط رجلينا وجزمتنا في وش الطخين والرفيع والطويل واالقصير

ليه ندي العالم دي فرصة يحسوا فيها فعلا انهم بقوا اصحاب اليد العليا

طيب إيه رايكوا في كام هتاف كده من عينة ابو فريدة؟ زي مثلا

يا ابو فريدة يا فنان فاضل إيه تاخده كمان؟

يا ابو فريدة يا شربات يا آمين السياسات

كرسي الحكم منور ليه ابو فريدة قاعد عليه

لولولولولويييي

مفيش فايدة يا عايدة

حبيبتشي ........ حبيبتشي

امبارح و امبارح بس عرفت معنا كلمة الضنا غالي
لما المدونه السكر بتاعتي كانت عطلانه ومش راضية تفتح
كنت هتجنن عليها قصاد عيني ومش شايفاها
مش عارفه اوصل ليها خالص آه يعني
وكل الناس بقى على التويتر- الله يبارك لهم-
حاولوا يساعدوني بكل طريقة
لحد لما خلاص رجعت
أي نعم مش فيه مقارنه بينها وبين ان يكون عندكابن بس برضه تعبت فيها
وسهرت اليالي عليها
ارتبها
اختار الوانها
ارسم بيدي
ادور على لينكات
والكلام علي انتوا عارفينه ده يعني
مهما كان اللي بقولوا فيها مش مهم أو تافه بس هي بتاعتكي





حبيبتشي يا حبيبتشي






:في هاذوها المناسبة الكريمة احب أفتكر نشيد قديم زمان

........

يا مدونتي يا مدونتي فيكي اقضي كل الوقتي

مع اخواني مع أصحابي
بين التويتي والالعابي :)

يا حلو يا اسمر

طبعا من عنوان البوست قولتوا شمبونجا خلاص هتوصف" حبيب القلب" بقى

بس علشان أصلا هو مايتوصفش مش علشان حلو

لأ علشان هو أصلا غير قابل للوصف

فـأنا هتكلم عن" نهر النيل" وازمة المياه

وكان الأستاذ اشرف العناني صاحب :مدونة سيناء حيث أنا "

"قد دعا معشر المدونين للاساهم في حملة "حر وب العطش

مش عارفة هيقبل محاولتي المتواضعة دي ولا إيه

هو أنتي لسة بتسألي إنتي بالنسبه لي إيه لا يا حبيبتي اطمني

الجواب عندي تلاقيه

ده مش هاني شاكر ,,,,

ده وزير الري بتاعنا بيقول لدول منابع النيل

السؤال اللي كلنا بنسأله احنا ليه المسئولين وعلية القوم مش حاسين بخطر حرب المياه؟

وليه المسئولين مش خايفين وحاطين في بطنهم شادر بطيخ شتوي وصيفي وكل الاوقات

ليه رجال الأعمال مش مهتمين بحكاية حرب المياه وخلافات دول حوض النيل مع مصر

وإن مصر لازم تمضي لازم تمضي لازم تمضي" نازم تشناب"

الاجابه في كلمتين يا حبيابنا

إنهما

.....

.......

........

........

and the Oscar goes to,,,,,,

المياه المعدنية

و

الأكل الاورجانيك

ماهو لو أي مسئول أو رجل أعمل كان محووج لمية الحنفيه

اللي طعمها بقى مايعلم بيه إلا احنا شاربي الصرف الصحي

كان بسرعة اهتم

وراح جري يشوف حل للكارثة

لكن كراتين المية المعدنيه ومش أي مية يا خفيف منك لها له ليهم

دي يا إما مية شركة" فيتيل " الفرنساويه يا مية" ايفيان" السويسرية

أو" فولفيك أو" بلو" الكنديه

مية" بركة"" وسيوه " والكلام الفارغ ده

مش لأصحاب المعالي والفخامة والسمو

ملوك وامراء ووزراء ورجال أعمال مصر المحروسة

لو كل واحد من دول حس بالخطر كان زحف على بطنه لحد اوغندا واثيوبيا وكينيا وباقي بلاد حوض النيل يعمل هناك مشاريع تهدي الناس هناك

وتحسسهم بأن ارتباطهم بمصر مش مجرد ميآه وبس.... لأ ده

حماية لهم ولاقتصادهم ولأمنهم القومي

لغة المال والاقتصاد هي اللغة الوحيده التي لا يختلف على فهمها اثنان

ابجني تجدني ....

ظرفني تعرفني......

واسثمرني اقدرك وتقدرني

لكن من الواضح إنا لا نجيد تلك اللغةغير جوه بس واحنا بنبيع القطاع العام ونخسخسه

بره بقى احنا بلده ومبنعرفش.....

مبنعرفش اللغة يعني وكده

اللي حاصل و بيحص ل وهيحصل انهم مش مستفيدين منا بـحاجة

بالعكس هم حاسين إن احنا بناخد منهم ميه ببلاش وإن دي سرقة !!!

لأ يبقى لهم حق كل الحق بصراحة انهم يخدوا اسرائيل بالحضن

اسرائيل اللي زرعت أرض اثيوبيا وكينيا بالورود الطبيعيه وبقت اهم مصدر للورود في اوروبا .....

ياختييي ياختيييييي ,,,,,,,,

لو حس المواطن في دول حوض النيل بأن الاستثمارات المصرية لها تأثير على حياته

وعلى انتعاش بلده اقتصاديا

كان هيبقى أول واحد يقف ضد حكومة بلده أمام أي مؤامرة على حصة مصر

من مياه النيل

لكن هانسثمر في دول حوض النيل إزاي

إذا كان فاقد الشيء لا يعطيه

رجال اعمالنا يستثمروا في قنوات زي ميلوتشي

ولوعاوزين يمشوا مع الموجة يفتحوا قناه دينيه

أو....

.........مشاريع زي

وادي دجلة وبـالم هيلز....واالرحاب

والضبعة اللي عاوزين ياخدوها عافية

أي مكان تاني

لأ لأ لأ

بعدين السادة الوزرا ورجالة الأعمال مابياكلوش خضار وفاكهة

زي اللي بناكلها احنا مروية لامواخذة بمية الصرف الصحي

دول ناس "اورجانك" أي والله اورجانك

الله يرحم أما كان الواحد منهم يضرب الأرض يطلع تمتمايه

وياكلها من غير حتى مايمسحها بكف ايده من طين الأرض

لو كان المسئولين ورجالة الأعمال دول حاسين بخطر على نفسهم أو اولادهم

انهم ينضموا لقوائم مرضى الفشل الكلوي في مصر

أو مرضى السرطان

كان بدنهم اتهز وبدأوا يفكروا ويدوروا على حل

بعدين حتى لو لا قدر الله.... لا قدر الله.... لا قدر الله ....كبدهم تعب

في ثانيه هيصدر قرار علاج ابن الباشا فلان أو لدكتور علا ن على نفقة الدولة

في اكبر واعرق معاهد زراعةالكبد في العالم

..........

لو حسوا انهم معرضين في يوم من الايام لخطر الموت عطشا أو جوعا

لهرولوا وتحركوا بطول دول حوض النيل وعرضها

المبكي المضحك إن استثمارات الصين الصين بتاعت الفوانيس وسجاجيد الصلاة ايوا هي.... استثماراتها في اثيوبيا لوحدها

100

مليار

دولار

واشترت اراضي هناك بحوالي 20 مليار تانيين تزرعهم

نيجي للهند اسثماراتها هناك حوالي 35 مليار دولار

35 مليار يامؤمن أنت وهو مش مليون

والسودان 3.5 مليار دولار

احنا بقى اسثماراتنا كام هناك ؟

100

مليون دولار

والكلام ده مش من عندي الكلام ده اللي قاله رئيس مجلس الأعمال المصري الاثيوبي

______________________

يا اخونا مافضلناش غير نهر النيل

هنعمل إيه ؟

ولا ده كمان محتاج تفويض للبرادعي ؟

خلص الكلام

اتفرج يا سلام اتفرج يا جدع



http://www.youtube.com/watch?v=uIr4fr4ZPto

ممنوع تمصمص شفايفك يا اخينا

http://www.youtube.com/watch?v=K3KxLTg5Tf0&feature=related


حسبي الله هو نعم الوكيل

أنا عاوزه من ده يا حزمبل أنا عاوزه من ده

طبعا ليس خافيا على احد ازدياد اعداد الاطفال


المصابين بمرض السرطان المتوحش حفظكم الله وعافانا


وأكيد برضه أي حد قابل أو شاف طفل أو شاب

أو شيخ عجوز أو بنت في اجمل سنوات عمرها

فتك بها هذا المرض اللعين


بالذات الاطفال اللي المرض بينتشر بينهم حاليا بمعدلات مخيفه



.....في أكتر من بيت مصر ي هتلاقي



أم الهم قضى على ماتبقى منها حزنا على ابنها المصاب بالمرض اللعين



لا تعرف كيف تساعده أو تخفف عنه آلامه



ام اخرى ملكومة بوفاة ابنها


لكن مفكرتش تلك الام ا و ذاك فكرت مجرد فكرة عابرة إن اسم ابنها ممكن يطلق على باب الحارة اللي عايشين فيها


أو حتى يكتبوه على باب بيتهم أو في العشة الصفيح الضاربة العمق في قلب عشوائيات مصر

لمجرد إن ابنها توفي نتيجة لهذا المرض

لكن نلاقي اسم محمد علاء مبارك يتوسط حديقة ما

بهذا الشكل المستفز فهذا لا يرضي أحد



واعتقد لا يرضي حتى والده أو والدته

فكل أم وكل اب عندهم ابنهم هو أغلى شيء في الوجود


المرض والموت لم يميزا بين حفيد الرئيس وابن افقر واحد في مصر

على أي أساس تم اطلاق اسم الابن على الحديقة دي ؟

اعلم حزن امه عليه ولوعة الفراق


لكن علينا في المقابل ان نحترم احزان الاخرين ونراعي مشاعرهم


أما ان يظهر الاستفزاز بهذا الشكل فهذا مالا يمكن لأحد ان يقبله



اعلم علم اليقين ايضا ان اطلاق اسم حفيد الرئيس لم يأتي بطلب من الاب أو الجد أو الجدة



لكن واحد عبقري" دلدول" حب ينال الرضا السامي


فتصرف من نفسه


تماما كما تفعل الدبه التي قتلت صاحبها بدلا من ان تهش عن وجهه الذبابه

البقاء لله

بجد شيء مخزي ومخجل

الطريقه اللي ا تعامل بيها النظام المصري

مع خبر وفاة الامام الأكبر شيخ الجامع الأزهر

الشيخ محمد سيد طنطاوي

الذي قد نختلف أو نتفق على طريقته ومنهجه وتعامله مع كثير من الأمور

لكنه يبقى رغم انف الجميع الرمز

شاء الجميع أو ابى

بسم الله الرحمن الرحيم

" فاما الزبد بيذهب جفاء وأما ماينفع الناس فيمكث في الأرض كذلك يضرب الله الأمثال "

نعتبر موقف الشيخ التي لا ترضينا هي الزبد ونعتبر علمه هو ماينفع الناس وبقي في الأرض

مش عارفه كانوا منتظرين إيه منتظرين الحبر الأعظم البابا" بنديكت الثامن "يعلن الحداد عليه ؟

ولا منتظرين" الدالاي لاما "مثلا يطلع على شاشة التلفزيون يرثيه ؟

مهما كان وجه الخلاف بيننا وبين الامام الفقيد

لا يدعوا أبدًا ان نجب علمه الغزير الذي حجبه عنا بـانشغاله قسرا بالسياسه

في نفس الوقت يبدو وكان النظام بالفعل بقى تايه

مش عارفين تنزلوا نعي يليق بحجم اكبر مرجع سني للمسلمين السنه في العالم ؟

يا نهار ازرق !!

مش عارفين تاخدوا قرار بالحداد في وسائل الاعلام

دي سعاد نصر اتزعل عليها أكتر من الشيخ الامام الراحل

يا أخي ده انتوا فالقينا بالزعيم أكل إيه عسل ولا زبادي

.........الزعيم مشي كام خطوه

!! الزعيم لابس بيجامه مخططه ولا كاروهات
الزعيم اتاوب كام مره

طيب اعتبروه طفل زي اللي اتعمل له حداد 3 أيام

.رحم الله الشيخ العلامه وسامحه الله على انخراطه في السياسة والنظام

واضح جدا ان النظام مبيعرفش

مبيعرفش يكرم رجالته يعني

وبالطريقه المهينه دي اللي اتعامل بيها النظام مع خبر الوفاة اعتقد ان ده كان المسمار الاخير في نعش الازهر

كأكبر مؤسسة دينه سنيه إذا كان أصحاب المصيبه ولا همهم

يبقى اللي بره هيهتم

بجملة الازهر كمان

ومتستعجبوش مثلا لو ماليزيا أو اندونيسيا طلبت نقل مقر الأزهر ل جاوا أو كوالالمبور

فول وفلافل

بمناسبة اليوم العالمي للمرأة من هو الرجل ؟

الرجل هو سلعة استهلاكيه موجوده على ارفف هايبر وسانيسبري وكارفور

وعليها اوفر اشتري راجل وخد علبة تونه هاف بريس

ثورة الشك: يعني الدبابيس تفضل" تشكشك" في شعر ودماغ البنت اللي لابسه حجاب

رسالة إلى الوالي

سيدي الوالي .... شفاك الله وعافاك

أكتب اليك وانت في بلاد الجرمن ناس نضيفه قوي يا والينا أنا رحت هناك مرة واحدة وفضلت فاتحه بقي أما شفت مطار فرانكفورت لمدة دقيقتين من شدة النظام والنظافه مع اني كنت جاية من هيثرو

على فكرة

الاجئين المصريين كتروا قوي في بريطانيا يا سيدنا

.....المهم عارفه انه مش موضوعنا

احمد الله الذي شفاك وعافاك

وسمعت إنك الحمد لله بدأت تتمشى في حجرتك وكمان اكلت عسل وزبادي

والينا العزيز تصدق بالله رغم كل البهدله اللي احنا متبهدلينها

!! وكل الكلام اللي كان على تويتر كان لسة فيه بذرة خير جوانا وخايفين عليك

والله أكتر من واحد قال أنا خايف على الوالي بجد

احنا شعب طيب قوي يا والينا

والعشرة مش بتهون غير على ابن الحرام

واحنا ولله الحمد الحاجة الوحيده اللي بقت لينا ومتأكدين منها إن احنا ولاد حلال

سؤال بسيط يا سيدنا

وأنت تحت مبضع الجراح الم تراجع نفسك في حال الشعب ؟ الم تتذكر أنك ربما ربما ربما تقابل وجه كريم ؟

ماذا فعلت ؟

كيف كان إحساسك وانت تفقد الوعي شيئا فشيئا ؟

الم يساورك أي شعور بانك ربما ربما ربما تبقى هكذا- لا قدر الله- ؟

الم يتسلل أي هاجس أنك ربما لا تفتح عينيك مرة اخرى لتحكم ؟

وان تصبح محكوما- لاول مره من 28 سنه - بعدل الله ؟

طيب الحمد لله قمت بالسلامة

فكرت ؟

راجعت نفسك ؟

اعدت التفكير فيما يحدث ؟

أتمنى ان يكون هذا الحادث نقطه للرجوع

واعادة للتفكير

وأننا شعب بجد طيب

لا يستحق ما يحدث له

.....وانت اعلم الناس بما يحدث له

في السجون .....

والمستشفيات ........

والمدارس

والجامعات

والمخابز وامام أبواب السفارات

اطمن يا ريس والله مازلنا نحبك

ولا داعي لوجبه و اتوبيس وخمسين جنيه علشان حد يستقبلك في المطار

انت اكبر من كده بكتير وزي ماقلتلك احنا شعب طيب

بس مايستاهلش اللي بيحصل له

دعواتي بالشفاء

وراجع نفسك

النظام بين التخبط والتخبط المضاد

.الحمد لله تم الافراج عن المدون المصري احمد مصطفى دون تقديمه للمحاكمة حتى وتم حفظ القضيه

وإن دل هذا انما يدل على ان النظام في حالة تخبط تام

لا يعرف من ين يبدأ ولا كيف ينتهي

مرة واحدة تم القبض على المدون الشاب وذلك بعد مرور اكثر من سنة على تدوينته الخاصة " بالكليه الحربيه".

الأكثر من ذلك انهم قرروا تقديمه للمحكمه العسكريه

.... ثم تراجعوا هم يتخبطون لا يعلمون كيف يمكن ان تعالج الامور بحكمةأو كيف يسيطروا عليها

..مش عارفين هيلاقوها منين ولا منين ربنا يكون في عونهم .

وبكده اقدر إن شاء الله اشيل صورة احمد مصطفى من على مدونتي

و عقبال ماااشيل كمان صورة مسعد ابو فجر هي كمان

وجنت على نفسها الرجالة

منذ أيام قليلة قوي جدا خالص اتحفنا" عمر طاهر" بمقاله يصف فيها اشهر عشرون فتاه في مصر .

واعترضت بعض البنات اكترهم "فيمينيست" اللي هما بتوع المرأة تساوي الرجل ومفيش حد أحسن من حد وبتاع.

وفيه رجاله كمان اعترضوا ان عمر طاهر كان كريم مع البنات ومقالش كل حاجة وكان مكارمهم فترى افترى يعني .

وتعقيبا على المقاله اليكم يا رجالة تخاف ماتقولش لأ الآتي أشهر10 رجاله في مصر

.......................

1-الشلحف : وهو اللي مش بيعرف يتعامل مع البنات وعامل فيها الباز افندي في فيلم ابن حميدو ومقطع السمكة وراسها وهو أصلا مبيعرفش يقطع رغيف عيش .

.........................................

2-الدهل: وده تلاقي كده شفايفه مدلدله وغليظه ومش عاجبه أي حاجة في أي حاجه ودايما قلب شفايفه ومنزلهم على أساس إنه قمر

............................

3-المهيطل: وده ينتمي بشكل أو باخر لفصيلة الدهليين بس زايد عليه انه بيلبس جينز ماركت كلفين كلاين

.................................

4-الحيطه : وده طبعا بتلاقيه طول بعرض بارتفاع حاجة زي مجانص اللي في فيلم اسم اعل ياسين بوليس حربي ودايما موازي والعياذ بالله ويحتقر اللي ارفع منه وكل كلامه عبارة عن 3 جمل أنا رايح الجيم أنا جاي من الجيم أنا هنام علشان عندي جيم الصبح بدري وكلمة السر اللي اصحابه بيتكلموا بيها عليه في اغلب الأحيان بتكون توتو عضلات

.................................

5-السيكي ميكي وده دايما شايل في ايده تلات حاجات الموبايل النوكيا الn 5800 والنضارة al-fossil وطبعا علبة السجاير المارلوبورو ومننساش طبعا انه بيكون لابس بنطلون لو ويست .آه دايما بيقول لصاحبته: " يا قلبي "

6-الطحش : يعيش ويتعايش عصبي المزاج يتشاجر لأتفه الأسباب لكنه طيب في المقام الاول وأي بنت ممكن تضحك عليه من أول قاعدة في ستي ستارز .

7-الأرن:وده طبعا كل البنات عارفين مين هو الشاب الأرنون ونكاية في الشباب وغيظ فيهم مش هاقول من هو وإيه مواصفاته خليها بيننا يا بنات :P

8-اللوح : وده يتصف بصفات عديده كوكتيل يعني من الطحشنهه واوالدهلله والحيطه بس اهم صفة عنده انه فاكر نفسه فكيك وماحدش جه ولا جاي ولا هإيجي زيه غلبان موت يا عيني .

9- الهابالوله: ما شاء الله عليه دايما مبتسم بسبب أو من غير متعرفش ليه أو إيه السبب حتى لو حد شتمه بيضحك "ويخلق مالا تعلمون "

10-العبقرينو : وده دايما يا عيني شايل اللاب توب بتاعه ودايخ بيه وكل يوم في حفل توقيع لكاتب من الكتاب والعوينات سمة اساسيه له ونحيف وشعر راسه قرب يطير من كتر العبقرية .

كفاية عليهم كده بقى هيعيطوا وتاني مرة أما حد يا بنات يعمل كده فينا منزعلش نرد في قلب المعركة والبادي اظلم وجنت على نفسها الرجالة