رسالة إلى الوالي

سيدي الوالي .... شفاك الله وعافاك

أكتب اليك وانت في بلاد الجرمن ناس نضيفه قوي يا والينا أنا رحت هناك مرة واحدة وفضلت فاتحه بقي أما شفت مطار فرانكفورت لمدة دقيقتين من شدة النظام والنظافه مع اني كنت جاية من هيثرو

على فكرة

الاجئين المصريين كتروا قوي في بريطانيا يا سيدنا

.....المهم عارفه انه مش موضوعنا

احمد الله الذي شفاك وعافاك

وسمعت إنك الحمد لله بدأت تتمشى في حجرتك وكمان اكلت عسل وزبادي

والينا العزيز تصدق بالله رغم كل البهدله اللي احنا متبهدلينها

!! وكل الكلام اللي كان على تويتر كان لسة فيه بذرة خير جوانا وخايفين عليك

والله أكتر من واحد قال أنا خايف على الوالي بجد

احنا شعب طيب قوي يا والينا

والعشرة مش بتهون غير على ابن الحرام

واحنا ولله الحمد الحاجة الوحيده اللي بقت لينا ومتأكدين منها إن احنا ولاد حلال

سؤال بسيط يا سيدنا

وأنت تحت مبضع الجراح الم تراجع نفسك في حال الشعب ؟ الم تتذكر أنك ربما ربما ربما تقابل وجه كريم ؟

ماذا فعلت ؟

كيف كان إحساسك وانت تفقد الوعي شيئا فشيئا ؟

الم يساورك أي شعور بانك ربما ربما ربما تبقى هكذا- لا قدر الله- ؟

الم يتسلل أي هاجس أنك ربما لا تفتح عينيك مرة اخرى لتحكم ؟

وان تصبح محكوما- لاول مره من 28 سنه - بعدل الله ؟

طيب الحمد لله قمت بالسلامة

فكرت ؟

راجعت نفسك ؟

اعدت التفكير فيما يحدث ؟

أتمنى ان يكون هذا الحادث نقطه للرجوع

واعادة للتفكير

وأننا شعب بجد طيب

لا يستحق ما يحدث له

.....وانت اعلم الناس بما يحدث له

في السجون .....

والمستشفيات ........

والمدارس

والجامعات

والمخابز وامام أبواب السفارات

اطمن يا ريس والله مازلنا نحبك

ولا داعي لوجبه و اتوبيس وخمسين جنيه علشان حد يستقبلك في المطار

انت اكبر من كده بكتير وزي ماقلتلك احنا شعب طيب

بس مايستاهلش اللي بيحصل له

دعواتي بالشفاء

وراجع نفسك

النظام بين التخبط والتخبط المضاد

.الحمد لله تم الافراج عن المدون المصري احمد مصطفى دون تقديمه للمحاكمة حتى وتم حفظ القضيه

وإن دل هذا انما يدل على ان النظام في حالة تخبط تام

لا يعرف من ين يبدأ ولا كيف ينتهي

مرة واحدة تم القبض على المدون الشاب وذلك بعد مرور اكثر من سنة على تدوينته الخاصة " بالكليه الحربيه".

الأكثر من ذلك انهم قرروا تقديمه للمحكمه العسكريه

.... ثم تراجعوا هم يتخبطون لا يعلمون كيف يمكن ان تعالج الامور بحكمةأو كيف يسيطروا عليها

..مش عارفين هيلاقوها منين ولا منين ربنا يكون في عونهم .

وبكده اقدر إن شاء الله اشيل صورة احمد مصطفى من على مدونتي

و عقبال ماااشيل كمان صورة مسعد ابو فجر هي كمان

وجنت على نفسها الرجالة

منذ أيام قليلة قوي جدا خالص اتحفنا" عمر طاهر" بمقاله يصف فيها اشهر عشرون فتاه في مصر .

واعترضت بعض البنات اكترهم "فيمينيست" اللي هما بتوع المرأة تساوي الرجل ومفيش حد أحسن من حد وبتاع.

وفيه رجاله كمان اعترضوا ان عمر طاهر كان كريم مع البنات ومقالش كل حاجة وكان مكارمهم فترى افترى يعني .

وتعقيبا على المقاله اليكم يا رجالة تخاف ماتقولش لأ الآتي أشهر10 رجاله في مصر

.......................

1-الشلحف : وهو اللي مش بيعرف يتعامل مع البنات وعامل فيها الباز افندي في فيلم ابن حميدو ومقطع السمكة وراسها وهو أصلا مبيعرفش يقطع رغيف عيش .

.........................................

2-الدهل: وده تلاقي كده شفايفه مدلدله وغليظه ومش عاجبه أي حاجة في أي حاجه ودايما قلب شفايفه ومنزلهم على أساس إنه قمر

............................

3-المهيطل: وده ينتمي بشكل أو باخر لفصيلة الدهليين بس زايد عليه انه بيلبس جينز ماركت كلفين كلاين

.................................

4-الحيطه : وده طبعا بتلاقيه طول بعرض بارتفاع حاجة زي مجانص اللي في فيلم اسم اعل ياسين بوليس حربي ودايما موازي والعياذ بالله ويحتقر اللي ارفع منه وكل كلامه عبارة عن 3 جمل أنا رايح الجيم أنا جاي من الجيم أنا هنام علشان عندي جيم الصبح بدري وكلمة السر اللي اصحابه بيتكلموا بيها عليه في اغلب الأحيان بتكون توتو عضلات

.................................

5-السيكي ميكي وده دايما شايل في ايده تلات حاجات الموبايل النوكيا الn 5800 والنضارة al-fossil وطبعا علبة السجاير المارلوبورو ومننساش طبعا انه بيكون لابس بنطلون لو ويست .آه دايما بيقول لصاحبته: " يا قلبي "

6-الطحش : يعيش ويتعايش عصبي المزاج يتشاجر لأتفه الأسباب لكنه طيب في المقام الاول وأي بنت ممكن تضحك عليه من أول قاعدة في ستي ستارز .

7-الأرن:وده طبعا كل البنات عارفين مين هو الشاب الأرنون ونكاية في الشباب وغيظ فيهم مش هاقول من هو وإيه مواصفاته خليها بيننا يا بنات :P

8-اللوح : وده يتصف بصفات عديده كوكتيل يعني من الطحشنهه واوالدهلله والحيطه بس اهم صفة عنده انه فاكر نفسه فكيك وماحدش جه ولا جاي ولا هإيجي زيه غلبان موت يا عيني .

9- الهابالوله: ما شاء الله عليه دايما مبتسم بسبب أو من غير متعرفش ليه أو إيه السبب حتى لو حد شتمه بيضحك "ويخلق مالا تعلمون "

10-العبقرينو : وده دايما يا عيني شايل اللاب توب بتاعه ودايخ بيه وكل يوم في حفل توقيع لكاتب من الكتاب والعوينات سمة اساسيه له ونحيف وشعر راسه قرب يطير من كتر العبقرية .

كفاية عليهم كده بقى هيعيطوا وتاني مرة أما حد يا بنات يعمل كده فينا منزعلش نرد في قلب المعركة والبادي اظلم وجنت على نفسها الرجالة

سيناء ..هايتي ...رايح جاي

الباشا امر بإرسال معونات إلى شعب هيتي المنكوب

وماله مش عيب الكارثة اكبر من الجميع

والناس كلها بتحاول تعمل حاجة

طيب يا عم الحاج ماسينا بعدها بيوم واحد السيول غرقتها

إلا مافي خبر واحد ينبه الناس بالكارثة أو باللي حصل هناك

التلفزيون الحكومي عتم على الخبر وانشغل بخطوبة نظيف

وكتب كتابه والشبكه والسجاد على نظيف

ولا على العروسة

ساب سينا تغرق

إيه يا زعيم؟

مستني جيش الدفاع الاسرائيلي يقوم باللازم ؟

آه وماله ماهو احنا بقينا عيلة واحده مع بعتشينا

عاوز ولاء البدو يا أخي ناه

اعتبرهم حسن شحاته واولاده اللي كنت هتبعت لهم قوات خاصة

تنقذهم من جحيم السودان وسيول الجزائر !

أو اعتبرهم عصام الحضري اللي كان مشكلته مع الاهلي مبتنيمكش في عز كارثة العبارة

والاخ علاء فين مطلعش في ولا توك شو ليه علشان سينا وأهل سينا ؟

ولا سينا ملهاش لازمة ؟

واختصرتوها في شرم الشيخ ؟

ومنتجعات شرم

الله يرحم الشهداء اللي ماتوا علشان ترابها

وسينا لها الله

أما انت

فحسبي الله عليك

المهم اللي عاوز يتبرع لأهالي سينا-ء ده اللي نقدر عليه دلوقتي- آه امال إيه بقينا جمعية مدنية بندير حياتنا بنفسنا

العنوان بتاع

جمعية رسالة

مصرالجديده- ميدان الحجاز

خلف سيتي بنك
20128708339 00

أو

20112964480 00

كله إلا كده

رجعت النهارده على خبر مهبب وهو ان عسس أمن الدولة المصون راعي شئون البلاد والعباد والريس.. قبضوا على 20 من النشطاء والمدونين والحقوقيين بتهمة إيه بقى ؟ا انهم رايحين يعزوا اهالي ضحايا الحادث الارهابي القذر بتاع ليلة عيد الميلاد في نجع حمادي.نازلين في حالهم من القطر . هوبا لقوا اللهو الخفي في انتظارهم

أما أمن الدولة ما شاء الله مفتح ومصحصح كده وشايف شغله

كانوا فين الحلوين والناس بتقتل وتندبح زي الفراخ

وهم طالعين من صلواتهم ليلة عيدهم؟

ولا شايلين اعلام

ولا نابابيت

ناس رايحة تقدم واجب عزاء مستحق

ويمكن كمان يكون متأخر

إيه بقى جريمتهم ؟ الكوميدي بقى بتوع أمن الدولة بيقولوا ماقبضناش على حد

الللعبه كلها غبية

الأمن حب يقوللنشطاء أو أي حد تسول له نفسه كله إلى الاقباط الاقباط دول خط احمر

مالكوش دعوة بيهم

........دول بتوعنا احنا يا ولاد ال

غباء في غباء بيفضحوا نفسهم بنفسهم

ودي سبوبتهم

.الاقباط هم سبوبة النظام في مصر

يعني يسيبوا السبوبه اللي مطمناهم

ضامنه للمحروس ابن المحروس على الاقل 10 مليون

صوت وهو مش لاقي حد يصوت عليه

دي طبيعة أي نظام فاشي قذر لا يستطيع أي نظام ديكتاتوري قمعي

إلا ان يعيش في ظل حالة فوضي وفتنه

مابيتغزاش ويسمن ويبقلظ ويكبر إلا على كده تمام زي الوطاويط ماتعرفشي تعيش غير في الضلمه

وزي العرسه اللي مابتغزاش غير على دم الضحية

بقى انتوا بقى يا حلوين جايين تفكوا الجيتو بتاع الاقباط؟

اللي نجحنا نقفله عليهم هما والبابا30 سنة هااواو

هي دي الرسالة الغبية اللي النظام حب يوصلها

بس هو نسي انه بكده بيفضح نفسه

وانه فعلا بيزكي الفتنه وعاوزها تفضل كده مشعللة

ويفضل عازل الاقباط علشان يفضل مفهمهم انه هو وبس اللي حبيبهم مهما يقولوا العزال

النظام بقى مجنون

والله ماعارف يعمل إيه

عامل زي التور الهايج في كله

وده معناه انهم فعلا في ازمة كبيره يا ريت بقى نستغل ده ونستثمره صح

اسماء المعتقلين والمصدر نوارة نجم

اسراء عبد الفتاح

وائل عباس

باسم سمير عوض

باسم فتحى محمد

احمد بدوى عبد الحميد

شريف عبد العزيز محمود

ماريان ناجى حنا

مصطفى أحمد محمد النجار

رؤى ابراهيم غريب

ناصر فتحى على

خالد محمود محمد

طلعت الصاوى1

نادية الزينى بارونى "فرنسية"

أميرة الطحاوى اسماعيل

سلمى علاء الدين عقل

- أحمد محمود مصطفى

اسماعيل سيد عمر

- منى فؤاد أحمد

- أحمد فتحى محمد

- بولا عبده أمين

-حسام صابر على

- حمادة عبد الفتاح محمد

جمال فريد

-محمد خلف محمد

- الحسينى سيد أحمد

-محمد حمدى حسن

-محمد عبدالله محمد

- حشمت محمد عبدالله

طارق صبرى عبد الله

- شاهيناز محمد صلاح

افرح يا حسني

لم أشاهد أمس مباراة مصر ونيجيريا نظرا لظروف العمل الرخمة ... .

وعملت استفتاء بين التوتريه امبارح اروح الشغل

ولا لأ

وبما إني ديموقراطيه ومن دولة ديموقراطيه

تقدس الديموقراطيه قررت ارضخ لرأي الاغلبية ورحت الشغل.....

على وعد من الاخوة بنقل المباراة نقلا حياعلى شاشة التويتر وقد كان- والله ماجصروا الشباب- وفازت مصر وفرحنا

اهو أي حاجة يعني تفرحنا وخلاص مادام الحكومة مش ناوية تقدم استقالتها

ولا الريس راضي يتوكل على الله ويعتزل اللعب بقى

المهم

روحت لقيت إيه بقى الدنيا مقلوبه على الويب لان طارق دياب اللي عمري ماسمعت عنه قبل كده( نظرا لجهلي الكروي ) واللي طلع فيما بعد أحسن لاعب في تونس وان تونس اختارته لاعب القرن عندهم اذ بيه قافش على نادر السيد وزنقه زنقه سودا وهو بيقول نهني الأمه العربية على فوز مصر راح طارق مقاطعه زي ماشوفتوا في الفيتيو وقاله هني مصر شعب مصر بس مالكش دعوة بالعرب الكلام طبعا أربك نادر السيد واتلجلج كده مشعارف يقول إيه

بالنسبه ل زكريا ناصف فضل ساكت وطارق بقى طاح في كله.....

وأبكي أبكي يا عروبة علي بناكي طوبه طوبه اللي هو عبد الناصر.

المهم طولت عليكم الكلام زعل المصريين جدا

والردود بقى والتعليقات على المنتديات والمواقع ماقولكش

طيب إيه؟

مادي الحقيقه الوطن العربي كله بقى كارهنا

احنا خلينا إيه للعرب أو حتى غير العرب يحبونا علشانه ؟

فتحنا مثلا المعبر للغزاويين ليل

نهار بندخل لهم أكل وشرب ودوا للمرضى ولبن للاطفال

بلاش سلاح أحسن ادخل في زمرة الارهابيين

قفلنا أبوابنا في وجه اسرائيل وقاداتها ؟؟

طلعنا قدام العالم كله ننفي إن فيه حاجة اسمها الجدار التحتي العازل ؟

مامرمطناش قوافل المساعدات اللي جاية من اصقاع الأرض( شفتوا اصقاع دي جامدة آخر حاجه ) تحاول تقدم أي حاجة للمحاصرين الجائعين المرضى في غزة ؟ هيحبونا ليه ؟

كنت مشفقة جدا على نادر السيد وزكريا ناصف

لانهم جوه نفسهم مقهورين لانهم مش عارفين يردوا على هذا الطارق .

أصل اسطوانة مصر عملت ومصر سوت واحنا اللي دهنا الهوا دوكو مبقتش تاكل مع حد خلاص

احنا الشعب احنا اللي خلينا نظام زي ده مرمط في الوحل سمعة ابونا

دهضرب المتظاهرين الفرنسيين يا جودعان شفتوا جبروت أكتر من كده ؟

ده خلى اللي كان ميعرفش مصر عرفها

بانها آه مصر دي اللي مجوعه الفلسطينيين

واللي بتضرب المتظاهرين اللي جايين من مشارق الأرض ومغاربها يساعدوا شعب تخلى عنه الجميع واولهم احنا

ده احنا بقينا لا بنرحم ولا بنخلي رحمة ربنا تنزل

إيه الزفت ده هيحبونا على إيه ؟

بالله عليكوا كده يا زعلانين هيحبونا على إيه ؟

عارفة إنها حاجة تزعل إن احنا بقينا كدة

بس يا ريت نواجه بعض بالحقيقة

أنا كنت بغلي وهذا الطاارق بيتكلم

بس بيني وبين نفسي كنت مكسوفة

زي ماده كان ده إحساس كل اللي كانوا غضبانين قوي من كلامه

صدقوني المصريين معزعلوش من كلام طارق التائب بقدر ماه زعلوا واتحسروا إن هي دي مصر 2010 وان دي حقيقتنا للاسف .... . بقينا ملطشة للرايح واللي جاي والبركة في هذا النظام القواد

ويا عم طريق متزعلش حقك علينا احنا كنا فاكرين إن ليش فيه ناس بتحبنا وناس عارفه ان كل اللي بيحصل لنا ده مش بيدينا و كله من الانظمه الخرويه,

صحيح ياطارق قولي هو زين العابدين عمل إيه لغزة؟

وناوي يمدد فترات الرياسة لحد امتى؟

يا طارق لا تعايرني ولا اعايرك الهم طايلني وطايلك

اللهم اكشف هذه الغمة بايدينا نحن أبناء هذه الأمة

أنا مش عاشق ضلمه ولا زعلت الضي

ان ماقدرتش تضحك ماتدمعش ولا تبكيش

وان مافضلش معاك غير قلبك

اوعي تخاف مش هتموت هتعيش

وان سألوك الناس عن ضي جوه عيونك مابيلمعش

ماتخبيش

قولهم العيب مش فيا ده العيب في الضي

وانا مش عاشق ضلمه ولا زعلت الضي

مسير الضي لوحده هيلمع

مسير الضحك لوحده هيطلع

مابيجرحش ولا يأذيش

"علي سلامه "

بشتغل في حديد عز وفيه فتنه طائفيه في مصر

أيوه دي حقيقه ليه بنخبيها فيه فتنه طائفيه في مصر

بس فتنه من نوع فريد كما ان كل حاجه في مصر فريده

فتنه بتطلع وقت ماالحكومه عاوزها تطلع وتهمد وقت ماعاوزها تهمد

فتنه لعوب والقواد الكبير قاعد فوق يتفرج ويوزع الأدوار على العواهر وليس على العاهرات.... آه عواهر المره دي الدور الرئيسي هنا ل عاهر مش عاهره مش بقولكوا فتنه فريده من نوعها العاهر المره دي مسجل خطر اسمه حمامه وطلع إيه بقى إن" حمامة" ده تبع عبد الرحيم الغول عضو مجلس الشعب عن دايرة نجع حمادي واللي قبل كده اشتبك مع ابتسام ميخائيل عضوة مجلس الشعب المعينه بعد

أن رفض الغول اقتراح ابتسام بضرورة توثيق عقد الزواج العرفي وأكد أن هذا المشرو"ع أولى" أن يقدمه" أهله" من النواب المسلمين وليس نائب مسيحي"!!!!! .. فاعترضت النائبة ابتسام ميخائيل حبيب على طريقة الغول في الكلام وقالت " عيب كده يا سيادة النائب مفيش فرق بين نائب مسلم ومسيحي .. كلنا نسعى إلى خدمة الشعب ورد عليها الغول بثورة شديدة " انتي بدخلي نفسك ليه في مشروع قانون مش بتاعك والكلام ده كان في جلسة مجلس الشعب يوم 9/2/2009 للي عاوز يتأكد حتى النائبه ردت عليه وقالت له" أنت مش بتفهم" قوم الغول بقى منساش للست الكلام ده وحط في قلبه وجه وقت الرد ورد علينا بحمامه الكمو نيليلة العيد طب ربنا عرفوه بإيه ؟ يا نهار ازرق ماهي بانت أهه أما نائب يهاجم نائب زيها زيه ويقول لها" إنتي اش دخلك في امور المسلمين "!! يبقى فيه فتنه ولا مفيش ؟؟ فيه فتنه ورز تعالوا كلوا ويتضح إن نفس ذات النائب هو اللي مظبط حمامه المسجل الخطر اللي بيقولوا إنه هو اللي ارتكب المجزره ....... خلص الكلام فتكوا بعافيه... http://www.brmasr.com/view_article.php?cat=text_news&id=1602

آه نسيت اقولكوا إن عبد الرحيم الغول مانجحشي من أول مره في نجع حمادي.... لأ نجح في جولة الاعاده وطبعا كان ذلك بعون حمامه الكموني" وشركاه بعد ان لعبت الكتلة القبطية التصويتة دورا كبيرا فى الإطاحة به وعندها انكشف وجهه الحقيقى تصرف "كالسفهاء كما أن أنصاره قاموا بالاعتداء على محلات الأقباط طوال اليوم الانتخابي أما حينما أغلقت اللجان فى تمام الساعة السابعة فقد قام المناصرون لهذا البلطجى بالتعدى على كنائس مار يوحنا بنجع حمادى والسيدة العذراء ومار جرجس ببهجورة والغريب أن الجميع التزم الصمت ولم يتصدى لهؤلاء البلطجية أى جهة لا شعبية ولا رسمية ولا أمنية

اعلانات مبوبه

إعلان رقم واحد

بعد اللي حصل امبارح من النشطاء الفرنساويين الفرنجه مطلوب الآتي

شعب :

المواصفات:

مطلوب عدد واحد شعب جاهز أو تفصيل مش فارقه اهم حاجه إنه يعرف يقول لأ ومايطاتيش وميبقاش كما حمار الغيط يشيل سباخ وراضي ومستعد يشيل أي حاجه و مبيقولشي لأ .آه يا مواطن ميقولش لأ ...اهم شرط في الشعب ده انه لما نقول هنتظاهر كله يحضر مش يسيبونا كده زي الهطل ويقولوا أصل كان ورايا غسيل أو ناديه كانت بتولد متسيب ناديه تولد وتيجي ماهي هتولد عادي صدقني ....أصل ابني كان عنده لوز هيخف بعون الله أصل بابا مش راضي يخليني أنزل قوليله عندي كورس هيسيبك .

ملحوظه :الوسطاء المنتفعين ونبي ونبي يمتنعون علشان هما سبب كل البلاوي اللي احنا فيها دي

إعلان رقم اتنين

مطلوب وطن وطن يحتوينا نحن المقهورين في الارض... الهوتو والتوتسي لهم كرامه في بلدهم رغم كل اللي حصل بس لهم وطن بيتخانقوا علشانه احنا بنتخانق ده إذا اتخنقنا أصلا على بلد مش بتاعتنا البلد بتاعت امانة السياسات مش بلدنا يا اخونا .

شروط الوطن :

ان لا تكون له حدود مع أي دوله هوكده -وطن شيطاني- علشان قالوا وقلنا يبقى احنا كده مع نفسنا لا لينا دعوه بحد ولا حد له دعوه بينا وحتى ميبقاش فيه صباح الخير يا جاري.

اعلان رقم 3 :

مطلوب رئيس للوطن :

مواصفات الرئيس المطلوب :

ألا يكون من قاطني محافظة المنوفيه أو من مواليد المنوفيه أو له أي علاقه بأي حد من محافظة المنوفيه (أنا منوفيه بالجذور على فكره ومعايا الباسبور المنوفي علشان منتفهمش غلط )

الا يقل السن عن 35 ولا يزيد عن 43 (علشان جمال يبقى بره بره يعني )

ألايكون قد مارس العمل السياسي قبل كده علشان الي مارس ده بيكون وولامواخذه مش ولابد عاوزين يجيلنا واحد ابيض كده بالسليقه .

إعلان رقم 4 :

مطلوب رئيس وزاره للوطن اهم شرط الا يقل طوله عن 155 سم-كده قطعنا الطريق عن عز- والا يزيد عن 183 سم وكده قفلناها على نظيف .

تسحب كراسة الشروط من أي حته ومفيش تأمين اللي عاوز يجي اهلا وسهلا

ملحوظه: دي الخطوط العريضه للإعلان اللي عنده أي مواصفات أو تعديلات أخرى اهلا وسهلا

حائط العار

صباح الخير عليكوا

هو مفيش خير ولا حاجه بس صباح الخير بردوا لان الرسول الكريم محمد عليه افضل الصلوات والتبريكات قال فيما معناه ان الخير فيه وفي أمت-ه اللي هي احنا- إلى يوم الدين اللي أنا برده شايفاة قرب... إيه ؟ بتقولي قرب ليه ؟ طيب بذمتك مش عارف ده احنا بقينا احنا وإسرائيل أكتر من ولاد عم يعني زي ماتقول كده روحين في زكيبه على رأي سيد درويش...... اتنين في جونينة الميرلاند بيعملوا حاجات عيب ...أو صوباعين في ...جوانتي. هم يسموا ا شارع في حيفا باسم السادات... بالمناسبه الحاجه رقيه بنت السادات رضي الله عنها وارضاها باركت الخطوه واعتبرته تكريم لابوها يا نن عين ابوها ....... ماعلينا المهم آه كنا بنقول إيه يا سيدي /ستي ...؟آه تخيل كده إنك ساكن في شارع الخليفه المأمون واذ فجأةً صحيت الصبح لقيت اسمه شارع بن جوريون !!!!عاتشي بقى يا حامتشي .طب تخيل مثلا كده صاحي الصبح - برضه - ماهي الناس ؟ بتصحى الصبح أُمّال بتصحى بالليل ..أُمّال احنا هنصحى امتى ؟ أم الرغي ....آه قوم إيه لقيت محطة متروحلوان بقى اسمها محطه شارون مفيش أي مشكله وعلى رأي المثل اللي نسيته بعدين أفتكر يعني .....وكلنا فداك يا ريس واعمل اللي أنت عاوزه ان شالله حتى تعمل مقابر جماعيه وتدفن كل الفلسطينيين فيها ونرتاح وتريح ابونا بقى ماالعزاويين اصبحوا خطر على الأمن القومي المصري ولازم نحمي حدودنا معاهم هيخلصوا السمن والدقيق اللي في رفح رفح .طب ماتحمي باقي حدودنا بقى وتعمل جدار بلاستيكي ايلاستيكي بينا وبين حدود دولة ملك الملوك بدر البدور القمر الامور القذافي- بورك فيه- وبالمره امنا من تحت أنت عارف تحت اهم حاجه امنا من الجنوب يعني واعمل جدار مش فولاذ بقى لأ جدار المونيا زي جدار سنيه المونيا كده كده إلا أنت تعرف سنيه يا ريس ؟ اجمل من هناءسمري على فكره ؟ آه وبكده بقى نبقى امنا حدودنا من الشرق ومن الغرب ومن الشمال ومن الجنوب ونعيش بقى احنا واسرائيل مع بعتشيينا في الحرام ونجيب اولاد حرام بس أنا بقى بـقولك اهوان يا نعيش عيشه فل يا نموت احنا الكل

الممنوع والمسموح لما تحب الجامعه تروح

مشهدرقم 7 هو" كده سبعه وخلاص" نهار داخلي مكتب هاني هلال اجتماع مجلس امناء الجامعات في حضور شيخ الجامع الأزهر سيد يبه أوكيه" وفضيلة مفتي الجمهوريه "علي يا ويكا" ومندوب عن قداسة البابا اللي بيتعالج في امريكا . ؟ هاني: هنعمل إيه يا جماعة    .سيد اوكيه : العمل عمل ربنا إن شاء الله

هاني:أنا عملت مسوده للمسموح والممنوع - للكل - بنات واولاد علشان بتوع حرية المرأة دول كمان ماينطولناش           

في الوسط

...رئيس جامعة القاهره : باشا والله برنس يا هاني بيه .هاني: اتفضلوا دي مسوده للاقتراحات اللي له شوق في حاجه يقولعين شمس :يا فندم إنت فصل واحنا نلبس 

رئيس جامعة المنوفيه- في امتعاض بيكلم نفسه- :كلنا هنلبس إن شاء الله

مندوب البابا:الرب راعي"هاني "يقرا المسوده بصوت عالي بينما "علي" بيكلم سكرتيرة هاني هلال عن رحلته لجزر البهاماز وعن مزز البهاماز

يمنع منعا باتا النقاب سواء داخل الحرم أو خارجه أو قدام كشك محمد بتاع التصوير اللي قدام كلية البناتكما يمنع الخمار باشكاله الكروازيه والمثلث والمربع والاسدال ممنوع مفهاش كلام دي .

سيد أوكيه: بارك الله فيك أنا قولتلهم ده عاده مش عباده محدش صدقني .رئيس جامعة طنطا: أيوه بس يا باشا الكلام بتاع الخمار ده صعب قوي أنا تقريبا كل بنات اداب وطب بخمار الدلتا كلها خمرانه يا باشا

هاني بعصبيه: بقولك إيه مش هتعرف تنفذ فيه غيرك يتمني يقعد مكانك !!رئيس جامعة طنطا في خنوع ويقلعوه يا باشا لو عاوزهم يقلعوا الاندر نقلعهلهم

سيد اوكيه: بارك الله فيك هكذا يكون الاذعان لولي الأمر .

مندوب البابا :الرب يرعاكم

هاني يكمل قراءة البيان: بالنسبه للحجاب مايكونش حجاب مسدل على الصدر يفضل الحجاب السبانيش ودبابيس مشبك بتلمع وحركات

حبذا بقى لو فيه كام خصله من الشعر باينه من تحت الطرحه الاسبانش

هاني يستطرد: البودي الكارينه مرحب بيه آخر ترحاب بالنسبه للسكيني جينز مفيهوش أي مشاكل ولا إيه ؟

الجميع في صوت واحد : تمام ساعدتك ويزيد مندو ب البابا:الرب راعي

يكمل هاني بالنسبه للشباب ممنوع بأي حال من الاحوال اطلاق اللحيه مفيش يربوا دقنهم دي عاوزين يربوا

 يربوا شعر صدرهم

علي يا ويكا يحسس على دقنه اللي- بيعتبرها بالنسباله مصدر جاذبيه- ويقول: بس يا هانون اللحيه سنه

يبلغ الغضب مداه على وجه هاني ويقول ل علي :عندك صوره للنبي أو حد من الصحابه باللحيه يا علي ؟علي:_________.صمت مطبق

.هاني نكمل بالنسبه للشباب ممنوع الكوفيه الفلسطيني أو الاردني بكل اشكالها اللي عاوز يلبس الكوششيه

 الإسرائيلي دي حريه وانفتاح على الاخر .

أي تيشيرت عليه جيفارا يتصادر أي طاقيه..أو كاسكته عليها صور لينين أو ستالين تقفش .لو الآيس كاب..عليه 

شعار البولز مفيش مانع أو شاكيرا يبقى موز

مندوب قداسة البابا:الرب يرعاكم

اللو-ويست جينز مطلوب وعادي مفيش مشكله بس الولاد ياخدوا بالهم من ماركة البوكسر اللي باين من تحت الو وسط حبذا لو كان سي كيه أو جوبس.

الجلاليب البيضاء للشباب ممنوع بأي شكل أو لون فاهمني طبعا يا سيد باشا

سيد اوكيه ده حتى مش عملي وبيعطل والوقت اللي بيروح في لبسه ربنا هيحاسبهم عليه .

السانسبروتيل قشطه الشعر الدجراديه احبك الجيبة الميكرو ولا اجمل من كده هـا فيه أي اقتراحات؟

يرد القطيع في صوت واحد كله تمام يا باشا

مندوب البابا :الرب يرعاكميسدل الستار بينما" علي الجامد" بيكمل موضوع البهاماز مع مزة هانون

أي حاجة

مش عارفه با لظبط أنا هاكتب إيه واعزوروني لو مش هتفهموا أي حاجة بس اللي بيحصل على توتير كتير. الاصل في الموضوع هو الحريه كل بني ادم- على الاقل على الويب - حر يقول افكاره براحته طالما لم يتعدى حدوده على الاخر . كل ما ينادي بيه البلوجرز وبيتبهدلوا علشانه ويتسحلوا من اجله بيطبقوا عكسه تماما ويصادروا أي أفكار لمجرد انها لا تتفق وافكارهم !!.. قابلت ناس كتيره محترمه وليها مواقف بس لما حد يجي عند المعتقد بتاعهم يجيلهم رهاب الاماكن المغلقه أو فوبيا السطوح ..هو فيه إيه احنا احوج مانكون إننا نتفق . اسفه إذا كنت فاكره نفسي واحده من البلوجرز بس يعني على الاقل كومبارس ناطق أو اعتبروني مراقب لا ناقه له ولا جمل .. يا ريت يا جماعه نسيبنا من كل الاتهامات للقاصي والداني لمجرد اختلافه معانا في التوجه أو الرأي يا ريت كمان مانصنفش الناس دع الخلق للخا لق اللي ناصري أهلا بيه واللي اخواني مرحبا والساداتي يا ويلكوم واللي مباركي مراحب والشيوعي والإشتراكي والبرادعي البلوي والكارته اللي حنا فيها كبيره ومحتاجه الكل.. الكل بمعنى كل المخلصين والشرفاء اللي كل أملهم إن البلد دي تتغير

عذرا للاطالة